JOSHUA 11 - AMÜSA BAIBEL (BSI)

Joshua-nü Jabin ko Abi Tsungphungrü Kohchehcho

¹ Khode Hazor la yangthsabanü Israelrü akoh nengdang tsü yuchicho, abinü Madon yangthsaba Jobab, Shimron ko Akshaf yangthsarüti,

² ko kihku lahpi azong limih yangthsarüti, ko azong jingdümpila lirü ko Galil kihdi kihjing lahpi Jordan Ngah la lirüti ko Dor kihbekhümla lirüti yang yu jücho.

³ Abinü Jordan khüu-khüulang lirü Kanan-rü, Amor-rü, Hit-rü, Periz-rü ko azong lih la lirü Jebus-rü ko Mizpa lih la Hermon zong jingdümpila lirü Hiv-rü tesü yu tsü jücho.

⁴ Arühnü arüh rothsarü apüm kihbekhümla lihpi toi nüpü rocho. Arühnü kuri ko nyübong akhülubasü adrong nücho.

⁵ Hiri yangthsarü apümnü lümchung khüdu thsapü Israelrü nyüm khatanung Merom yongna la shibülungcho.

⁶ Abüdongba-nü Joshua te yocho, “Arüh tüdrü. Atu hitadelü Israelrü nengdang Ihnü arüh apüm kyüsehnung. Nührünü arüh kuriti mükhong lejüng ko arüh nyübong akhüluba trüp-pehjüng.”

⁷ Hütsüta Joshua ko abi nyitsarütinü Merom yongna la dhrongyengnü arüh mahcho.

⁸ Abüdongba-nü Israelrü khyang arüh michah akoh ngusohcho; ko Israelrünü arüh kihku lahpi Misrefot Maim ko Sidon ko nyüchürolang Mizpa angah chii mahnü iiwücho. Khata tsü apüm mükyüsehkhangde khatacho.

⁹ Abüdongba-nü mülacho kyo Joshua-nü arüh chah nguchicho: abinü arüh kuriti mükhong lejücho ko arüh nyübong akhüluba trüp-pehjücho.

¹⁰ Hütsüpü Joshua-nü thali ro Hazor kohcheh yangthsaba kyüsehcho. (Hütsü bekhyah Hazor tsü hütsüri yangdi yola re azeh-uba licho.)

¹¹ Arühnü Hütsüla lirü apüm süsohcho ko yangdi tsü trüp-pehjücho.

¹² Abüdongba dikehrü Mosa-nü mülacho roh-i, Joshua-nü yangditi arüh yangthsarüti apüm kohcheh nyitsarü apüm changsohcho.

¹³ Ta Hazor chah khu, Israelrünü azongchah liba yangdi khüdusü mütrüpjücho.

¹⁴ Israelrünü hiri yangditi lanü thsidi kohro ko akang apüm khyücho. Ta nyitsarülü apüm süsohcho.

¹⁵ Abüdongba-nü Abi amülabati Abi dikehrü Mosa khyang jücho ko Mosa-nü hütsüri Joshua khyang jücho ko Joshua-nü hütsüri bichicho. Abüdongba-nü Mosa te yocho lüpcho abinü nguchicho.

Joshua-nü Khyücho Limih

¹⁶ Joshua-nü alih apüm, akhanglih kihku lahpi ko kihjing lahpi, Goshen mükyah apüm ko hütsü kihjing lahpi akung limih ko Jordan ngah zeh khyücho.

¹⁷ Lurü tsü kihjing lahpi Edom amünyeh Halak zong lanü kihku lahpi Lebanon ngah la Hermon Zong kihjing lahpi Baalgad chii licho.

¹⁸ Joshua-nü hiba lih yangthsarüti te shikhe asheng khatacho, ta abinü kohcheh arüh apüm süsohcho.

¹⁹ Israelrü te yangtsa külüp liba limih tsü Hiv-rü khürü zeh liba Gibeon limih du thsacho. Apa apüm tsü khatala kohchehcho.

²⁰ Arüh achomang müli riri changsoh Israelrü te khatanung Abüdongba-nü arüh thsüchicho. Hi Mosa te Abüdongba-nü mülacho licho.

²¹ Hütsü shikhe Joshua-nü Anakim-rü licho azong Hebron, Debir, Anab, Juda ko Israel hiri mahchehcho. Joshua-nü arüh ko arüh yangditi apüm changjücho.

²² Israel lih la Anakim-rü tsü khüdusü münyingcho, ta Gaza, Gath ko Ashdod la azikyah nyingcho.

²³ Abüdongba-nü Mosa te mülacho roh-i, Joshua-nü alimih tsü apüm khyücho. Joshua-nü Israelrü khyang arüh yo thsanung ahung-ahung khyang changta jücho. Hütsükolü müyurüti khata lanü kyahshangcho.