JOHAN 13 - AMÜSA BAIBEL (BSI)

Jisu-nü Mono Jing Thsütohjücho

¹ Hütsü Phungkhu Thsüti bekhu nyümong thsacho. Jisu-nü hiba limih pehjüpü Au yanglang wünung becho chihkopü müdhecho. Abinü limih la sürü apu yo licho arüh lede müicho, ko abinü arüh achangchi müicho.

² Jisu ko amonoti aromang yangtsuchah pümcho. Jisu kihyochünung lümlong tsü motsingnü Simon Iskariot tsurü Judas lüm la yohjüpehcho.

³ Jisu-nü abi khyang Aunü zii apüm jükopü müdhecho; abi Tsingrangba chahnü rocho ko Tsingrangba yang würepü müdhecho.

⁴ Achotsü abinü yangtsuchah tsünü shemüsu ashü amixi phungcheh yohpüpü fünising shü khüdunü akih rümcho.

⁵ Hütsüpü abinü mütpah-tbhü khüdula kih tungyohcho ko monoti jing thsütohjücho ko akih rümba fünising tsünü nikungjünung dikehcho.

⁶ Abinü Simon Peter yanglang rocho, ko Peter-nü abi te yocho, “ Abüdongba, nühnü I jing thsütohjünung do?”

⁷ Jisu-nü abi te lalingcho, “Ihnü tu nguchiro nühnü adelü münyichehnung, ta akhanglang du nyichehnung.”

⁸ Peter-nü khohcheh yocho, “Khodesü nühnü I jing müthsütohsohnung!” Jisu-nü lalingcho, “Ihnü nü jing müthsütohjükhang, nüh I mono mükangcheh.”

⁹ Simon Peter-nü lalingcho, “Abüdongba, khang, I jing du mahpü, I kheh ko I thah mii thsütohjüng!”

¹⁰ Jisu-nü yocho, “Sü mütsahko abi jingchah khu thsütohnung dhsütah mühle abi müsakhüti lile. Nyüh khüdu chah khu nührü atümung müsa lile.”

¹¹ (Sünü abi kihyochüjünung hütsü Jisu-nü müdhejung lichonü, abinü yocho, “Nyüh khüdu chah khu nührü atümung müsa lile.”)

¹² Jisu-nü arüh jing thsütohjüpü, abinü abi shü amixiba tsü thali khyüpü apu pümjilang thalicho. Abinü yocho, “Ihnü ade tsatsa nührü te tu nguchicho hütsü nührünü münyicheh-o?”

¹³ “Nührünü Ite Adorü ko Abüdongba pü dsire, ko nührünü athsalang dsire, tunüo Ih hütsüe.

¹⁴ Ih, nührü Abüdongba ko Adobanü ade tsatsa nührü jing thsütohjüko. Khang, nührünü khüunü khüu jing thsütohjütang.

¹⁵ Ihnü nührü te nguchicho roh-i nührünü nguchinung nengdang, Ihnü adüzü khüdu ngusohko.

¹⁶ Ihnü nührü te yutsatsa yore: ayurü süsü Abüdongrü tenü adiuba mah, ko yusi hirü süsü riwüsohbong tenü adiuba mah.

¹⁷ Adelü nührünü hiba yuje tsü müdheko, nührünü hütsü bichikhang nührü khütoi akünyang thsanung!

¹⁸ “Ihnü nührü atümung nengdang müchore; Ihnü throchehrü Ihnü müdhele. Ta amüsa yunü hita yocho tikehnungbae, ‘Ite marita tsuba tsü Ih nyüm yacho.’

¹⁹ Khode hi tikehnang nührünü ‘Ih tsü Abie’ pü müdhenung nengdang Ihnü hi mütikeh-e yojungre.

²⁰ Ihnü nührü te yutsatsa yore: Sünü Ihnü riwüsohba nyitsarü khyüchonang abinü Ih khyüchore; ko sünü Ih khyüchoro abinü I riwüsohbong khyüchore.”

Jisu-nü Abi Kihyochünung Yojungre

²¹ Jisu-nü hi yoko khanglang, alüm dee tohchonü abinü khohcheh yocho, “Ihnü nührü te yutsatsa yore; nührü yola nyüh khüdunü Ih kihyochünung.”

²² Abinü sükhu yorünang nyekanü monotinü arüh-e arührü dhingtacho.

²³ Mono yola khüdu, sü Jisu-nü müicho, abi Jisu chidong pümcho.

²⁴ Simon Peter-nü abi chah nahmakejo yocho, “Sükhu chorünang abi te tsingdhing.”

²⁵ Hütsünü abinü Jisu yanglang khü hapkeh wüpü tsingdhingcho, “Abüdongba, hütsü süo?”

²⁶ Jisu-nü lalingcho, “Ihnü hikih la hümdhse dhsangpü sü khyang jünang hütsü abi thsanung.” Hütsüpü abinü hümdhse azikyah khyo dhsangcho, ko hütsü Simon Iskariot tsurü Judas khyang jücho.

²⁷ Judas-nü hümdhse tsü khyüyeng abi chah Satan züducho. Jisu-nü abi te yocho, “Nüh tu nguchinung lirünang zah nguching!”

²⁸ Tuepü Jisu-nü abi te hi yorünang yangtsu chah pümrü aparü sünüsü münyichehcho.

²⁹ Judas tsü thsibong yohpürü thsachonü, Jisu-nü abi te thsüti nengdang arüh dhsütah wü lihnung mahkhang ailümrü khyang lango jünung yorepü mono yola khürünü lümcho.

³⁰ Judas-nü hümdhse tsü khyücho ko hütsüde tsünü tsipehcho. Hütsü amala thsacho.

Yuzeng Asi

³¹ Judas tsiko khanglang Jisu-nü yocho, “Ade Nyitsarü Tsurü ahechi mishako; ko abi chah Tsingrangba mishako;

³² ko Tsingrangba ahechi abi chah mishakhang, Tsingrangba-nü Nyitsarü Tsurü ahechi tsü apu chah mishanung, ko abinü khüdupinü hechijünung.

³³ I tsurüti, Ih nührü te anyahli mülinung. Nührünü Ih yangchinung, ta Ihnü Jihudarü langnürüte yocho roh-i, ade Ihnü nührü te yore, ‘Ih khüilang würo hütsülang nührünü mürochehnung.’

³⁴ Ko Ihnü ade nührü khyang yuzeng asi khüdu jüre: Nührü khüdunü khüdu te müitaang. Ihnü nührü müicho roh-i nührü khüunü khüu te müitaang.

³⁵ Nührü khüdunü khüdu te müitakhang, atümungnü nührü I monoepü müdhenung.”

Peter-nü Münyengchonung Jisu-nü Yojungre

³⁶ Simon Peter-nü abi te tsingdhingcho, “Abüdongba, nüh khüilang wünung?” Jisu-nü lalingcho, “Ih khüilang wünang nühnü adelü mürochehnung; ta akhanglang du iirochehnung.”

³⁷ Peter-nü tsingdhingcho, “Abüdongba, khütapü ade Ihnü nüh mü-iirochehnung? Nü nengdang sünung Ih rungnüm lile!”

³⁸ Jisu-nü lalingcho, “Nühnü I nengdang sünung yuje rungnüm lirü ang? Ihnü nüte yutsatsa yore: Hüna mükhongde nühnü Ih mümüdhepü asangpili yonung.”