JOSHUA 10 - AMÜSA BAIBEL (BSI)

Amor-rü Mahchehcho

¹ Jerusalem la yangthsaba, Adonizedek-nü Jeriko ko abi yangthsaba chah nguchicho kyo Joshua-nü Ai riri kohcheh changsoh abi yangthsaba zeh kyüsehcho yuchicho. Adesü Gibeon-rünü arüh te yangtsa külüp arüh yola lilepü abinü yuchicho.

² Hütsü khu Jerusalemrü khütang nehcho, tunüo Gibeon tsü yangthsarü liba apa yangdi toh-i amülah licho; hütsü Ai tenü adiu ko athrungrü adrong licho.

³ Achotsü Adonizedek-nü Hebron yangthsaba Hoham, Jarmut yangthsaba Piram, Lakish yangthsaba Jafia ko Eglon yangthsaba Debir yang yusi müthehcho:

⁴ “Gibeon mahnung ro Ih troung, tunüo arühnü Joshua ko Israelrü te yangtsa külüpko.”

⁵ Hütsüde hiri Amor-rü yangthsarü münga Jerusalem, Hebron, Jarmut, Lakish, ko Eglon yangthsarüti tsungphung khüdu thsapü Gibeon mükangti mahcho.

⁶ Hütsüde Gibeon-rünü Gilgal la Joshua yang yu jücho: “Adirü, ihrü khümchoung! Akhang lih la Amor-rü yangthsarüti apüm tsungphung khüdu thsapü ihrü mahle.”

⁷ Achotsü Joshua ko abi rothsarü apüm akurahrüti zeh Gilgal lanü shemüsucho.

⁸ Abüdongba-nü Joshua te yocho, “Arüh tüdrü. Ihnü nü khyang akoh tsü jopehko. Arüh sünüsü nü bete müyachehnung.”

⁹ Müyüp Joshua ko abi rothsarü Gilgal lanü Gibeon yang wücho ko arühnü dhrongyengnü Amor-rü tsü becho.

¹⁰ Israelrü ngu Abüdongba-nü Amor-rü khyang drüsohcho. Israelrünü Gibeon la arüh kingthrümcho ko Beth Horon zong khu kihjinglang Azeka ko Makeda chii iijowücho.

¹¹ Amor-rü tsü Israel rothsarü tenü drü jowüde, Abüdongba-nü Azeka lang ayung arüh chah shurü sühsohcho. Israelrünü kyüsehcho tenü shurünü adrongu kengsehcho.

¹² Abüdongba-nü Amor-rü michah Israelrü khyang akoh ngusoh nyümong, Joshua-nü Abüdongba te chotacho. Israelrüti betenü abinü yocho, “Nyü, Gibeon khu tütsi; Chonu, Aijalon Ngah üde nyehlieng.”

¹³ Arühnü arüh rorüh mükohyingcheh nyünü yingcho ko chonunü mümühachicho. Hi Jashar Vakha la thrah lile. Nyünü ningwümla mümühachi yingcho ko mükhyang müzüducho.

¹⁴ Papadesü ko akhanglangsü Abüdongba-nü amüi tsurü yu nyicho khodesü mütikehdhing. Abüdongba-nü Israelrü khüm khatajücho!

¹⁵ Hütsüpü, Joshua ko abi rothsarütinü arüh lichah Gilgal lang thalicho.

Joshua-nü Amor-rü Yangthsarü Münga Kohcho

¹⁶ Ta Amor-rü yangthsarü münga tsü tsicheh wü Makeda lungkoh la rang pümcho.

¹⁷ Khürünü hütsü ngucho ko Joshua te yocho.

¹⁸ Abinü yocho, “Lungkoh bekhümla tsü lung arangchüchehnü dhitieng ko khürünü nyahng,

¹⁹ ta nührülü hütsüla tüpüm. Nührünü arorüh tsü iiwü arüh khanglangnü being; arüh tsü arüh yangditi tüchihsoh! Nührü Tsingrang Abüdongba-nü nührü khyang akoh tsü jüko.”

²⁰ Joshua ko abi nyitsarütinü arüh yangdi tbükhüm pohki tsiyoh rangrü khürü chah khu adrongu kyüsehcho.

²¹ Hütsüpü Joshua nyitsarüti apüm khümcho arüh lichah Makeda yang thali rocho. Hütsükolü sünüsü Israelrü nyüm yunü mii müchocho.

²² Hütsüpü Joshua-nü yocho, “Lungkoh tsü khangthrung ko yangthsarü arüh münga tsü I yanglang norung.”

²³ Achotsü arühnü lungkoh tsü khangthrucho ko Jerusalem, Hebron, Jarmut, Lakish ko Eglon yangthsarüti tsü Joshua yanglang norocho.

²⁴ Hütsüpü Joshua-nü Israel müyurü apüm abi yanglang dsicho ko abi yola würü anüchirüti te ro yangthsarüti hong la arüh jingnü jükeh yanung yuzengjücho, ko arühnü hütsüta nguchicho.

²⁵ Hütsüpü Joshua-nü arüh te yocho, “Tüdrü mahkhang müci tüsüm. Rezehng ko longlang, tunüo nührü rorüh apüm te Abüdongba-nü hita nguchinung.”

²⁶ Hütsüpü Joshua-nü yangthsarüti tsü kyüsehcho ko singdong münga chah arüh me tsü anyüzehlang yingcheh tbengpücho.

²⁷ Nyü züdude Joshua-nü arüh me tsü dhicho arüh rang pümba lungkoh la tsü dhiyohchüpehnung yuzengjücho. Lung arangchehnü lungkoh tsü dhiticho ko hütsü chünye yingcheh lile.

Joshua-nü Amor-rü Lih alaa Khyücho

²⁸ Joshua-nü hütsü nyümong Makeda mahcho ko yangthsabasü kohchehcho. Yangdila tsü abinü süsü münyingpü kyüsehkhangcho. Abinü Makeda yangthsaba chahsü Jeriko yangthsaba te nguchicho kyo ngucho.

²⁹ Hütsüpü, Joshua ko abi rothsarüti Makeda lanü Libna mahnung wücho.

³⁰ Abüdongba-nü hiba yangdi ko yangthsaba michahsü akoh jücho. Arühnü hütsüla süsü münyingpü kyüsehcho. Arühnü Jeriko yangthsaba chahsü nguchicho.

³¹ Hütsüpü, Joshua ko rothsarüti Libna lanü Lakish yang wücho ko hütsü bee mahcho.

³² Abüdongba-nü Israelrü khyang nyümong anyüula Lakish-rü michah akoh jücho. Ko Libna la nguchicho kyo arühnü yangdila tsü süsü münyingpü kyüsehcho.

³³ Gezer la yangthsaba Horam-nü Lakish-rü tronung rocho, ta Joshua-nü abi ko abi nyitsarüti khüdusü münyingpü kyüseh kohcho.

³⁴ Hütsüpü Joshua ko abi rothsarütinü Lakish lanü Eglon lang wücho ko hütsü bee mahcho.

³⁵ Ko hütsü nyümongnü hütsü mahcheh Lakish la nguchicho kyo arüh apüm kyüsehcho.

³⁶ Hütsüpü Joshua ko abi rothsarütinü Eglon lanü Hebron zong chii küducho ko hütsü bee mahcho.

³⁷ Arühnü yangdila yangthsaba ko müyurüti ko hütsü mükang yangditi mii zeh khyücho. Joshua-nü Eglon chah nguchicho kyo yangdi tsü riri changsohcho. Hütsüla khüdusü münyingpü changsohcho.

³⁸ Hütsüpü Joshua ko abi rothsarütinü thali ro Debir mahcho.

³⁹ Abinü hütsü yangthsaba ko shündhün liba yangditi zeh mahchehcho. Abinü hütsüla lirü apüm süsohcho. Joshua-nü Hebron ko Libna ko arüh yangthsarüti chah nguchicho kyo Debir chah nguchicho.

⁴⁰ Hütsüta Joshua-nü hütsü lih apüm kohchehcho. Abinü akhang limih, nyüchürolang alesha la liba ko nyüzüdulang azong jingdümpila liba ko kihjinglang lahpi akung lih la liba yangthsarüti apüm kohchehcho. Abinü khüdusü münyingpü riri changsohcho. Hi Israel Tsingrang Abüdongba-nü mülachoba licho.

⁴¹ Joshua-nü Kadesh Barnea lanü Gaza, Goshen lih apüm ko Gibeon chii kohchehcho.

⁴² Joshua-nü hiri yangthsarüti apüm ko arüh lih apüm khüdupi dhrongdenü khyücho, tunüo Israel Tsingrang Abüdongba arüh te zehcho.

⁴³ Hütsüpü Joshua ko abi rothsarütinü arüh lichah Gilgal yang thali wücho.