JOHAN 21 - AMÜSA BAIBEL (BSI)

Mono Dhünyeh te Chüro Ngucho

¹ Hütsüpü Jisu-nü anyüpiu amonoti te Tiberia kihdi te chüro ngucho. Hütsü hita tikehcho.

² Simon Peter, Thomas (arüp tsurü dsiba), Nathanael (Galil la Kana lanü), Zebede tsurüti, ko Jisu mono aparü anyüh, arüh müjang licho.

³ Simon Peter-nü aparü te yocho, “Ih ngurangnung würe.” Arühnü abi te yocho, “Ihrüsü nü yola ronung.” Achotsü arühnü kihtang khüdu lanü wücho, ta hütsü romang ayung arühnü tusü mürang.

⁴ Tsingselang, Jisu kihbekhümla yacho, ta hütsü Jisuepü monotinü mütsüpcho.

⁵ Hütsüde abinü arüh te tsingdhingcho, “Dhrezarüti, tusü mürangcho mah-o?” Arühnü lalingcho, “Tusü mürang.”

⁶ Abinü arüh te yocho, “Nührü yojeh tsü kihtang tsalang tsü phayohchüng, nührünü rangnung.” Achotsü arühnü yojeh tsü phayohchücho ko nguh khütango phatipü arühnü yojeh tsü mükoh tphahchehcho.

⁷ Jisu-nü müiba mono tsünü Peter te yocho, “Hütsü Abüdongbae!” Khode Peter-nü hütsü Abüdongba epü yuchicho, abinü pümkhüm khümcho (tunüo abi jengki khohpehpü licho) ko kih la tsohyoh züducho.

⁸ Aparü monoti tsü ngunü jeng zehba yojeh tsü tphahpü kihtang la tsünü kihbekhümlang rocho. Arüh kihbekhüm lanü ashu mah, lang dhünyango du zehcho.

⁹ Khode arüh kihbekhümla mütrahchocho, miha michang chah nguh ko hümdhse keh ngucho.

¹⁰ Hütsüde Jisu-nü arüh te yocho, “Nührünü ade rangba nguh lanü khürü hirung.”

¹¹ Simon Peter-nü kihtang la küducho ko nguh adidi thsihpü dhünyangpü asangnü jeng zehpü yojeh tsü athringlang tphahchehcho; ko nguh hütsütoi zehnye, yojehlü mürohrüp.

¹² Jisu-nü arüh te yocho, “Ro tsung.” Hütsü Abüdongba epü müdhenü, “Nüh süo” pü abi te tsingdhingnung monoti sünüsü müci mümülahcho.

¹³ Achotsü Jisu-nü wü hümdhse ko nguh khyonü arüh khyang jücho.

¹⁴ Jisu asücho lanü kangchehli ropü hinü asangpiu monoti te chüro ngure.

Jisu ko Peter

¹⁵ Arüh tsuyongchopü, Jisu-nü Simon Peter te yocho, “Johan tsurü Simon, hiri tenü alaa nühnü Ih müirü mah-o?” Abinü lalingcho, “Ho, Abüdongba,” “Ihnü nüh müirepü nühnü müdhele.” Jisu-nü abi te yocho, “I Sanzati kaang.”

¹⁶ Jisu-nü anyüpiusü abi te yocho, “Johan tsurü Simon, nühnü Ih müirü mah-o?” Abinü lalingcho, “Ho, Abüdongba, Ihnü nüh müirepü nühnü müdhele.” Jisu-nü abi te yocho, “I Santi xüküm.”

¹⁷ Asangpiusü Jisu-nü yocho, “Johan tsurü Simon, nühnü Ih müirü mah-o?” Ko Jisu-nü asangpili, “Nühnü Ih müirü mah-o” pü yochonü Peter longyücho. Hütsünü abinü abi te yocho, “Abüdongba, nühnü lüpcho müdhele; Ihnü nüh müirepü nühnü müdhele!” Jisu-nü abi te yocho, “I Santi xüküm.

¹⁸ Ihnü nüte yutsatsa yore: Nüh dhrezade, nü jangjangthsa shü rapü nü wünyücholang wücho; ta nüh khode ashirü kangnang, nühnü nü kheh müyungchünung ko aparünü nü shü rajünung ko nüh müwünyücholang nowünung.”

¹⁹ (Jisu-nü Peter khütari asünü Tsingrangba hechisohnung hütsü thongunü yocho.) Hütsüpü Jisu-nü abi te yocho, “Ih iirung!”

Jisu ko Aparü Mono

²⁰ Peter-nü ximüla akhangte aparü mono, sü Jisu-nü müicho ko yangtsude Jisu chah ngakehpü, “Abüdongba, sünü nüh khakhuchüjünung pü tsingdhingba mii ngucho.”

²¹ Khode Peter-nü abi ngucho, abinü Jisu te tsingdhingcho, “Abüdongba, Hivi hi khüta?”

²² Jisu-nü abi te lalingcho, “Ihnü abi Ih müro yingcheh lisohnyücho ngang hütsü nühnü tonung? Yah Ih iirung!”

²³ Hütsünü hütsüba monolü müsünungepü ajünirü yola yusi tsü sobhocho. Ta hütsü Jisu-nü abi müsünungepü yochoba mah, ta “Ihnü abi Ih müro yingcheh lisohnyücho ngang, nühnü tu yonung mühlepü yochoba due.”

²⁴ Hiri choba ko thrahba mono tsü abie; ko abi yuje-epü Ihsanü müdhele.

Yuzika

²⁵ Adesü Jisu-nü nguchicho khütango lile. Hütsüri apüm thrahlanglü, athrahcho vakha limihnü müzuba thsakopü Ihnü lümre.