JOSHUA 14 - AMÜSA BAIBEL (BSI)

Jordan Nyüzüdu Lahpi Alih Changtacho

¹ Hila jüba hi Jordan nyüzüdu lahpi Kanan lih Israelrü khyang changta jücho ngusohre. Hütsü bebürü Eleazar, Nun tsurü Joshua ko Israel hung la azibarütinü changnah jücho.

² Abüdongba-nü Mosa te mülacho kyo, nyüzüdu lahpi Jordan la liba ahung dükupü achangsho khyang alih tsü zii thsadhingnü changta jücho.

³ Mosa-nü nyüchüro lahpi Jordan la alih tsü ahung anyüpü achangsho khyang jopehpü licho. (Josef trah tsü hung anyüh kangcho: Manase ko Efraim.)

⁴ Mosa-nü Levirü khyang alih müjücho. Ta arüh khyang misü ko san nengdang alih zehpü arüh linung yangditi jücho.

⁵ Israelrünü alih tsü Abüdongba-nü Mosa te mülacho roh-i du changtacho.

Hebron tsü Kaleb khyang jücho

⁶ Nyümong khüdu Juda hung lanü nyitsarü khürü Gilgal la Joshua yang rocho. Arüh yola nyüh khüdu Keniz-rü Jefune tsurü Kaleb-nü abi te yocho, “Kadesh Barnea la Abüdongba-nü Tsingrangba nyitsarü Mosa te Ihjü nengdang tu yocho nühnü müdhele.

⁷ Abüdongba dikehrü Mosa-nü Kadesh Barnea lanü alih hi chehdhingnung müthehde Ih kang yüre azirü thsacho. Ihnü abi yang yuje yusi hirojücho.

⁸ Ta I yola würü nyitsarütinü Ihsa nyitsarü drüsohcho. Ta Ihnü I Tsingrang Abüdongba yu yujecho nyicho.

⁹ Ihnü hütsüta nguchichongang, Ihnü bongkhu tsiba lih hilü Ih ko I shümtsurü khyang jünungepü Mosa-nü Ite nyengchocho.

¹⁰ Ta ade dhing, Abüdongba-nü Mosa te hütsü yopü adelü kang yürepü münga role. Hütsü Israelrü akungaselih khu tside ko Abüdongba-nü nyengchocho kyo, ade yingcheh I akang yohpüjüle. Ih dhing!

¹¹ Ih kang qurepü münga azirü lile, ta Mosa-nü Ih müthehde akyokyo chünye tizah rezeh lile. Ih adesü khata mahkhang apa nguchi nengdangsü rezeh lile.

¹² Hütsüeko ade, Ih ko I shangrütinü yusi jüba nyümong Abüdongba-nü nyengchoba akhang lih tsü I khyang jüng. Hütsütade ihrünü Anakim-rü tsü yangdi tbü pohki lilepü yusi jücho. Abüdongba Ite zehkhang, abinü yocho kyo, Ihnü arüh tsü iipehchehnung.”

¹³ Joshua-nü Jefune tsurü Kaleb tsü müwajücho ko abi khyang Hebron yangdi tsü jücho.

¹⁴ Ade yingcheh Hebron tsü Keniz-rü Jefune tsurü Kaleb trah yo lile, tunüo abinü yuje cho Israel Tsingrang Abüdongba yochonyicho.

¹⁵ Hi mah-ede Hebron tsü Arba pü dsicho (Arba tsü Anakim-rü yangdi yola adiuba licho.) Adelü hütsüla yangtsa licho.