JOSHUA 23 - AMÜSA BAIBEL (BSI)

Joshua Aza Yu

¹ Anyahlipü Abüdongba-nü Israelrü khyang arüh mükang arorühti tenü akyahshang jücho. Hütsütadelü Joshua dee ashirü kangpü licho.

² Achotsü abinü Israelrü azibarüti, langnürüti, yukharüti ko müyurü yola thsazirüti atümung dsinü yocho, “Adelü Ih dee shiko.

³ Abüdongba nührü Tsingrang-nü nührü nengdang khatajücho.

⁴ Ihnü mahchehba ko ade nying liba yuchoti yo alih nyüchürolang Jordan Yongkhi lanü nyüzüdu Mediteranean kihdi chii nührü khyang Ihnü changnah jüko.

⁵ Abüdongba nührü Tsingrang-nü nührü wüde nührütenü arüh shehsohnung ko arüh iipehjünung. Abüdongba nührü Tsingrang-nü nyengchocho kyo nührünü arüh lih khyünung.

⁶ Hütsüeko Mosa Yuzeng vakhala thrah licho lüpcho müzah bichieng. Hütsüla lango dusü tülayü

⁷ ko nührü yola pehjüba nyitsarü yola tülahrü mahkhang arüh tsingrang neng tüdangchi mahkhang yuchümde ko mübüde hütsüri neng dangchi tümübü.

⁸ Ta nührünü ade yingcheh lirocho kyo, Abüdongba te yochonyi lieng.

⁹ Nührü rode Abüdongba-nü akurahrü yuchoti iipehjücho ko nührü bete sünüsü müyachehsohcho.

¹⁰ Nührü nyüh khüdunü hajar drü tsisohcho, tunüo Abüdongba nührü Tsingrang-nü nührü nengdang khatajücho.

¹¹ Hütsüeko Abüdongba nührü Tsingrang müinung tünbüchü.

¹² Nührünü yocho mühnyi nührü yola liba yucho parü te mükhong ko arüh te kuthriyangthrikhang,

¹³ Abüdongba nührü Tsingrang-nü nührü wüde hiri yuchoti müh-iipehjünungepü nührünü müdheing. Hütsü mahpü arüh tsü nührü nengdang zeng mahkhang mütrüm ko nührü thsela xüpcho mahkhang nah la zeng zehde dhsacho kyo linung. Ko hütsü Abüdongba nührü Tsingrang-nü nührü khyang jüba alih atsa hila nührü müsükhangde linung.

¹⁴ “Adelü Ih sünung thsako. Nührü müipi lasih la ko thoh la Abüdongba nührü Tsingrang-nü nyengchocho atsa lüpcho jükopü müdhele. Abinü nyengchocho apüm yohpüko; khüdusü mütipheh.

¹⁵ Ta Abinü nyengchocho apüm yohpücho kyo, Abinü khingchibasü hütsüroh-i linung.

¹⁶ Abüdongba Tsingrang-nü mülacho azengtaba tsü nührünü müyohpükhang ko nührünü aparü tsingrang dikeh ko mübükhang, Abinü rihlong chüro nührü khingchinung ko tunyah mülipü Abinü jüba alih atsa hila nührü süsü nying mülinung.”