JOHAN 20 - AMÜSA BAIBEL (BSI)

Kong Adeng

¹ Bari nyangnyü mütoh mütsingse-ede, Mary Magdalin konglang tsü wücho ko kong trahtri lanü lung tsü dhipehpü ngucho.

² Abükyünü Simon Peter ko Jisu-nü müiba mono nyüh yanglang shang wünü yocho, “Arühnü Abüdongba kong lanü dhitsipehko, ko khüde yohpürünang ihrünü mümüdhe.”

³ Achotsü Peter ko aparü mono nyühnü konglang tsü wücho.

⁴ Anyüdingnü shangcho, ta aparü mono tsünü Peter tsohkhu kong tsü akhu chihcho.

⁵ Abinü mükhupü yohchü dhingde shünana du ngucho, ta abinü müzüdu.

⁶ Akhanglang Simon Peter ro chihcho, ko müchongkhüti kong la tsü züducho. Abinü shünana

⁷ ko Jisu thah yühcho jo ngucho. Hütsülü shünana te tsü mah, ta ajangjangthsa nüpbülungpü jocho.

⁸ Hütsüde aparü mono, sü kong akhu chihcho, abisü züducho; ko abinü ngucho ko yudsicho.

⁹ (Arühnü ade yingcheh amüsa yunü abi asü lanü kanglinungeba tsü münyicheh-echo.)

¹⁰ Hütsüpü monoti tsü kulang thali tsicho.

Mary Magdalin te Chüro Ngucho

¹¹ Mary-nü kong te tra yacho. Abükyünü tranü mükhupü kong yonglang tsü yohchü dhingülü

¹² ninglang riwürü anyüh jengki athru khyüpü Jisu me yohpücho te, khüdu akulang ko khüdu ajinglang püm ngucho.

¹³ Arühnü abükyü te tsingdhingcho, “Khingkurü, nüh tuthsa traro?” Abükyünü lalingcho, “Arühnü I Büdongba dhi tsipehko, ko abi khüde yohpürünang Ihnü mümüdhe.”

¹⁴ Hütsüpü abükyünü ximülade, Jisu ya ngucho; ta hütsü Jisuepü mütsüpcho.

¹⁵ Jisu-nü abükyü te tsingdhingcho, “Khingkurü, nüh tuthsa traro? Nüh sü yangchiro?” Abükyünü abi tsü tbü nyahrüepü lümnü abi te yocho, “Adirü, nühnü abi dhi tsiko likhang, abi khüde yohpürünang Ite young, Ihnü wü abi dhi tsinung.”

¹⁶ Jisu-nü abükyü te yocho, “Mary!” Abükyünü ximüla Ibri yunü yocho, “Rabboni!” (Hi adüzü “Athsingyurü.”)

¹⁷ Jisu-nü abükyü te yocho, “I chah tüthahpü, tunüo Ih Au yanglang mütuwüe. Ta I jünirüti yanglang wüng ko arüh te I U ko arüh Au, I Tsingrang ko arüh Tsingrang yanglang thali würe pü young.”

¹⁸ Achotsü Mary Magdalin-nü wücho ko abükyünü Abüdongba nguko, ko abinü abükyü te tu yocho hütsü arüh te yocho.

Monoti te Chüro Ngucho

¹⁹ Hütsüba bari romang, Jihudarü langnürü drüchonü monoti tsü kuh khangtipü müjang pümcho. Hütsüde Jisu züro arüh longla yacho ko arüh te yocho, “nührü te atbachi lieng.”

²⁰ Hütsü yoko khanglang abinü arüh te akheh ko athringxang ngusohcho.

²¹ Jisu-nü arüh te anyüpiusü yocho, “nührü te atbachi lieng. Aunü Ih müthehcho kyo, Ihnü nührü müthehre.”

²² Hütsüpü abinü arüh chah mehkehjo yocho, “Nührünü Anbü Amüsa khyüchoung.

²³ Nührünü sürü münyi pehjüro arüh khyang pehjünung; nührünü arüh münyi müpehjükhang, arüh khyang müpehjünung.”

Jisu ko Thomas

²⁴ Mono dhüreanyüh yola khüdu Thomas (süte arüp tsurü dsicho) Jisu rode arüh yola mülicho.

²⁵ Hütsünü monotinü abi te yocho, “Ihrünü Abüdongba nguko!” Thomas-nü arüh te yocho, “Ihnü apu müyola imühi iha müngude, ko arahla tsü I müyungza müthsidhingde, ko apu thringxangla I müyonü mümarangde, Ihnü yu müdsinung.”

²⁶ Nyükhih khüdu khanglang monoti tsü adesü müjang kuh yonglang pümcho, ko arüh yola Thomas sü zehcho. Kukhang khangti licho, ta Jisu arüh longla yacho ko arüh te yocho, “nührü te atbachi lieng.”

²⁷ Hütsüpü abinü Thomas te yocho, “Hila nü müyungza thsirang, ko I müyotpah dhingdhing; ko nü kheh müyungchü I thringxang la mayohchüng. Tütohnyünyeh tüli ta yudsing!”

²⁸ Thomas-nü abi te lalingcho, “I Büdongba ko I Tsingrang!”

²⁹ Jisu-nü abi te yocho, “Nühnü Ih nguchonü yudsirü mah-o? Sürünü Ih müngupü yudsiro arüh khütoi akünyangnung!”

Hiba Vakha Alümcho

³⁰ Hiba vakhala müthrahyohcho amüdhethsa adrong Jisu-nü amonoti yola nguchiko.

³¹ Ta nührünü Jisu tsü Mesia, Tsingrangba Tsurü pü yudsisohnung, ko abi chah nührü yudsi khu akang ngunung nengdang hiri thrahcho.