JOHAN 17 - AMÜSA BAIBEL (BSI)

Monoti Nengdang Dangkhidangnangcho

¹ Jisu-nü yu hiri chopü, ninglang dhingnü yocho, “Uwa, becho chihko. Atsurünü nüh hechinungthsa, nü Tsudhre hechisohng.

² Nühnü abi khyang jübati khyang abinü müchangkaba akang jünungthsa, nühnü amüi tsurü atümung michah abi khyang zii jüko.

³ Ko müchangkaba akang adüzü yujeba Tsingrang, ko nühnü riwüsohba Jisu Khrista müdhenung.

⁴ Nü ahechi Ihnü limih la hechisohko; ko nühnü I khyang nguchinung jücho nguchi tsü thümko.

⁵ Uwa, limih müthride Ih nüte lide tu ahechi licho, hütsü ade nüpu linü hechisohng.

⁶ “Limih lanü nühnü I khyang jübati khyang Ihnü nüh müdhesohko. Arühnü yo licho, ko nühnü arüh I khyang jücho. Arühnü nü yu nyicho,

⁷ ko nühnü ade I khyang jücho lüpcho tsü nü chahnü rorepü arühnü müdhele.

⁸ Nühnü I khyang jüba yu tsü Ihnü arüh khyang jücho, ko arühnü hütsü khyüchocho; ko Ih nü chahnü roba tsü yuje Ih nühnü müthehchoepü arühnü yudsicho.”

⁹ “Ihnü arüh nengdang kihchire. Ihnü limih nengdang mükihchire, ta nühnü jübati nengdang kihchire, tunüo arüh nüyo lile.

¹⁰ I licho apüm nüyo ko nü licho apüm I yo; ko I ahechi tsü hütsüri khu ngusohre.

¹¹ Ko Ih ade nüh yang rore; Ih limih la mülinung, ta arühlü limih la lile. Amüsa Uwa! Ihjü tu khüta khüdu liro, hütsü roh-i arühsü khüdu kang linungthsa, nü neng zii khüiba nühnü I khyang jücho, hütsünü arüh khümcho yohpüjüng.

¹² Ih arüh te lide nühnü I khyang jüba nü neng zii tsünü arüh khümcho yohpücho. Ihnü arüh tsungticho, ko amüsa yu tikehsohnung sü chahnung licho, abi chah khu arüh süsü müchah.

¹³ Ko Ih ade nüh yang rore, ko I akünyang arüh chah ajeng linung nengdang Ihnü limih la yu hiri chore.

¹⁴ Ihnü arüh khyang nü yu jüko, ko limihnü arüh thrünyicho, tunüo Ih khüta limih yo mahro, hütsü kyo arühsü limih yo mah.

¹⁵ Arüh limih lanü notsiengpü Ihnü nüte mükihchire, ta arüh amünyi chahnü khümcho yohpüngpü kihchire.

¹⁶ Ih khüta limih yo mahro, hütsü kyo arühsü limih yo mah.

¹⁷ Yuje tsünü arüh müsachehjüng; nü yu yuje lile.

¹⁸ Nühnü Ih khüta limih yang müthehcho, hütsü roh-i Ihnü arüh limih yang müthehko.

¹⁹ Arühsü nüte yuje la müsachehsohnungthsa, arüh khyanglangnü nüte Ipu jangjangthsa müsachehre.

²⁰ “Ihnü arüh nengdang du kihchirü mah, ta arüh yusi khu sürünü I chah yudsiro arüh nengdangsü kihchire.

²¹ Uwa! Nüh I chah ko Ih nü chah licho kyo, arüh Ihsa chah lisohng. Ih nühnü müthehchoepü limihnü müdhenungthsa, arüh khüdu kang lisohng.

²² Ihsa khüta khüdu liro, hütsü roh-i arüh khüdu du linung;

²³ Ih arüh chah ko nüh I chah; hütsünü arüh khüdu du kangnung, ko nühnü Ih müthehcho ko müicho kyo arüh mii müirepü limihnü müdhenung nengdang, ahechi nühnü I khyang tu jücho Ihnü arüh khyang jüko.

²⁴ “Uwa! Nühnü arüh I khyang jücho, hütsünü Ih khüde linang arüh hütsüla lisohnyüre; ko nühnü I khyang jüba Ih ahechi tsü arühnü ngunung, tunüo limih müthridenü nühnü Ih müicho.

²⁵ Amüsa Uwa! Limihnü nüh mümüdhe, ta Ihnü nüh müdhele, ko nühnü Ih müthehchoepü hirinü müdhele.

²⁶ Ihnü arüh khyang nüh müdhesohcho, ko nühnü Ih müiba tsü arüh chah linung, hütsünü Ihsü arüh chah linung nengdang, Ihnü mütozah hütsü roh-i nguchinung.”