JOSHUA 18 - AMÜSA BAIBEL (BSI)

Alih Anyingcho Changtacho

¹ Arühnü alih tsü mahchehpü khanglang, Israelrü yucho shünü Shiloh la shimükhongcho ko hütsüla Abüdongba Shükuh khüdu thsacho.

² Adesü Israelrü hung dhünyehlü ade yingcheh arüh nohlüm alih müjüepü licho.

³ Hütsünü Joshua-nü Israelrü te yocho, “Abüdongba, nührü jümürü Tsingrang-nü nührü khyang jüba alih tsü züdu khyünung khütoi nyahli yingnung.

⁴ Hung müipi lanü nyüh asangsang throchehng. Arühnü wü alimih tsü khütoh-i khyünyürünang bongcho ronung Ihnü arüh müthehnung. Hütsüpü arühnü Ih yang thali ronung.

⁵ Alih tsü nohlüm dhünyeh kang arüh khyang changnah jünung; Juda kihjing lahpi ko Josef kihku lahpi linung.

⁶ Hiri tsü chang dhünyeh kang changnahng ko I yanglang hirung. Ko Ihnü Abüdongba Ihsa Tsingrang te nührü nengdang zii thsadhingnung.

⁷ Ta nührü yola Levirülü alih nohlüm tsü müngunung, tunüo arüh tsü Abüdongba bebürü kang dikehnungba lile. Ko Gad, Reuben, nyüchürolang Manaserülü Abüdongba dikehrü Mosa-nü arüh khyang arüh nohlüm Jordan nyüchürolang jopehko.”

⁸ Joshua-nü hütsüta arüh khyang athülaba jüpü khanglang arühnü alih tsü dhingnung shemüsucho: “Nührünü wünü alimih tsü apüm bongchopü I yanglang thali rung. Hütsüpü Ihnü Shiloh hila Abüdongba te nührü nengdang zii thsadhingnung.”

⁹ Achotsü arühnü wü alih tsü apüm jücho dhingcho ko yangditi zeh arühnü dhünyeh kang changnah thrahyohcho. Hütsüpü arühnü Shiloh la Joshua yang thalicho.

¹⁰ Joshua-nü arüh nengdang Abüdongba te zii thsadhingcho ko anyingcho hungti khyang tsü nohlüm khüdu-khüdu changnah jücho.

Benjamin Khyang Jücho Lih

¹¹ Benjamin hung tsutpu khyang alih tsü akhu jücho. Arüh lih tsü Juda ko Josef hung nyüh kahla licho.

¹² Kihku lahpi arüh lurü tsü Jordan lanü dikeh tuwü kihku lahpi alesha Jeriko chihnung ko nyüzüdulang azong lih khu Bethaven akungaselih chii linung.

¹³ Hütsülanü lurü tsü Luz alesha kihjing lahpi chihnung (Bethel püsü dsicho), hütsülanü jowü ajinglang Beth Horon khang kihjinglang Ataroth Addar chihcho.

¹⁴ Luhrü tsü hütsülanü ximüla hiba zong nyüzüdu lahpi langnü wü Juda hung yo Kiriat Baal chii licho. Hi nyüzüdulang lurü.

¹⁵ Kihjinglang lurü tsü Kiriat Jearim changka lanü dikeh wünü Neftoa Kihna chii licho.

¹⁶ Hütsülanü jowü Hinnom Ngah dhingchahchü azong jingdümpi lanü kihku lahpi Refaim Ngah chii lurü tsü licho. Ko hütsülanü kihjing lahpi Hinnom Ngah Jebus Enrogel chihcho.

¹⁷ Hütsülanü Enshemesh kihku lahpi ximüla Adumim Lang khüulang Geliloth chii licho. Luhrü tsü hütsülanü jowü Bohan Lung chii (Bohan tsü Reuben tsurü)

¹⁸ ko hütsülanü Jordan Ngah khu kihku lahpi müzing chii licho.

¹⁹ Hütsülanü Beth Hogla kihku lang angah khu wüpü licho ko Jordan Yongkhi pohyohba Asü Kihdi la kihku lahpi changnacho. Hütsü kihjing lahpi lurü thsacho.

²⁰ Nyüchürolang lurü tsü Jordan thsacho. Benjamin hung tsutpunü nguba alih lurü tsü hiri licho.

²¹ Benjamin hung tsutpu yo yangditi tsü, Jeriko, Beth Hogla, Emek Keziz,

²² Beth Araba, Zemaraim, Bethel,

²³ Avim, Para, Ofra,

²⁴ Chefarammoni, Ofni, ko Geba: mükangmüshü yangditi zeh yangdi dhüreanyüh licho.

²⁵ Adesü Gibeon, Rama, Beroth,

²⁶ Mizpa, Chefira, Moza,

²⁷ Rekem, Irpeel, Taralah,

²⁸ Zela, Haelep, Jebus (mahkhang Jerusalem), Gibea ko Kiriat Jearim: arüh mükang yangdi yohnü yangdi dhüremüyü thsacho. Benjamin tsutpunü nguba alih tsü hi thsacho.