JONA 2 - AMÜSA BAIBEL (BSI)

Jona Dangkhidangnang

¹ Nguh mi lanü Jona-nü Abüdongba abi Tsingrang te dangkhidangnangcho.

² “O Abüdongba, I chongchala Nüte dsicho, ko Nühnü lalingcho. Asü lih lanü Ihnü züdecho, ko Nühnü yuchicho.

³ Nühnü kih yonglang asoh la Ih dhiyohchücho, ko kihmülüm ko adrünung kihlohnü I michah mülümphacho.

⁴ Nü tenü Ih iipehpehko ko Nü Amüsa kuh khodesü müngunungepü Ihnü lümcho.

⁵ I michah kih pohcho ko I sahmüchehcho; Kihdinü mülümphacho, ko lihxühnü Ih yühticho.

⁶ Azong achidi, khüi lede nengdang trahtri khangtipehcho hütsü chii Ih jowücho. Ta Nüh, O Abüdongba I Tsingrang, Nühnü hiba shukuh lanü Ih nüli roko.

⁷ Khode I akang trühcho tsicho, O Abüdongba, Ihnü Nüte dangkhidangnangcho; ko Amüsa kuh lanü Nühnü yuchicho.

⁸ Amii müliba kyothri mübürünü Nüte yocho mühnyire.

⁹ Ta Ihnü Nüh yang nengsekhi thsanung; Ihnü Nü khyang kangmübü jünung ko anyengchocho nguchinung. Akangcheh Abüdongba chahnü rore.”

¹⁰ Hütsüde Abüdongba-nü kihbekhümla Jona mülüchehchünung nguh khyang yuzengjücho ko hütsüta tikehcho.