JOSHUA 17 - AMÜSA BAIBEL (BSI)

Nyüzüdulang Manase

¹ Jordan nyüzüdulang alih nohlüm khüdu Josef tsurü aziba Manase chahnü trahchochoti khyang khasah jücho. Gilead au Makhir tsü Manase tsurü aziba ko rothsarü yola akurahrü thsacho, achotsü Jordan nyüchürolangthring Gilead ko Bashan tsü abi khyang jücho.

² Nyüzüdu lahpi alih tsü Manase tsutpu anyingchoti: Abiezer, Helek, Asriel, Shekem, Hefer, ko Shemida hiri khyang jücho. Hiri tsü Josef tsurü Manase chahnü trahchochoti adhrerüti lile, ko arüh tsü tsutpu michah athahti licho.

³ Manase tsurü Makhir, abi tsurü Gilead, abi tsurü Hefer, abi tsurü Zelofehad chahnü khingkurü chah khu adhrerü süsü mülicho. Khingkurüti neng tsü Mala, Noa, Hogla, Milka ko Tirza licho.

⁴ Arühnü bebürü Eleazar ko Nun tsurü Joshua ko azibarü yanglang wü jünirü adhrerüti khyang alih nohlüm-o jünung Mosa khyang amülaba jüko. Hütsünü Abüdongba-nü mülacho kyo, arüh khyang arüh jünirü adhrerüti yola zeh alih tsü jücho.

⁵ Hütsü khu Manase Jordan nyüchürolang Gilead ko Bashan chah lahkeh nohlüm dhüre ngucho,

⁶ tunüo abi chahnü trahchochoti khingkurü adhrerü apüm nohlüm ngucho. Gilead lih tsü Manase chahnü trahchocho aparü khyang jücho.

⁷ Manase lurü tsü Shekem nyüchürolang Asher lanü Mikmethath chii licho. Hütsülanü kihjing lahpi jowü Entappuarü chii zehcho.

⁸ Tapua mükang lih tsü Manase yo thsacho, ta lurü la Tapua yangdi tsü Efraim trah yo thsacho.

⁹ Hütsülanü lurü tsü jowü Kana yongkhi chihcho. Yongkhi kihjing lahpi yangditi tsülü Manase lih la thsanye Efraimrü yo thsacho. Manase lurü tsü yongkhi kihku lahpi tsü iiwünung ko Mediteranean kihdi la changkacho.

¹⁰ Mediteranean Kihdi tsü arüh nyüzüdulang lurü thsapü, kihjing lahpi Efraim ko kihku lahpi Manase licho. Asher tsü nyüzüdu-kihku lahpilang ko Isakar tsü nyüchüro-kihku lahpilang licho.

¹¹ Isakar ko Asher lih la Manase mükangmüshü liba yangditi Dor (Kihbekhüm lang), Endor, Tana, Megido ko mükangmüshü liba yangditi zeh Beth Shan ko Ibleam zeh khyücho.

¹² Ta Manaserünü hütsüri yangditila lirü tsü mükoh iipehcho, hütsünü Kanan-rü hütsüla mütozah licho.

¹³ Israelrü re azeh-u kangnye arühnü Kanan-rü atümunglü müh-iipehchecho, ta arühnü arüh tsü arüh dikehrü kangsohcho.

Efraim ko Nyüzüdulang Manase Alih Alaa Chingcho

¹⁴ Josef trahnü Joshua te yocho. “Tuepü ihrü khyang alih nohlüm khüdu du jücho? Abüdongba-nü müwajüchonü ihrü khütang kangko.”

¹⁵ Joshua-nü lalingcho, “Nührü drongrakhang ko Efraim lih tsü nührü nengdang zarakhang, nührünü wü Periz-rü ko Refaim-rü lih la mürong tsü tbhüpü lieng.”

¹⁶ Abinü lalingcho, “Azong lih tsü ihrü nengdang mükükyü, ta Beth Shan ko hütsü mükangmüshü lirüti ko Jezrel Ngah la lirüti Kanan-rü tsü arüh kheh la idhse nyübong akhüluba lile.”

¹⁷ Hütsüde Joshua-nü Efraim ko nyüzüdulang Manaserü te yocho, “Ajüje nührü adronge, ko nührü dee rezehle. Nührülü nohlüm khüdu chah alaa ngunung.

¹⁸ Azong lih tsü nührü yo thsanung. Hütsü mürong thsanye, nührünü hütsü khüulangnü-khüulang chii tbhüpü khyüng. Kanan-rü tsülü arüh idhse nyübong akhüluba linye mahkhang arüh athrungrü thsanye, nührünü iipehchehnung.”