JONA 4 - AMÜSA BAIBEL (BSI)

Jona Rihlong ko Tsingrangba Yanglilüm

¹ Hi shulüm Jona-nü khütang mükünyangcho ko zichürocho.

² Achotsü abinü yocho, “Abüdongba, Nühnü hita nguchiririepü müshemüsuedenü Ihnü müyocho do? Hütsü khyanglangnü I nengdang Tarshish lang rangkhu tsinung tsü atsauba thsacho. Nüh amüi ko yanglilüm Tsingrang, lede arangcho, lede atsa, ko lede lasih thsamüla, akhingchi müjüba Tsingrangepü Ihnü müdhele.

³ Abüdongba ade Ih süsohng. Ih akang linung tenü sücho atsaue.”

⁴ Abüdongba-nü yocho, “Nüh wahnung tu licho?”

⁵ Hütsüde Jona-nü yangdi lanü nyüchüro lahpi chüdunü pümcho. Abinü mütpahvi khüdu kyükeh, ko Nineve chah tu tikehnang pü hütsü khümki lanü dhing pümcho.

⁶ Hütsüde Abüdongba Tsingrang-nü Jona khümki alaa tbachisohnung abi khu shinga-shü khüdu zisohcho. Hiba ashü nengdang Jona dee künyang licho.

⁷ Ta nyangnyü khüu Tsingrangba-nü mülajü kangzah khüdunü hiba ashü chah lehcho, ko hütsü sopehcho.

⁸ Nyü chüroko khanglang, Tsingrangba-nü nyü chüro lahpinü nyübong adhsa müthehcho, ko nyü tahba tsünü abi thah chah hekehde abi sümüphohcho. Hütsünü abinü sünyo lümcho. Abinü yocho, “Ih akang licho tenü sücho atsau.”

⁹ Ta Tsingrangba-nü abi te yocho, “Hiba ashü nengdang nüh wahnung tu licho?” Jona-nü lalingcho, “Ih süto wahnung athsalang!”

¹⁰ Abüdongba-nü abi te yocho, “Hiba ashü romang khüdu lanü zicho ko nyümong khüu sopehcho: Hütsü nengdang nühnü tu münguchi, nühnü hütsü müzisoh, ta müi lümre.

¹¹ Khang, Nineve yangdi hütsütoh-i arangcheh, achomükeh müyurü lakh khüdupü hajar mükyü mihlang ko kanglungrü khütang liba tsü mümüinung do.”