JOHAN 2 - AMÜSA BAIBEL (BSI)

Kana la Kukangba

¹ Asangu nyümong Galil la Kana yang kukangba thsüti khüdu licho. Hütsüla Jisu atpasü licho,

² ko Jisu ko amonotisü thsütila tsü dsiyohcho.

³ Khode cikih khyükhangcho, Jisu atpanü abi te yocho, “Arüh cikih thümpehko.”

⁴ Jisu-nü lalingcho, “Tu nguchinung nühnü Ite müyobae, Ih akyang müchie.”

⁵ Hütsüpü Jisu atpanü kulirüti te yocho, “Abinü nührü te tu yonang nguching.”

⁶ Jihudarü ayahmütsah yuzeng licho, ko hütsü nengdang lung di dhüroh, khüdula liter thsih khüdu yohba licho.

⁷ Jisu-nü kulirüti te yocho, “Hiri di la tsü kih lieng.” Arühnü jengkhang liicho,

⁸ hütsüpü abinü arüh te yocho, “Kih tsü aza khacheh khehthsithsaba khyang hiwüng.” Arühnü kih khüi

⁹ adelü cikih kangsohpü liba kih tsü arühnü abi yang hiwücho ko abinü hütsü müjangdhingcho. Hiba cikih tsü khüdenü rocho hütsü abinü mümüdhe (ta, kulirü sürünü kih tsü khachehcho arünülü müdhecho); achotsü abinü kukangbong tsü dsinü

¹⁰ abi te yocho, “Ledenü cikih akyüba tsü akhu chahlare ko shirü tsü kükyo yongpü du amükyü tsü chahlare. Ta nühnü ade yingcheh cikih akyüba tsü yohpüko.”

¹¹ Jisu-nü hiba akhudiba thsayahiya tsü Galil lih Kana la nguchicho; hütsüla abi ahechi mishacho, ko monotinü abi chah yudsicho.

¹² Hütsüpü, Jisu ko atpa, anirüti ko amonoti Kapernaum lang wü hütsüla akhikyah chah licho.

Jisu Amübükuh lang Wücho

¹³ Hütsü Phungkhu Thsüti bekhüm chihcho, hütsünü Jisu Jerusalem lang wücho.

¹⁴ Amübükuh la tsü misü san ko, kuh-mümüdhrü irü, ko thsi mülihrü arüh tsingthsang chah püm abinü ngucho.

¹⁵ Hütsünü abinü axüpyonü xüp amübükuh lanü kanglungrü tsü iipehcho; abinü thsi mülihrü tsingthsang dümtsujo thsi zingthohpehjücho;

¹⁶ ko abinü kuh-mümüdhrü irü te yuzengjo yocho, “Hiri hilanü hitsieng! I U kuh shithsabhüleh chah tükangsoh!”

¹⁷ “Nü kuh nengdang mükhyahba tsünü, O Tsingrang, michangnü kyo Ih trüpre, pü amüsa yunü yocho monotinü lümchehcho.”

¹⁸ Jihudarü yangbenü tsingdhingcho, “Nü chah hiri nguchinung tase lilepü müdhenung nühnü ihrü te tu thsayahiya nguchinung?”

¹⁹ Jisu-nü lalingcho, “Amübükuh hi tphünahng, ko nyümong asangla Ihnü thali thsachehnung.”

²⁰ Arühnü abi te tsingdhingcho, “Nühnü nyümong asangla hi thali thsachonung ang?” “Hiba amübükuh hi kang yürepü dhüroh khyo thsachoba lile!”

²¹ Ta Jisu-nü yoba amübükuh tsü apu fü nengdang chocho.

²² Hütsünü khode abi asücho lanü kangchehli rocho, hütsüde du monotinü abinü chocho lümchehcho, ko arühnü amüsa yunü ko Jisu-nü tu yocho hütsü yudsicho.

Jisu-nü Nyitsarü Saying Müdhecho

²³ Phungkhu Thsüti bekhyah Jisu Jerusalem la lide, abinü thsayahiya nguchicho ngu adrongnü abi chah yudsicho.

²⁴ Ta Jisu apunü arüh chah longmülangcho, tunüo abinü arüh atümung müdhecho.

²⁵ Sünüsü abi te arüh nengdang yonung müdhsütahcho, tunüo arüh lasih la tu liro apunü müdhecho.