JOHAN 3 - AMÜSA BAIBEL (BSI)

Jisu ko Nikodemus

¹ Farisirü mülung lanü Jihudarü langnürü khüdu anengnü Nikodemus licho.

² Romang khüdu abinü Jisu yanglang wüpü abi te yocho, “Adorü, nüh Tsingrangba-nü müthehcho adorü khüduepü ihrünü müdhere; tunüo Tsingrangba müzehkhang, nühnü nguchiba thsayahiya hi sünüsü münguchicheh.”

³ Jisu-nü lalingcho, “Ihnü nüte yutsatsa yonung: anyüpili müsurokhang sünüsü Tsingrangba yanglih müngunung.”

⁴ Nikodemus-nü tsingdhingcho, “Azirü khüdu khüta anyüpili suronung?” “Abinü atpa mi la anyüpili züdupü suronung mükoh!”

⁵ Jisu-nü lalingcho, “Ihnü nüte yutsatsa yore,” “Kih ko Anbü la müsurokhang, sünüsü Tsingrangba yanglih la züdunung mükoh.

⁶ Shutsa lanü tu suronang hütsü shutsa, Anbü lanü tu suronang hütsü Anbü.

⁷ Nüh anyüpili asi kang surobaepü Ihnü nüte yochonü nüh tünyemüyang.

⁸ Nyübong khüilang fünyünang hütsülang füre; nühnü yuva tsü yuchire, ta hütsü khüdenü roro ko khüilang tsiro hütsü mümüdhe. Anbü lanü surorü atümung hütsü roh-i lile.”

⁹ Nikodemus-nü tsingdhingcho, “Hi khüta akohnung?”

¹⁰ Jisu-nü lalingcho, “Nüh Israel la adorü atsa khüdu, ko nühnü hi mümüdherü ang?

¹¹ Ihnü nüte yutsatsa yore: Ihrünü tu müdhero hütsü chore ko ihrünü tu ngucho hütsü nengdang yuzi jüre, ta nührü sünüsü ihrü yusi mükhyüchonyüre.

¹² Ihnü nührü te hiba limih nengdang yonye nührünü müyudsikhang, Ihnü nührü te ninglang nengdang yode nührünü khüta yudsinung?

¹³ Ko nyitsarü Tsurü, sü ninglangnü jürocho, abi chah khu sünüsü ninglang mütuwüdhing.”

¹⁴ Mosa-nü tu khüta lipilih la imüyeng mürü dhikehcho, hütsü roh-i Nyitsarü Tsurüsü dhikehbae.

¹⁵ Hütsüeko Nyitsarü Tsurü chah sürünü yudsinang lede akang ngunung.

¹⁶ Tunüo Tsingrangba-nü limih yah müichonü abinü apu amüi tsurü jücho, sürünü abi chah yudsiro müsünung, ta lede akang ngunung.

¹⁷ Tunüo limih mülangjünung nengdang mah, ta abi khu limih khümchonung nengdang Tsingrangba-nü apu tsurü limih yang müthehcho.

¹⁸ Sürünü Atsudhre chah yudsiro abi mümülangjüre; ta sünü müyudsiro abi mülangjüpehko, tunüo abinü Tsingrangba amüiba tsurü chah müyudsi.

¹⁹ Yukhaba tsü hiroh-i khare: atsingse tsü limih la roko, ta nyitsarünü atsingse tenü ama du müire, tunüo arüh nguchi tsü amütsa.

²⁰ Sünü amütsa nguchiro abinü atsingse thrünyire ko atsingse yang müronung, tunüo abinü amütsa nguchiti tsü müngusohnyüre.

²¹ Ta sünü tu yuje hütsü nguchiro abinü nguchiba tsü Tsingrangba te ayocho nyi nguchicho ngusohnung abinü atsingse yang rore.

Jisu ko Johan

²² Hütsüpü, Jisu ko amonoti Judea lih lang rocho ko hütsüla arüh te azachah li baptijücho.

²³ Johan-sü Salim amünyeh Aenon la baptijo licho, tunüo hütsüla kih thangchi licho. Nyitsarünü abi yang wücho ko abinü arüh baptijo licho.

²⁴ (Hi Johan mürangyoh-ede thsacho.)

²⁵ Johan mono khürünü Jihudarü khüdu te ayah mütsah nengdang rehta licho.

²⁶ Achotsü arühnü Johan yanglang wünü yocho, “Adorü, Jordan khüulang nüte liba nyitsarü, sü nengdang nühnü chocho, hütsü nühnü mülümkeh-o? Dhing, abinü baptijüre ko nyitsarü atümungnü abi yang wüle!”

²⁷ Johan-nü lalingcho, “Tsingrangba-nü müjükhang, süsü tu linung mükoh.

²⁸ ‘Ih Mesia tsü mah, ta abi müngu Ih tsehleh müthehchoe’ pü Ihnü yocho I yuzi nührübürü lile.

²⁹ Axengtpü tsü kuthribong yo; ta kuthribong shangrü, sü abi müshüm yapü abi yu nyiro, abinü kuthribong yuva yuchide künyangre. Hütsü roh-i I akünyang kükyüsohko.

³⁰ Abi dinungbae; ta Ih sümnungbae.”

Ninglangnü Roba

³¹ Sü ninglangnü roro abi atümung tenü adiuba. Sü alimih lanüo abi limih yo ko abinü limih nengdang chore, ta sü ninglangnü roro abi atümung tenü adiuba.

³² Abinü tu ngucho ko yuchicho hütsü nengdang yore, ta sünüsü abi yusi mükhyüchore.

³³ Ta sünü abi yusi khyüchoro hütsünü Tsingrangba tsü yuje-epü müdhere.

³⁴ Tsingrangba-nü müthehbong tsünü Tsingrangba yu chore, tunüo Tsingrangba-nü abi khyang Anbü ajeng jüre.

³⁵ Aunü atsudhre müire ko lüpcho abi kheh la yohjüko.

³⁶ Sünü atsudhre chah yudsiro abi müchangkaba akang lile; sünü atsudhre te münyiro, abinü akang müngunung, ta Tsingrangba rihlong abi michah linung.