JOSHUA 24 - AMÜSA BAIBEL (BSI)

Joshua-nü Shekem la Müyurü te Chotacho

¹ Joshua-nü Israelrü yucho apüm Shekem la shibülungsohcho. Abinü azirüti, langnürüti, yukharüti, ko thsazirüti dsicho ko arühnü Tsingrangba jingte rocho.

² Joshua-nü müyurü apüm te yocho, “Israel Tsingrang, Abüdongba-nü hita yore: ‘Papade nührü jümürüti Eufrates Yongkhi khüulang licho ko tsingrang pa mübücho. Hütsüri jümürü yola khüdu tsü Abraham ko Nahor nyüh au Tera licho.

³ Ko Ihnü nührü jümürü Abraham tsü Eufrates khüulangnü dsichehcho ko Kanan lih apüm khu norocho. Ihnü abi chahnü khütang susohcho.

⁴ Ihnü abi khyang Isak jücho ko Isak khyang Jakob ko Esau nyüh jücho. Ihnü Esau khyang Edom azong lih jücho, ta nührü jümürü Jakob ko atsurütinü Ijip lang jowücho.

⁵ Akhanglang Ihnü Mosa e Aron nyüh mütheh Ijip la chongcha arangcheh chürosohcho. Ta Ihnü nührü nüchehcho;

⁶ Ihnü nührü jümürü Ijip lanü nüchehcho ko Ijiprünü arüh nyübong akhüluba ko kuri chahnü arüh iicho.

⁷ Ta khode nührü jümürü Amoh Kihdi chihcho, arühnü Ite züdecho ko Ihnü arüh ko Ijiprü kahla amarürah chürosohcho. Ihnü Ijiprü michah kihdi rosoh arüh dhsangsehsohcho. Ihnü Ijiprü chah tu nguchicho nührünü müdhele. “‘Nührü akungaselih la anyahli licho.

⁸ Hütsüpü Ihnü nührü Jordan nyüchürolang liba Amor-rü lih lang norocho. Arühnü nührü te khatacho, ta arüh michah Ihnü nührü khyang akoh jücho. Nührü rode Ihnü arüh changsohcho ko nührünü arüh lih khyücho.

⁹ Hütsüde Moab yangthsaba Zippor tsurü Balak-nü nührü nyüm khatacho. Abinü Beor tsurü Balaam dsinü nührü chah chokehchola müthehsohcho.

¹⁰ Ta Ihnü Balaam te mühnyicho, hütsünü abinü nührü müwajücho, hütsüta Ihnü Balak khehlanü nührü khümchocho.

¹¹ Nührünü Jordan keh ro Jeriko chihcho. Ko Jeriko nyitsarü Amor-rü, Periz-rü, Kanan-rü, Hit-rü, Girgash-rü, Hiv-rü ko Jebus-rünü nührü nyüm khatacho. Ta arüh michah Ihnü nührü khyang akoh jücho.

¹² Nührü wü chihde, Amor-rü yangthsarü anyüh tsü iipehnung nengdang Ihnü arüh yola yubejarong chürosohcho. Hütsü nührü nohsheng mahkhang singthsalunü mah.

¹³ Nührünü khodesü müthsacho lih ko mükülüpcho yangdi Ihnü nührü khyang jücho. Ade nührü hütsüla lire ko nührünü mükhyümcho singdong chahnü shükusih ko olive tsure.’”

¹⁴ Joshua-nü mütozah yocho, “Hütsüeko ade, Abüdongba dhiching ko yuje cho abi dikehng. Nührü jümürünü Mesopotamia ko Ijip la mübüba tsingrangti tsü pehng ko Abüdongba du dikehng.

¹⁵ Nührünü Abi müdikehnyükhang, Mesopotamia la nührü jümürünü mübüba tsingrang dikehnung a mahkhang nührü ade liyaba Amor-rü tsingrang dikehnung, chünye throchehng. Ta Ih ko I kukhilü, ihrü Abüdongba dikehnung.”

¹⁶ Hütsüde müyurütinü lalingcho, “Ihrünü Abüdongba pehjüpü apa tsingrangti khodesü müdikehnung.

¹⁷ Abüdongba ihrü Tsingrang-nü ihrü tpurü ko ihrü Ijip lih la ayurü suro lanü nüchehcho ko Abinü nguchicho thsayahiya ihrünü nguko. Ihrünü khu roba yuchoti apüm khehlanü Abinü ihrü khümchocho.

¹⁸ Ihrünü hiba lih lang rode, Abüdongba-nü hila liyarü Amor-rü apüm iipehjücho. Hütsüeko ihrünüsü Abüdongba dikehnung; Abi tsü ihrü Tsingrang lile.”

¹⁹ Joshua-nü müyurü te yocho, “Ta nührünü Abüdongba dikehnung mükohnung. Abi amüsa Tsingrang ko Abinü nührü münyi müpehjünung. Abinü Abi nyümba mürangchore,

²⁰ ko nührünü Abi pehjüpü shuparü tsingrang dikehkhang, Abinü nührü nyümnung ko khingchinung. Abi akhulang nührü te tsa linye, Abinü nührü changjünung.”

²¹ Müyurünü Joshua te yocho, “Ta ihrünü Abüdongba dikehnung.”

²² Joshua-nü arüh te yocho, “Nührünü Abüdongba dikehnung throchehba tsü nührü jangjangnü ko nührübürü yuzi lile.” Arühnü yocho, “Ho, ihrübürü yuzie.”

²³ Abinü yocho, “Khang nührünü shuparü tsingrangti tenü zaang ko Israel Tsingrang, Abüdongba te yochonyinung yuchüm.”

²⁴ Hütsüde Müyurünü Joshua te yocho, “Ihrünü Abüdongba ihrü Tsingrang dikehnung. Ihrünü Abi yuzeng bichinung.”

²⁵ Achotsü hütsü nyümong Joshua-nü müyurü nengdang azengtaba külüpjücho ko Shekem la abinü arüh khyang bichinung yuzeng ko amülaba jücho.

²⁶ Joshua-nü yuzeng hütsüri tsü Tsingrangba Yuzeng vakhala thrahcho. Hütsüpü abinü lung arangcheh khüdu hiro Abüdongba mübüji la langsingdong pohki khyümcho.

²⁷ Abinü müyurü atümung te yocho, “Hiba lung hi Ihsa yuzi linung, hinü Ihsa te Abüdongba-nü chocho apüm yuchiko. Hütsüeko nührünü nührü Tsingrang münyümsohnung lung hi nührü nyüm yuzi linung.”

²⁸ Hütsüpü Joshua-nü müyurüti tsü tsisohcho ko arüh atümung palu lih lang thalicho.

Joshua ko Eleazar Sücho

²⁹ Hütsüpü, Nun tsurü Abüdongba dikehrü Joshua kang thsih khüdupü dhüre thsade sücho.

³⁰ Arühnü abi apu lih Timnath Sera Gaash Zong kihku lahpi azong lih Efraim la dhrürangcho.

³¹ Joshua akang lidelü müyurünü Abüdongba dikehcho ko abi süpü mii Israelrü nengdang Abüdongba-nü tu nguchicho hütsü ngurü langnürüti akang lidelü mütozah hütsüroh-i nguchi licho.

³² Israelrünü Ijip lanü hiroba Josef me tsü Shekem la Jakob-nü taripi thsih khüdunü Shekem au Hamor tsurüti te lihba lih la tsü dhrürangcho. Hiba lih hi Josef chahnü trahchochoti yo licho.

³³ Aron tsurü Eleazar tsü sücho ko Efraim azong lih abi tsurü Finehas khyang jüba Gibea la dhrürangcho.