JOHAN 4 - AMÜSA BAIBEL (BSI)

Jisu ko Samarialarü

¹ Johan tenü Jisu-nü adrongu mono kangsoh baptijülepü Farisirü-nü yuchicho.

² (Amonotinü baptijücho chah khu; Jisu apu nülü süsü mübaptijü.)

³ Achotsü khode hütsü roh-i chochicho tsü Jisu-nü yuchicho, abinü Judea pehjüpü Galil lang thali wücho;

⁴ ko hütsülang wünung tsü Samaria bong tsinung kangcho.

⁵ Achotsü Jakob-nü atsudhre Josef khyang jüba lih shündhün Samaria la yangdi khüdu anengnü Saikar la abi rocho.

⁶ Hütsüla Jakob kihkong licho, ko Jisu lang tsehchonü kyahsehpü, kihkong te tsü pümcho. Hütsü nyüthung koh thsacho.

⁷ Samaria-larü khüdu kih khanung rocho, ko Jisu-nü abükyü te yocho, “I khyang kih ayongnung khülo.”

⁸ (Amonoti yangdi lang tsuyongnung lihnungba wüpü licho.)

⁹ Khingkutpü tsünü lalingcho, “Nüh Jihudarü khüdu ko Ih Samaria-larü khüdu, nühnü khütapü Ite ayongnung chingro?” Tunüo Jihudarünü Samariarü te tsanghi mütsutare.

¹⁰ Jisu-nü lalingcho, “Tsingrangba-nü tu jüro ko nüte ayongnung chingba tsü nühnü müdherelanglü, nühnü abi te chingbae, ko abinü nü khyang akangnung kih jübae.”

¹¹ Khingkutpü tsünü yocho, “Adirü, nüh yükohsü müli ko kihkong hi asoh-e. Khang nüh khüdenü akangnung kih tsü ngunung he?

¹² Hiba kihkong hi ihrü jümürü Jakob-nü ihrü khyang jücho; abi ko abi tsurüti ko abi thsitsurüti atümungnü yongcho. Nüh Jakob tenü adiu mah-o?”

¹³ Jisu-nü lalingcho, “Sürünü hiba kih yongro thali xonung,

¹⁴ ta sürünü Ihnü jüba kih yongro khodesü müxonung. Ihnü jünungba kih tsünü abi chah kihnatung kangnung, khüi khu abi khyang akangnung kih ko müchangkaba akang jünung.”

¹⁵ Khingkutpünü yocho, “Adirü, Ih müxonung ko hila kih khanung müronungthsa I khyang hütsüba kih tsü khülo!”

¹⁶ Jisu-nü abükyü te yocho, “Wüng ko nü nii dsipü thali rung.”

¹⁷ Abükyünü lalingcho, “Ih Inii mühle.” Jisu-nü lalingcho, “Inii mühlepü nühnü yuje yoko.

¹⁸ Nüh nyüh münga kuh la xengko, ko ade nüte liba tsü nü nii mah.” Nühnü ade yuje tsatsa yoko.

¹⁹ Khingkutpünü yocho, “Nüh azikehrü khüduepü Ihnü ngure.”

²⁰ “Ihrü jümürü Samariarünü hiba zong la Tsingrangba mübü rocho, ta nührü Jihudarünü Jerusalem la du Tsingrangba mübübaepü yore.”

²¹ Jisu-nü abükyü te yocho, “Khingkurü, I yu yudsing, nührünü hiba zong lanye, Jerusalem lanye Au mümübünung shikhe ronung.

²² Nührü Samariarünü sü mübüro hütsü mütsüp; ta ihrü Jihudarünü sü mübüro hütsü müdhele, tunüo akangcheh tsü Jihudarü khu rore.

²³ Ta yuje mübürütinü anbü la ko yuje la Au mübünungthsa bekhyah tsü tsehle, ko hütsü ade lile, tunüo Aunü abi mübürü hitari yangchire.

²⁴ Tsingrangba tsü Anbü, ko sürünü abi mübünang Anbü la ko yuje la mübünung athsalang.”

²⁵ Khingkutpünü abi te yocho, “Mesia ronungepü Ihnü müdhele, ko khode abi ronang, abinü ihrü te lüpcho yonung.”

²⁶ Jisu-nü lalingcho, “Nüte sünü chotaro hütsü abie.”

²⁷ Hütsüde Jisu monoti tsü thalicho, ko khingkurü khüdu te abinü chota yacho ngu arühnü nyemüyangcho. Ta sünüsü abükyü te, “Nüh tu khyünyüro? Mahkhang tuepü nüh abi te chotaropü müyochehcho.”

²⁸ Hütsüpü khingkutpü tsünü abükyü kih shinga pehjüpü yangdi lang wücho, ko nyitsarüti te yocho,

²⁹ “I nguchicho lüpcho yochehba nyitsarü hi ro dhing. Hi Mesia tsü mah-o?”

³⁰ Achotsü arüh atümung yangdi pehjüpü Jisu dhingnung wücho.

³¹ Hütsüde tsü monotinü, “Adorü, yangtsung” pü kihchicho.

³² Ta abinü lalingcho, “Nührünü mümüdheba I tsuyongnung lile.”

³³ Achotsü monotinü arühbürü chotacho, “Abi khyang khüroronü tsuyongnung hirojücho mah-o?”

³⁴ Jisu-nü arüh te yocho, “I tsuyongnung tsü,” “I riwüsohba yochonyinung ko I khyang jücho nguchi thüm nguchinung.

³⁵ ‘Choo müyü lipü maxa kyang chinung’ pü nührü choyoh yu khüdu lile. Ta Ihnü nührü te yore, nührünü tsungmüsu dhing, luh tsü nyithohko ko maxakyang chihko!

³⁶ Sünü xaro abinü amii ngure, ko lede akang nengdang asih khyübülungre; hütsüta ashuba ko axaba anyüding künyangtare.

³⁷ ‘Nyüh khüdunü shure ko aparü khüdunü xare’ pü choyoh yunü yoba tsü yuje.

³⁸ Nührünü müyuthsahcho xanung Ihnü nührü müthehcho; aparünü nguchicho ko arüh nguchicho lanü nührü jingchocho.”

³⁹ “Ihnü tuturü nguchicho lüpcho abinü Ite yoko, ko khingkutpünü yuzi jüde, hütsüba yangdila Samariarü adrongnü Jisu chah yudsicho.”

⁴⁰ Hütsünü khode Samariarü abi yang rocho, abi arüh yola lieng pü arühnü kihchicho, ko abi hütsüla nyümong anyüh mungcho.

⁴¹ Abi yusi khunü aparü adrongnü yudsicho,

⁴² ko arühnü khingkutpü te tsü yocho, “Nühnü yochonü mah, ta ihrübürünü yuchicho khu ade ihrünü yudsire, ko yuje abi tsü limih Kangchehjübaepü ihrünü müdhele.”

Jisu-nü Adirü Khüdu Tsurü Kyangjüre

⁴³ Hütsüla nyümong anyüh mungpü, Jisu Galil lang wücho.

⁴⁴ Tunüo apunü yocho, “Azikehrü tsü palu lih lalü jengreng müjüre.”

⁴⁵ Khode abi Galil lang rocho, hütsüla lirünü abi khyüchocho, tunüo Jerusalem la Phungkhu Thsütila tsü arühsü wü zehcho ko thsüti shikhela abinü nguchicho apüm arühnü ngucho.

⁴⁶ Hütsüpü Jisu-nü Galil la liba Kana yang khüde abinü kihnü cikih kangsohcho hütsülang abi thalicho. Hütsüla adirü khüdu licho sü tsurü Kapernaum la füdhsa licho.

⁴⁷ Khode abinü Jisu Judea lanü Galil lang rocho yuchicho, abinü abi yang wücho, ko abi te wü Kapernaum la sünungthsa liba atsudhre tsü kyangjüng pü kihchicho.

⁴⁸ Jisu-nü abi te yocho, “Thsayahiya ko anyemüyangnung münguchidelü nührü sünüsü müyudsinung.”

⁴⁹ Adiba tsünü yocho, “Abüdongba, I tsurü müsü denü I yola rung.”

⁵⁰ Jisu-nü abi te yocho, “Wüng, nü tsudhre kyangpehnung!” Abinü Jisu yu tsü yudsicho ko wücho.

⁵¹ Abi wüyade akulirünü yusi hiro abi mütohnü yocho, “Nü tsudhre kyangpehko!”

⁵² Achotsü abinü arüh te khode tinü abi kyangcho pü tsingdhingcho ko arühnü lalingcho, “Atü anyüzehlang khüdu bekhyahla rihminü abi pehjücho.”

⁵³ Hütsüde au tsünü hütsüba bekhyahla tsü Jisu-nü abi te, “Nü tsudhre kyangpehnung” pü yocho lümchehcho. Hütsünü abi ko kukhi shünü yudsicho.

⁵⁴ Hiba hi Jisu Judea lanü Galil lang ropü nguchicho thsayahiya anyüuba lile.