JOSHUA 13 - AMÜSA BAIBEL (BSI)

Adesü Khyünung licho Alih

¹ Adelü Joshua dee azirü kangcho. Abüdongba-nü abi te yocho, “Nüh dee shiko, ta adesü alih akhyünung adrong lile:

² Filistia ko Geshur lih apüm,

³ ko kihjing lahpi Avim lih. (Ijiprü lurü la Shihor yongkhinü khapü kihku lang Ekron lurü chii Kanan-rü khichicho; Filistiarü yangthsarüti Gaza, Ashdod, Askelon, Gath ko Ekron la lirüti.)

⁴ Kanan-rü lih adesü lile ko Meara (Sidon-rü yo), Amor-rü lurü la Afek chii;

⁵ Gebal-rü lih, nyüchürolang Lebanon apüm, Hermon Zong kihjinglang Baalgad lanü Hamath Lahkhu chiinü.

⁶ Hila Lebanon Zong ko Misrefot Maim kahla liba akhang nyitsarü Sidon-rü lih apüm zehle. Israelrü ro chihde Ihnü hiri nyitsarü apüm iipehnung. Ihnü nüte yocho kyo, nühnü alih tsü Israelrü khyang changjüng.

⁷ Hütsüeko ade, alih tsü hung düku ko Manase hung changsho-o khyang arüh yo thsanung changta jüng.”

Jordan Nyüchürolang Alih changtacho

⁸ Reuben ko Gad ko Manase hung achangsholü Abüdongba dikehrü Mosa-nü alih tsü jopehpü licho; hütsü Jordan Yongkhi nyüchürolang lile.

⁹ Arüh lih tsü Aroer chii lile (Arnon Ngah müdsuo lang) ko hütsü ngah la yangdi ko Medeba lanü Dibon chizah lile.

¹⁰ Hütsü Amon lurü chii ko Heshbon la yangthsaba Amor-rü yangthsaba Sidon-nü yangthsathsaba yangditi apüm zehcho.

¹¹ Hütsüla Gilead, Geshur ko Maaka mükyah, Hermon Zong apüm ko Saleka chii Bashan apüm zehcho.

¹² Hütsüla Refaim achangkaba Ashtarot ko Edrei la yangthsaba Og yanglih zehcho. Mosa-nü hiri nyitsarü kohchehpü iipehcho.

¹³ Ta, Israelrü Geshur-rü ko Maaka-rü mü-iipehcho; arüh Israel la ade yingcheh lile.

¹⁴ Mosa-nü Levi hung khyang alih müjü. Abüdongba-nü Mosa te yocho kyo, arühlü Israel Tsingrang Abüdongba khyang kangmübü jücho la arüh nohlüm khüdu ngunung.

Reuben khyang jücho Lih

¹⁵ Mosa-nü arüh kukhi aichi Reuben hung khyang alih nohlüm-o arüh yo thsanung jücho.

¹⁶ Arüh lurü tsü Aroer chii licho (Arnon Ngah müdsuo lang) ko angah longla yangdi ko Medeba ngah apüm zehcho.

¹⁷ Hütsüla Heshbon ko angah la yangditi apüm: Dibon, Bamoth Baal, Beth Baalmeon,

¹⁸ Jahaz, Kedemot, Mefat,

¹⁹ Kiriathaim, Sibma, Zereth Shahar,

²⁰ Beth Peor, Pisga Zong ngah ko Beth Jeshimoth hiri zehcho.

²¹ Hütsüla angah la yangditi apüm ko Heshbon la yangthsaba Amor-rü yangthsarü Sihon yanglih apüm zehcho. Mosa-nü abi ko Midian-rü yangthsarüti: Evi, Rekem, Zur, Hur ko Reba hiri kohchehcho. Arüh atümungnü yangthsaba Sihon nengla yangthsacho.

²² Israelrünü kyüsehrü yola Beor tsurü amüchehrü, Balaam-sü zehcho.

²³ Jordan tsü Reuben hung nyüzüdulang lurü thsacho. Yangdi hiri tsü Reuben hung khyang arüh yo thsanung jücho.

Gad Khyang Jücho Lih

²⁴ Mosa-nü Gad hung khyangsü arüh kukhi aichi alih nohlüm arüh yo thsanung jücho.

²⁵ Arüh khyang jübala tsü Jazer ko Gilead la yangditi apüm, Amon lih achangsho Raba nyüchürolang Aroer chii;

²⁶ arüh lih tsü Heshbon lanü Ramat Mizpe ko Betonim, Mahanaim lanü Lodebar lurü chii licho.

²⁷ Jordan Ngah la Beth-Haram, Bethnimra, Sukot ko Zafon, Heshbon la yangthsaba Sihon yanglih achangsho zehcho. Arüh lurü nyüzüdulang tsü Jordan yongkhi lanü Galil kihdi chiinü licho.

²⁸ Hiri yangditi tsü Gad hung khyang arüh yo thsanung jücho.

Nyüchürolang Manase khyang jücho Lih

²⁹ Mosa-nü Manase hung changsho khyang arüh kukhi aichi alih nohlüm arüh yo thsanung jücho.

³⁰ Arüh khyang jübala tsü Mahanaim ko Bashan apüm Og yanglih apüm, Bashan yangthsaba ko Bashan la Jair yangdong rohre zehcho.

³¹ Hütsüla Gilead changsho ko Bashan la Og yanglih yangditi Ashtarot ko Edrei zehcho. Hi apüm tsü Manase tsurü Makhir trah achangsho khyang jücho.

³² Hütsüta Mosa-nü abi Moab ngah la liyade, nyüchürolang Jeriko ko Jordan tsü changta jücho.

³³ Ta Mosa-nü Levi hung khyanglü alih müjü. Arühlü Israel Tsingrang Abüdongba khyang mübücho la changsho tsü arüh nohlüm thsanung abinü arüh te yocho.