JOSHUA 4 - AMÜSA BAIBEL (BSI)

Amüdhethsa Lung Khyümcho

¹ Khode yucho shünü Jordan kehcho, Abüdongba-nü Joshua te yocho,

² “Nyüh dhüreanyüh ahung müipi lanü khüdu-khüdu throung,

³ ko Jordan longla bebürü yaba tsatsala tsünü lung dhüreanyüh thronung yuzeng jüng. Hiri lung tsü arüh khyang dhisohng ko shomülang nührü müdongchah yohpüsohng.”

⁴ Achotsü Joshua-nü nyüh dhüreanyüh abinü throchehchoti tsü dsinü yocho,

⁵ “Nührü Tsingrang Abüdongba Yuzeng Singdi bekhu Jordan la tsü züdung. Nührü müipinü Israel hung müipi nengdang lung khüdu-khüdu nührü pünurü chah dhieng.

⁶ Abüdongba-nü tu nguchicho hiri lung khunü müyurü khyang lümchehsohnung. Aronungla nührü tsuzarütinü hiri lung adüzü tuokhang,

⁷ Abüdongba Yuzeng Singdi lahkhu hitside Jordan yongkhinü pohzahchoepü nührünü arüh te young. Hiri lung khunü hila tu tikehcho Israelrü khyang lümchehsohnung.”

⁸ Nyitsarütinü Joshua-nü mülacho roh-i nguchicho. Abüdongba-nü Joshua khyang yuzengjücho kyo, Jordan yongkhi longlanü Israel hung müipi nengdang lung khüdu-khüdu thro arüh müdong yang hiwücho.

⁹ Joshua apunüsü, bebürünü Yuzeng Singdi dhipü yaba müdüm Jordan yongkhi longla tsü lung dhüreanyüh khyümcho. (Ade yingcheh hiri lung tsü lile)

¹⁰ Abüdongba-nü Joshua te müyurü khyang nguchisohnung yoba lüpcho tsü münguchikhangde bebürünü Jordan longla tsü yacho. Hi Mosa-nü mülacho lile. Müyurütinü dhsüdhsa yongkhi tsü kehcho.

¹¹ Khode arüh atümung kihkeh khüulang tsü chihcho, bebürütinü Abüdongba Yuzeng Singdi tsü dhipü müyurüti bekhu wücho.

¹² Reuben ko Gad hung lanü adhrerüti ko Manase hung lanü achangshonü Mosa-nü arüh te mülacho kyo müyurüti bekhu khatanung küdang licho.

¹³ Abüdongba bete adhrerü nyüh hajar yüre-o Jeriko münyeh angah la tsü khatanung nengdang rungnümcho.

¹⁴ Hütsü nyümong Abüdongba-nü tu nguchicho hütsü khu müyurünü Joshua tsü nyitsarü arangcheh-epü khichicho. Arühnü Mosa dhichicho kyo, abi akang ayung arühnü dhichi bichicho.

¹⁵ Hütsüde Abüdongba-nü Joshua te

¹⁶ Jordan yongkhi la tsünü Yuzeng Singdi dhiba bebürüti tsü chürosohnung yocho.

¹⁷ Joshua-nü hütsüta nguchicho,

¹⁸ ko khode bebürüti tsü kihbekhüm chii chürocho yongkhi tsü thali akong jengmülüm pohcho.

¹⁹ Müyurütinü akhudiba choo adhüre nyümong Jordan yongkhi tsü kehcho ko Jeriko nyüchüro lahpi Gilgal la müdongcho.

²⁰ Hütsüla Joshua-nü Jordan yongkhi lanü hiroba lung dhüreanyüh tsü khyümcho.

²¹ Abinü Israelrü te yocho, “Aronungla, nührü tsuzarünü lung hiri tu adüzüopü tsingkhang,

²² Israelrünü Jordan yongkhi akung la tsehkhu tsicho yukheh arüh te young.

²³ Nührü Tsingrang Abüdongba-nü nührü khyang Amoh Kihdi kungsohcho kyo, arüh khyang Jordan yongkhi kungsohchoepü arüh te young.

²⁴ Hi khanglang limih la lirü apümnü Abüdongba zii khütoh-inang müdhenung ko nührünü nührü Tsingrang Abüdongba achangka müli dhichinung.”