JOHAN 16 - AMÜSA BAIBEL (BSI)

¹ “Nührü yudsi lanü müshehlisohnung nengdang Ihnü nührü te hi yopehko.

² Sinagog lanü nührü iipehnung, ko sünü nührü müpsehnang abinü Tsingrangba dikehrepü lümnungba bekhyah tsehle.

³ Arühnü I U thsanye Ih thsanye mümüdhechonü nührü chah hiri nguchinung.

⁴ Khode arühnü hiri nguchinung nyümong chii ronang, Ihnü nührü te yochoeko nührünü lümchehnung nengdang Ihnü nührü te hi yoko. “Ihnü adikehla nührü te hiri müyo, tunüo Ih nührü te licho.

Anbü Amüsa Nguchi

⁵ Ade I riwüsohbong yanglang Ih würe, ta nührü sünüsü Ih khüde würünang mütsingdhingre.

⁶ Ko ade Ihnü nührü te yochonü, nührü lasih awahnü jeng lile.

⁷ Ta Ihnü nührü te yutsatsa yore: Ih tsicho tsü nührü nengdang atsau, tunüo Ih mütsikhang, atrorü tsü nührü yang müronung. Ta Ih wükhang, Ihnü abi nührü yang müthehnung.

⁸ Ko khode abi ronang, amünyi nengdang, amüsaba nengdang ko Tsingrangba yukhaba nengdang alimih la nyitsarü te amülanglang yuzi jünung.

⁹ Amünyi nengdang arüh amüthsalang licho, tunüo arühnü I chah yumüdsi;

¹⁰ amüsaba nengdang arüh amüthsalang thsacho, tunüo Ih Au yanglang würe ko nührünü adelü Ih müngunung;

¹¹ ko yukhaba nengdang arüh amüthsalang licho, tunüo hiba limih yangthsaba yu tsü khapehko.

¹² “Nührü te yonung adesü yu khütango lile, ta ade nührünü mükoh hinung.

¹³ Ta khode Tsingrangba yuje mishajübong Anbü tsü ronang, abinü nührü yuje apümlang nünung. Abinü alümyunü tu müchonung, ta abinü tu yuchicho, hütsü nengdang chonung ko aronung tu liro hütsüri nengdang nührü te yonung.

¹⁴ Abinü Ih hechinung, tunüo Ihnü tu yonang abinü hütsü du nührü te müdhesohnung.

¹⁵ I U licho apüm I yo; hütsünü Ihnü tu jünang Anbünü hütsü khyünung ko nührü te müdhesohnung.

Awah ko Akünyang

¹⁶ “Akhikyahchah liko nührünü Ih müngupehnung, ko adesü akhikyah chah liko nührünü Ih ngunung.”

¹⁷ Amonoti yola khürünü arühbürü yola tsingdhingtacho, “akhikyahchah liko Ihsanü abi müngunung, ko akhikyahchah liko Ihsanü abi ngunungepü abinü yoba tsü tu khuo? Ko abinü hitasü yorü, ‘Hi Ih Au yanglang wücho khunüe.’

¹⁸ ‘Akhikyahchah’ hi tu khuo? Abinü tu khu chorünang Ihsanü mümüdhe!”

¹⁹ Arühnü abi te tsingdhingririepü müdhe Jisu-nü arüh te yocho, “Akhikyahchah liko nührünü Ih müngunung, ko akhikyahchah liko nührünü Ih ngunungepü Ihnü nührü te yoko.” Hi nengdang nührü yola tsingdhingtarü mah-o?

²⁰ Ihnü nührü te yutsatsa yore: Nührünü tranung, wahnü me tranung, ta limihlü künyangnung; nührü wahnung, ta nührü awah tsü akünyang kangnung.

²¹ Khingkurünü zatbünung thsade, abükyü wahre tunüo abükyü chongchanung becho chihre; ta khode azarü tsü mülimülanang, abükyü adhsa tsü nbüchüre, tunüo limih la azarü khüdu surocho tsünü abükyü künyangre.

²² Nührü nengdangsü hütsü kyo lile: Ade nührü wahre, ta Ihnü thali nührü shirünung, ko akünyang khüi sünüsü nührü chahnü mühitsichehnung, hütsü akünyangnü nührü lasih jengnung.

²³ “Khode hütsüba nyümong ronang, nührünü tu nengdangsü Ite mütsingdhingnung. Ihnü nührü te yutsatsa yore: nührünü I nengla Au te tuturü chingnang, abinü nührü khyang jünung.

²⁴ Ade yingcheh I nengla nührünü tusü müching; nührü akünyang ajeng kangnung nengdang ching ko nührünü ngunung.

Limih chah Akohba

²⁵ “Ihnü nührü te hiri yonung nengdang adüzü bichicho. Ta Ihnü adüzü mübichipü Au nengdang tsidsa chonung shikhe ronung.

²⁶ Khode hütsüba nyümong ronang, nührünü abi te I nengla chingnung; ko nührü nengla Ihnü Au te kihchijünungpü nührü te müyore,

²⁷ tunüo Au apunü nührü müire. Nührünü Ih müirü ko Ih Tsingrangba chahnü rochoepü yudsichonü abinü nührü müire.

²⁸ Ih Au chahnü limih yang rocho; ko ade Ih limih pehjüpü Au yang würe.”

²⁹ Hütsüde monotinü abi te yocho, “Adelü nühnü adüzü mübichipü tsidsa chore.

³⁰ Nühnü lüpcho müdhelepü ade ihrünü müdhere; nüte sünüsü tu tsingdhingnung müdhsütah. Hinü nüh Tsingrangba chahnü rochoepü ihrü khyang yudsisohre.”

³¹ Jisu-nü arüh te lalingcho, “Ade nührünü yudsirü mah-o?

³² Nührü palu kulang I müleng pehjüpü tsishonung shikhe tsehle, ko hütsü chipehko. Ta I müleng tsatsa mah, tunüo Au Ite lile.

³³ Nührü Ite li atbachi ngunung nengdang Ihnü hi nührü te yoko. Limih la nührü chongcha roto lile. Ta rezehng! Ihnü limih kohko!”