JOHAN 18 - AMÜSA BAIBEL (BSI)

Jisu Rangcho

¹ Jisu-nü hütsüta dangkhidangnangpü khanglang, monoti te Kidron yongkhi kehnü wücho. Hütsüba müdümla tbü khüdu licho, ko Jisu ko amonoti hütsüla züducho.

² Kihyochüjübong Judas-nü hütsü müdhe licho, tunüo Jisu-nü amonoti te hütsüla adrongpi shirütacho.

³ Achotsü Judas-nü Bebü ayingti ko Farisirü chahnü rothsarü mülung dsibhong ko thsunohrü bipü wücho.

⁴ Jisu-nü abi chah tikehnung lüpcho müdhe licho, hütsünü bekhu chüdu arüh te tsingdhingcho, “Nührü sü yangchiro?”

⁵ Arühnü lalingcho, “Nazaret-rü Jisu yangchire.” Abinü yocho, “Ih abie.” Kihyochüjübong Judas mii arüh yola yacho.

⁶ Jisu-nü arüh te, “Ih abie” pü yode, arüh khanglangnü shehli wünü alih la khülucho.

⁷ Anyüpiu Jisu-nü arüh te tsingdhingcho, “Nührü sü yangchiro?” Arühnü yocho, “Nazaret-rü Jisu yangchire.”

⁸ Jisu-nü yocho, “Ih abie” pü nührü te yopehko. “Nührü Ih yangchirü thsakhang, aparülü tsisohng.”

⁹ (Hiba hi abinü: “Uwa, nühnü I khyang jücho yola süsü müchah pü abinü yocho tikehnung nengdang licho.”)

¹⁰ Hütsüde, Simon Peter, sü nohsheng khüdu biyacho, abinü hütsü tohcheh Amungthriba bebü kulibong tsalang nangku thsüp-pehjücho. Kulibong neng tsü Malkas thsacho.

¹¹ Jisu-nü Peter te yocho, “Nü nohsheng tsü nohtrüp la yohng! I U-nü jüba shing tsü Ihnü müyongnung do?”

Jisu Anas Bete

¹² Hütsüpü Roman rothsarü arüh nüchibong zehnü ko Jihudarü anyahrünü Jisu rangnü rahpü,

¹³ Anas yang akhu nowücho. Tunüo abi Kaifas aku ko hütsü kang Kaifas tsü Amungthriba bebü licho.

¹⁴ Jihudarü langnürüte nyitsarü atümung nengdang nyüh khüdu sünung tsü atsaubaepü thsüchiba tsü Kaifas thsacho.

Peter-nü Jisu Münyengchocho

¹⁵ Simon Peter ko aparü mono khüdunü Jisu khanglang iiwücho. Aparü mono tsü Amungthriba Bebübanü müdhe licho, hütsünü abi Jisu te Amungthriba bebü kekhüm la züducho,

¹⁶ ta Peter trahtri mihlang yacho. Hütsüde aparü mono tsünü thali chüdu trahtri nyahtpü te tsü chotapü Peter nüyohcho.

¹⁷ Trahtri nyahtpü tsünü Peter te yocho, “Nühsü hivi mono yola khüdu mahrü ang?” Peter-nü lalingcho, “Ihlü mah.”

¹⁸ Thsahchonü kulirüti ko anyahrüti tsü miha michang thsapü hütsü mükang he yacho. Achotsü Peter-nü arüh yola wü mih he yacho.

Amungthriba Bebübanü Jisu te Tsingcho

¹⁹ Bebü Amungthribanü Jisu te abi monoti ko abi adoba shulüm tsingcho.

²⁰ Jisu-nü lalingcho, “Ihnü atümung te lede misha choko; ko I adoba apüm nyitsarü atümung shibülung chah Sinagog ko amübükuh la du docho. Ihnü khodesü rang tusü müyo.

²¹ Khang tuepü Ite tsingdhingro? I yu yuchirü te tsingdhing. Ihnü tu yocho arühnü müdhele, arüh te tsingdhing.”

²² Jisu-nü hütsüta yode, anyahrü khüdunü abi chah tangcho ko yocho, “Bebü amungthriba te hütsüta lalingrü mah-o?”

²³ Jisu-nü abi te yocho, “Ihnü lango chomeh yo likhang, yuzi tsü hila lirü atümung te young. Ta Ihnü yoba tsü athsalang thsakhang, tuepü nühnü I chah tangro?”

²⁴ Hütsüpü Anas-nü abi arahshüshü Kaifas Bebü Amungthriba yang müthehcho.

Peter-nü Anyüpiu Jisu Münyengchocho

²⁵ Peter hütsüla ade yingcheh mih he yacho. Hütsünü aparünü abi te yocho, “Nühsü hivi mono yola khüdu mahrü ang?” Ta Peter-nü münyengchonü yocho, “Ihlü mah.”

²⁶ Peter-nü anangku thsüp-pehjüba tsutpurü Bebü amungthriba kulirü yola nyüh khüdunü yocho, “Ihnü nüh abi te tbü la müngucho do?”

²⁷ Adesü Peter-nü “Mah” pü yocho, ko hütsütade tsü hüna khongcho.

Jisu Pilat Bete

²⁸ Anyangnyü mütoh arühnü Kaifas kuh lanü Governor yangnü Jisu nowücho. Ko Jihudarü langnürülü kuh yonglang tsü müzüducho, tunüo Phungkhu tsuyong tsuchehnungthsa arühnü mümünyinyücho.

²⁹ Achotsü Pilat-nü dongkhu chüdu arüh te tsingdhingcho, “Nührünü hiba nyitsarü tunü mülangjüro?”

³⁰ Arühnü lalingcho, “Abinü müthsamehrelang ihrünü nüh yang münorobae.”

³¹ Pilat-nü arüh te yocho, “Khang nührübürünü nowü nührü yuzengnü abi yu khaang.” Arühnü yocho, “Nyitsarü müpsehnung ihrü yuzengnü mümülare.”

³² (Hiba hi Jisu-nü abi khütari asübanü sünung chocho, hütsü tikehnung nengdang.)

³³ Pilat-nü thali yangthsaba pümjilang züducho ko Jisu dsinü tsingdhingcho, “Nüh Jihudarü yangthsaba mah-o?”

³⁴ Jisu-nü lalingcho, “Hi nü lümyunü a mahkhang aparünü I nengdang nüte yocho?”

³⁵ Pilat-nü lalingcho, “Ih Jihudarü khüdu mah-o? Nührübürü nyitsarü ko bebü ayingtinü nüh I khyang khakhuchüjücho. Nühnü tu nguchicho?”

³⁶ Jisu-nü yocho, “I yanglih hiba limih yo mah; I Yanglih hiba limih yoerelang, Jihudarü kheh la Ih müjünung nengdang I mononü khatabae; ta I Yanglih tsü hiba limih yo mah!”

³⁷ Hütsünü Pilat-nü abi te tsingdhingcho, “Khang nüh yangthsarü khüdu mah-o?” Jisu-nü lalingcho, “Ih yangthsabaepü nühnü yore. Ih yujeba nengdang yuzi jünung surocho, ko hütsü nengdang Ih limih la rocho. Sü yuje yo liro abinü I yu nyire.”

³⁸ Pilat-nü tsingdhingcho, “Yuje tsü tuo?” Achotsü Pilat-nü thali dongkhu nyitsarüti yanglang chüdu arüh te yocho, “Ihnü abi mülangjünungthsa yuzi tu müngure.

Jisu Süsohcho

³⁹ Ta Phungkhu Thsüti shikhela Ihnü nührü khyang nyitsarü khüdu müthehnung nührü yangthsa khüdu lile. Hütsüeko nührü khyang Jihudarü yangthsaba tsü müthehsohnyürü mah-o?”

⁴⁰ Arühnü abi te züdenü lalingcho, “Abi mah, ta Barabbas!” (Barabbas tsü afüashi thsacho.)