JOHAN 6 - AMÜSA BAIBEL (BSI)

Nyüh Hajar Münga Yangtüpcho

¹ Hütsüpü Jisu Galil kihdi keh tsicho (Tiberia kihdi püsü dsire)

² Ko amülung amülah abi khanglang iiwücho, tunüo füdhsarü chah abinü tu thsayahiya nguchicho hütsü arühnü ngucho.

³ Jisu-nü azonglang tuwücho ko amonoti yola pümcho.

⁴ Ade Phungkhu Thsüti shikhe chii rocho.

⁵ Jisu-nü dhingmükangde amülung amülah abi yang rocho ngu Filip te yocho, “Nyitsarü hitoi yangtüpnung Ihsanü tsuyongnung khüdenü lihnung?” (

⁶ Abinü hi Filip thsadsüdhingnung yocho; amalü tu nguchinung abinü müdhecho.)

⁷ Filip-nü lalingcho, “Nyitsarü müipi azikyükyah du jehnye denari thsih anyünü mii mükükyünung.”

⁸ Mono yola khüdu, Simon Peter ani Andreu-nü yocho,

⁹ “Hila azarü khüdu kheh la lüdi hümdhse münga ko nguh anyüh lile. Ta nyitsarü hitoi nengdang hütsü tushi müthsanung.”

¹⁰ Jisu-nü arüh te yocho, “Nyitsarüti tsü pümsohng.” (Hütsüla zanu khütango licho.) Achotsü nyitsarü atümung pümcho; adhrerü dunü nyüh hajar müngao thsacho.

¹¹ Jisu-nü hümdhse tsü bipü Tsingrangba khyang anengse jücho, ko hütsüla pümrüti khyang chahla jücho. Abinü nguh tsüsü hütsüta chahla jücho, ko arüh atümung thangchi tsucho.

¹² Khode arüh mi jengcho, abinü amonoti te yocho, “Anyingcho tsü throbülung; Ihsanü tusü mümüzangnung.”

¹³ Achotsü arühnü hütsüri throbülungcho, ko lüdi hümdhse münga lanü tsupü anyingcho nümnümdada loh dhüreanyüh jengcho.

¹⁴ Jisu-nü nguchicho thsayahiya hi ngu, hütsüla nyitsarütinü yocho, “Limih lang aronung liba azikehrü tsü yuje hivie!”

¹⁵ Arühnü ro abi rangpü khingnü arüh yangthsarü kangsohnung licho tsü müdhe apu jangjang azonglang thali tuwücho.

Kih Michah Tsehcho

¹⁶ Nyüzeh rode, amonotinü kihdi lang jowü

¹⁷ kihtang khüdula züducho, ko Kapernaum lang thali kihdi tsü kehnü wücho. Mapehcho, ta Jisu arüh yanglang müroecho.

¹⁸ Hütsüdelü nyübong amülah fonü kihmülüm chüro yacho.

¹⁹ Monoti tsü lutri münga dhüroh wüko khanglang Jisu kih michah tsehnü kihtang amünyethsa rocho arühnü ngucho, ko arüh drüsehcho.

²⁰ Jisu-nü arüh te yocho, “Ih-e! Tüdrü.”

²¹ Hütsüpü du arühnü künyang kihtang la nüyohcho, ko hütsüde tsünü arühnü chihnung liba lih tsü kihtang tsünü chihcho.

Nyitsarünü Jisu Yangchicho

²² Nyümong khüu kihkehlang pehjüba sühdi tsünü hütsüla kihtang khüdu licho lümchehcho. Jisu tsü amonoti yola müzehpü arüh müleng tsichoepü arühnü müdhecho.

²³ Abüdongba-nü anengse jüpü sühdinü hümdhse tsuba müdüm shündhün Tiberia lanü kihtang khürü rocho.

²⁴ Khode sühdi tsünü hütsüla Jisu ko amonotisü müzeh pü müdhecho, arühnü kihtangti la tsü züdu abi yangchi Kapernaum lang wücho.

Jisu Akang Tsuyongnung

²⁵ Khode kihkeh khüulang arühnü Jisu ngucho, arühnü abi te yocho, “Adorü, nüh hila khode ro chihcho?”

²⁶ Jisu-nü lalingcho, “Ihnü nührü te yutsatsa yore: nührünü thsayahiya nyichehchonü mah, ta hümdhse mi jeng tsuxah tsuchonü Ih yangchire.

²⁷ Sühtpah pehba tsuyongnung nengdang tünguchi, ta müchangkaba akang tsuyongnung nengdang nguching. Hiba tsuyongnung tsü Nyitsarü Tsurünü nührü khyang jünung, tunüo Au Tsingrang-nü abi chah akhyüchoba amüdhethsa shingkehjüko.”

²⁸ Achotsü arühnü abi te tsingdhingcho, “Tsingrangba-nü lümcho nguchinung tsü Ihrünü tu nguchibao?”

²⁹ Jisu-nü lalingcho, “Tsingrangba-nü müthehba chah yudsinung tsü abinü nguchisohnyüba tsü lile.”

³⁰ Achotsü arühnü abi te yocho, “Ihrünü ngupü yudsinungthsa nühnü tu thsayahiya nguchinung? Nühnü tu nguchinung?

³¹ Ihrü jümürünü lipilih la manna tsucho; amüsa yunü yocho kyo, ‘Abinü arüh khyang ninglangnü atsunung jücho.’ ”

³² Jisu-nü yocho, “Ihnü yutsatsa nührü te yore: Nührü khyang ninglangnü tsuyongnung jüba tsü Mosa mah; ta ninglangnü yuje tsuyongnung jüba tsü I U nüe.

³³ Tunüo sü ninglangnü jüroro ko limih khyang akang jüro, hütsü Tsingrangba-nü jüba tsuyongnung tsü lile.”

³⁴ Arühnü abi te tsingdhingcho, “Abüdongba, hiba tsuyongnung ihrü khyang müsüla khülo.”

³⁵ Jisu-nü arüh te yocho, “Akang tsuyongnung tsü Ih, sü I yanglang ronang abi khodesü müyangnung; ko sünü I chah yudsinang abi khodesü müxonung.

³⁶ Nührünü Ih nguko, ta müyudsinungepü Ihnü nührü te yoko.

³⁷ I U-nü I khyang jürü müipi I yanglang ronung. Ko I yanglang rorüh süsü Ihnü müpehnung,

³⁸ tunüo Ipu lümcho nguchinung mah, ta I riwüsohba lümcho nguchinung nengdang Ih ninglangnü jürocho.

³⁹ I khyang jücho süsü müchahsohnung, ta achangka nyümongla arüh atümung kanglisohnung tsü I riwüsohba lümcho lile.

⁴⁰ Tunüo atsudhre ngurü ko abi chah yudsirü atümung müchangkaba akang ngunung tsü I U-nü khyünyücho lile. Ko Ihnü achangka nyümongla arüh kanglisohnung.

⁴¹ “Ih ninglangnü jürocho tsuyongnung” pü abinü yochonü Jihudarünü abi te jümjümnung dikehcho.

⁴² Hütsünü arühnü yocho, “Hivi hi Josef tsurü Jisu mahrü do? Au e atpa nyüh Ihsanü müdhele. Akhang abinü khüta abi ninglangnü jürochoepü yoro?”

⁴³ Jisu-nü lalingcho, “Nührübürü yola tüjümjüm.

⁴⁴ I riwüsohba Aunü I yang mütphahkhang süsü I yanglang mürocheh; ko achangka nyümongla Ihnü abi kanglisohnung.

⁴⁵ Azikehrütinü thrahcho, ‘Atümung te Tsingrangba-nü thsingyunung.’ Sünü Au te nyiro ko abi chahnü nyichoro abinü Ih yang rore.

⁴⁶ Nyitsarü khürünü Au ngukorü mah, sü Tsingrangba chahnü liro abi dunü Au nguko.

⁴⁷ Ihnü yutsatsa nührü te yore: Sünü yudsiro abi müchangkaba akang lile.

⁴⁸ Ih akang tsuyongnung tsü.

⁴⁹ Nührü jümürünü lipilih la manna tsucho, ta arüh sücho.

⁵⁰ Ta ninglangnü jüroba tsuyongnung tsülü sünü hütsü tsunang müsünung.

⁵¹ Ninglangnü jüroba akang tsuyongnung tsü Ih. Khürünü hiba tsuyongnung tsukhang, abi lede akang linung. Ihnü jünung tsuyongnung tsü Ipu shuh, khüi limih akang linung nengdang Ihnü jüre.”

⁵² Hi khu arüh yola yujita chürocho. Arühnü tsingdhingcho, “Hiba nyitsarünü khüta Ihsa khyang apu shuh atsunung jünung?”

⁵³ Jisu-nü yocho, “Yutsatsa Ihnü nührü te yore: Nührünü Nyitsarü Tsurü shuh mütsukhang ko abi shüh müyongkhang, nührübürü chah akang mühle.

⁵⁴ Sünü I shuh tsuro ko I shüh yongro abi müchangkaba akang lile, ko achangka nyümongla Ihnü abi kanglisohnung.

⁵⁵ Tunüo I shuh yuje atsuba; ko I shüh yuje ayongba.

⁵⁶ Sünü I shuh tsuro ko I shüh yongrü abi I chah lire, ko Ih abi chah lire.

⁵⁷ Akang liba Aunü Ih rosohcho, ko abi khu Ihsü lire. Hütsü kyo sünü Ih tsuro, Ih khu abi akang linung.

⁵⁸ Hütsünü, hiba hi ninglangnü jürocho tsuyongnung; nührü jümürünü tsupü akhanglang süba tsuyongnung roh-i tsü mah. Sünü hiba tsuyongnung tsunang abi lede akang linung.”

⁵⁹ Jisu-nü hi Kapernaum la Sinagog la dode yocho.

Müchangkaba Akang Yu

⁶⁰ Amono adrongnü hi yuchi yocho, “Adoba hilü sohrale. Sünü hi nyichehnung?”

⁶¹ Müyoe, hütsü nengdang jümjümrepü Jisu-nü richeh ngu arüh te yocho, “Hirinü nührü müthikehsohrü mah-o?

⁶² Akhang Nyitsarü Tsurü abi akhudi licholang tuwüchi ngurelang khüta?

⁶³ Akang jüba tsü Tsingrangba Anbü lile; shutsalü amükang. Ihnü nührü te yoba yu tsü anbü ko akang lile.

⁶⁴ Ta nührü yola khürünü müyudsire.” (Adikeh lanü sürünü müyudsinung ko sünü abi kihyochüjünung Jisu-nü müdhejung licho.)

⁶⁵ Ko abinü yocho, “Hitacho khu, Aunü mümülakhang sünüsü I yang mürochehnungepü Ihnü nührü te yoko.”

⁶⁶ Hütsü khu, Jisu mono adrong abi yola müwüpü thali tsipehcho.

⁶⁷ Achotsü abinü mono dhüreanyüh te tsingdhingcho. “Nührüsü tsipehnyürü mah-o?”

⁶⁸ Simon Peter-nü abi te lalingcho, “Abüdongba, ihrü sü yang wünung? Müchangkaba akang yu jüba nü chah lile.

⁶⁹ Ko nüh Tsingrangba chahnü rocho Amüsaba tsüepü ihrünü adelü müdhele ko yudsire.”

⁷⁰ Jisu-nü lalingcho, “Ihnü nührü dhüreanyüh müthrochehcho do? Ta nührü yola nyüh khüdu motsing lile.”

⁷¹ Abinü Simon Iskariot tsurü Judas nengdang chocho. Tunüo Judas tsü mono dhüreanyüh yola khüdu thsanye, abinü Jisu kihyochü jünungba licho.