JOHAN 5 - AMÜSA BAIBEL (BSI)

Changtphü la Kyangjücho

¹ Hütsüpü, Jisu-nü Jerusalem lang Jihudarü thsüti khüdulang wücho.

² Jerusalem la san tbükhüm müshüm, Ibri yunü Bethzatha ko dsiba pümshang münga liba, changtphü khüdu lile.

³ Pümshang la tsü füdhsarü khütango nahtohrü, jingjahrü, dsidsisürüti licho. Arüh tsü kih shühchicho yingnü licho,

⁴ (tunüo Abüdongba riwürü khüdu khüpipi changtphü la tsü jüronü kih tsü shühchijücho. Kih shühchide sü akhu kih la mütrahrangnang, tunü füdhsaro apüm kyangcho.)

⁵ Hütsüla kang sangrepü keh füdhsarü nyüh khüdu licho.

⁶ Jisu-nü abi hütsüla yüpjocho ngu ko abi hütsütoi nyahli füdhsacho müdhe, abinü abi te tsingdhingcho, “Nüh kyangnyürü mah-o?”

⁷ Füdhsaba tsünü lalingcho, “Adirü, kih shühchide changtphü la tsü Ih nüyohchürü sü mühle; Ih züdunung yade, aparü akhu züdupehpü lire.”

⁸ Jisu-nü abi te yocho, “Yamüsung, nü yüpji dhieng ko tsehng.”

⁹ Hütsüdenü abi kyangpehcho; ko ayüpji dhipü tsehnung dikehcho. Hütsü Sabath nyümong thsacho,

¹⁰ achotsü Jihudarü yangbenü akyangba nyitsarü te tsü yocho, “Chünye Sabath nyümonge ko nü yüpji dhinung tsü yuzeng nyüm lile.”

¹¹ Abinü lalingcho, “Ih kyangjüba nyitsarü tsünü Ite I yüpji dhinung ko tsehnung yocho.”

¹² Arühnü abi te tsingdhingcho, “Nüte hita nguchinung yoba nyitsarü tsü süo?”

¹³ Ta akyangba nyitsarü tsünü Jisu tsü sünang mümüdhecho, tunüo hütsü chah nyitsarü sühdi lichonü Jisu shehmüi tsipehpü licho.

¹⁴ Akhanglang Jisu-nü abi amübükuh la ngu abi te yocho, “Nyieng, adelü nüh kyangpehko; amütsauba suronü nüh müchinungthsa adelü amünyi tüshitbah.”

¹⁵ Hütsüde nyitsarüba tsü tsicho ko abi kyangjüba tsü Jisuepü Jihudarü yangbe te yocho.

¹⁶ Hütsünü arühnü Jisu dhsümthsenung dikehcho, tunüo abinü hi Sabath nyümong nguchicho.

¹⁷ Jisu-nü arüh te lalingcho, “I U-nü lede nguchire ko Ihnüsü nguchibae.”

¹⁸ Abinü Sabath nyümong thsangnyangcho du mah, ta Tsingrangba tsü Au khungepü dsiba tsünü apu jangjang Tsingrangba kangrepü khüsha Jihudarünü abi müpsehnung dhrongcho.

Atsudhre Tase

¹⁹ Hütsünü Jisu-nü arüh te lalingcho, “Ihnü nührü te yutsatsa yore: Aunü nguchi ngucho chah khu Atsudhrenü apu jangjangthsa tusü münguchicheh. Aunü tu nguchinang, Atsudhre nüsü hütsü du nguchire.

²⁰ Tunüo Aunü atsudhre müire ko apunü tu nguchiro apüm abi te ngusohre. Abinü hi tenü adiu nguchinung abi te ngusohnung, ko nührü atümung nyemüyangnung.

²¹ Aunü asürü kanglisoh akang lisohcho kyo, atsudhrenü abinü lümrüti khyang akang jüre.

²² Mahkhang Aunü sü yu mükhare. Arühnü Au jengreng drücho roh-i Atsudhre jengreng drüsohnung nengdang,

²³ abinü atsudhre khyang yukhanung tase apüm jopehko. Sünü Atsurü jengreng müdrüro, abinü abi riwüsohba Au jengreng müdrüre.

²⁴ “Ihnü nührü te yutsatsa yonung: Sünü I yu nyiro ko I riwüsohbong chah yudsiro abi lede akang lile. Abi yu mükhanung, ta asü lanü akang langi wüpehko.

²⁵ Ihnü nührü te yutsatsa yonung: Bekhyah chii role, ko hütsü ade lile, khode asürünü Tsingrangba Tsurü yuva yuchinung, ko sürünü hütsü yuchiro arüh kangli ronung.

²⁶ Au apu chah khüta akang liro, hütsü roh-i abinü Atsudhre khyangsü apu chah akang linung jüko.

²⁷ Ko abinü Atsudhre khyang yukhanung tase jüko, tunüo abi Nyitsarü Tsurü tsü lile.

²⁸ Hinü tünyemüyang; asürü atümungnü abi yuva yuchinung

²⁹ ko arüh kong lanü chüronung shikhe chii role; sürünü atsa nguchiko arüh kangli ronung ko linung; ko sürünü mütsa nguchiko arüh kangli ronung ko mülangjünung.

Jisu nengdang Yuzi

³⁰ “Ihnü I jangjang tusü münguchicheh; Tsingrangba-nü Ite yocho roh-i du Ihnü khare, hütsünü I yukhaba tsü yuje, tunüo Ihnü I khyünyücho roh-i mah, ta I riwüsohbanü khyünyücho du nguchinung müküpre.

³¹ “Ihnü Ipu nengdang yuzi jükhang, I yuzi tsü yuje mah.

³² Ta I nengdang yuzi jürü nyüh khüdu lile, ko abinü I nengdang yuzi jüba tsü yuje-epü Ihnü müdhele.

³³ Nührünü Johan yanglang nührü yusi hirü müthehcho, ko abinü yuje nengdang yuzi jücho.

³⁴ Ihnü nyitsarü yuzi khyünung yorü mah; Ihnü yoba hi nührü khümchonung nengdang yore.

³⁵ Johan tsü trunü visaba dsi khüdu kyo licho, ko abi atsingse la linung azachah nengdang nührünü longphicho.

³⁶ Ta Johan-nü jücho yuzi tenü I yuzi adiu lile:

³⁷ Ihnü tu nguchiro hütsü I U-nü I khyang nguchinung jücho nguchire, hiri khunü aunü Ih müthehcho yuzi jüre. Nührünü khodesü abi yuva müyuchi mahkhang abi romih müngudhing,

³⁸ ko abi nührü lasih la müyohbü, tunüo abinü müthehba chah nührünü müyudsi.

³⁹ Nührünü Amüsa yu yangchire, tunüo hütsüla nührünü lede akang ngunungepü longdire. Ko hiri Amüsa yu tsünü I nengdang yuzi jüre.

⁴⁰ Ta akang ngunung nengdang nührünü I yanglang ronung mülümre.

⁴¹ “Ihnü nyitsarü nengse müyangchire.

⁴² Ta nührü khütari nyitsarü nang Ihnü mümüdhe. Ko Tsingrangba müiba nührü lasih la mühlepü Ihnü müdhele.

⁴³ Ih I U nengla rocho, ta nührünü Ih mükhyücho; ta nyüh khüdu apu nengla rolang, nührünü abi khyüchonung.

⁴⁴ Nührünü khüdunü khüdu chahnü nengse khyünyüre, ta Tsingrangba, sü khüdu du liro; abi chahnü nengse ngunung mümüküpre; hütsükhang, khüta nührünü I chah yudsinung?

⁴⁵ I U jingte Ihnü nührü mülangjünungepü tülüm. Mosa, sü chah nührünü alongdi yohpücho, abinü nührü mülangjünung.

⁴⁶ Nührünü Mosa chah yujenü yudsirelang, I chahsü yudsibae, tunüo abinü I nengdang thrahcho.

⁴⁷ Ta abinü thrahcho chah nührünü müyudsikhang, Ihnü yocho chah khüta yudsinung?”