JOHAN 12 - AMÜSA BAIBEL (BSI)

Bethany la Jisu Chah Müyühjücho

¹ Phungkhu Thsüti nyümong dhüroh linü, Lazarus, sü asücho lanü kanglisohcho abi liba Bethany yang Jisu wücho.

² Hütsüla arühnü abi nengdang tsuyongnung rungnümjücho, ko Martha-nü chahlacho; ko Lazarus mii Jisu yola tsuyong chah pümrü yola zehcho.

³ Hütsüde Mary-nü angang athsah axümlichi tuji liter achangsho hiro Jisu jingchah tungkehjü akuvanü nipehjücho. Axümlichi tsünü kuh jengcho.

⁴ Jisu mono yola khüdu, Judas Iskariot, sü abi kihyochüjünung libanü yocho,

⁵ “Hiba axümlichi tuji hi tuepü denari thsih asang ngang ipü thsi tsü ailümrü khyang müjücho?”

⁶ Hi abinü ailümrü rahtahchonü yocho mah, ta abi aführü thsachonü yocho. Abi tsü thsi zahkehrü thsacho ko hütsü lanü apu dhsütah khyo bichicho.

⁷ Ta Jisu-nü yocho, “Yah pehjüng! Abükyü liba tsü I merang nyümong nengdang yohpüsohng.

⁸ Ailümrü lede nührü te linung, ta Ihlü nührü te lede mülinung.”

Lazarus Nyüm Arah

⁹ Nyitsarü atümungnü Jisu Bethany la lilepü yuchicho, ko arühnü Jisu nengdang du mah, ta Lazarus, sü Jisu-nü asü lanü kanglisohcho abi dhingrithsa wücho.

¹⁰ Hütsünü Bebü ayingtinü Lazarus mii müpsehnung arah külüpcho,

¹¹ tunüo abi thsacholanü Jihudarü adrongnü arüh pehjüpü Jisu chah yudsicho.

Jerusalem la Akoh Ngu Züducho

¹² Nyümong khüu tsü sühdi arangcheh sürü Phungkhu Thsüti lang rocho arühnü Jisu Jerusalem lang tsehlepü yuchicho.

¹³ Achotsü arühnü Seva khung bipü abi mütohnung hita züde wücho, “Hosana! Abüdongba nengla sü roro Tsingrangba-nü abi müwajüng! Tsingrangba-nü Israel yangthsaba müwajüng!”

¹⁴ Jisu-nü Gaduza khüdu ngu hütsü chah pümcho, amüsa yunü yocho roh-i,

¹⁵ “Tüdrü, Zion Yangdi! Dhing, nü yangthsaba Gaduza khüdu chah pümpü tsehle.”

¹⁶ Monotinü akhudilü hi münyichehcho; ta khode Jisu hechicho, hütsüde du yu hi abi nengdang thrahchoepü arühnü abi chah hi nguchikopü lümchehcho.

¹⁷ Jisu-nü kong lanü Lazarus dsimüsu asücho lanü kanglisohde abi yola zehrütinü atikehcho nengdang tsü yuzi jücho.

¹⁸ Hütsü ngangnü sühdi tsünü wü abi shirücho, tunüo abinü thsayahiya hütsü nguchichoepü arühnü yuchicho.

¹⁹ Hütsüde Farisirü-nü arühbürü chotanü yocho, “Dhing, Ihsanü seh mükohjungre! Liküpshünü abi khanglang wüle!”

Greek-rü khürünü Jisu Yangchicho

²⁰ Jerusalem lang thsüti bekhyahla mübünung würü yola Greek-rü khürü zehcho.

²¹ Arühnü Filip yanglang wü (abi Galil la Bethsaida lanü licho) yocho, “Adirü, Ihrünü Jisu shirünyüre.”

²² Filip-nü wünü Andreu te yocho, ko anyünü wü Jisu te yocho.

²³ Jisu-nü arüh te lalingcho, “Nyitsarü Tsurü ahechi arangcheh khyüchonung becho chihko.

²⁴ Ihnü nührü te yutsatsa yore: Fürü püm-o tsü alih la long müsühkhang anabi du jore, ta abi sühkhang abinü asih khütango sihre.

²⁵ Sünü palu akang müiro hütsü changnung; sünü hiba limih la palu akang thrünyiro abinü hütsü müchangkaba akang nengdang yohpüre.

²⁶ Sünü Ih dikehnyüro, abinü I khanglang iirobae, hütsünü Ih khüde linang I dikehrüsü hütsüla linung. Ko sünü Ih dikehro I U-nü abi dhichinung.

Jisu-nü Apu Sünung nengdang Chocho

²⁷ “Adelü I lasih thsangnyangre, Ihnü tu yonung? ‘Uwa, hiba shikhe hi I chah türosoh pü yonung mah-o’? Ta hiba chongcha shikhe hi khunung nengdang du Ih rocho.

²⁸ Uwa, nü neng hechisohng!” Hütsüde ninglangnü yuva khüdunü chotacho, “Ihnü hechijüko ko Ihnü adesü hechijünung!”

²⁹ Hütsüla yaba sühdi tsünü yuva tsü yuchicho, ko khürünü yocho, hütsü ningki, ta khürünü yocho, “Riwürü khüdunü abi te chotako!”

³⁰ Ta Jisu-nü arüh te yocho, “Hiba yuvanü chotaba tsü I nengdang mah, ta nührü nengdang lile.

³¹ Ade hiba limih yukhanung bekhyah; ade hiba limih yangthsaba iipehnung.

³² Khode Ih alih lanü dhikehnang, Ihnü atümung Ipu yanglang no khyünung.”

³³ (Hi yochonü khütari chongchanü abi sünung hütsü ngusohcho.)

³⁴ Sühdi tsünü lalingcho, “Mesia tsü müchangkapü linungepü ihrü yuzengnü yore. Khang nühnü khütapü Nyitsarü Tsurü tsü dhikehnung pü yoro? Hiba Nyitsarü Tsurü tsü süo?”

³⁵ Jisu-nü lalingcho, “Atsingse tsü nührü yola azachah du linung. Amanü nührü mübhünüpnungthsa nührü te atsingse lidenü tsehng; tunüo sü amala tsehro abi khüde würünang abinü mümüdhe.

³⁶ Atsingse nührü te lidenü nührü atsingse tsurü kangnungthsa atsingse chah yudsing.” Jisu-nü hi yopü, abinü shehmüi arüh tenü rangkhucho.

Nyitsarünü Müyudsicho

³⁷ Abinü arüh bete amüdhethsa hütsütoi nguchinyesü, arühnü abi chah müyudsicho;

³⁸ hütsü azikehrü Isaya-nü chocho tikehnung nengdang licho: “Abüdongba, sünü ihrü yusi yudsicho? Sürü te Abüdongba-nü abi zii mishacho?”

³⁹ Hütsünü arühnü müyudsichehcho, tunüo Isaya-nüsü yocho,

⁴⁰ “Tsingrangba-nü arüh nah tohsohcho, ko arüh lüm shütijücho. Hütsünü arüh nahnü müngunung, ko arüh lümlongnü münyichehnung, ko arühnü I yanglang arüh kyangsohnung müximülanung pü Abüdongba-nü yore.”

⁴¹ Isaya-nü hi yocho, tunüo abinü Jisu ahechi ngucho ko abi nengdang chocho.

⁴² Jihudarü langnürü adrongnü Jisu chah yudsicho; ta arüh Sinagog lanü iipehkhang mütsapü Farisirü drülangnü arühnü misha münyengchocho.

⁴³ Tunüo arühnü Tsingrangba nengse tenülü nyitsarü nengse du alaa müicho.

Jisu Yunü Yukhacho

⁴⁴ Jisu-nü züdenü yocho, “Sünü I chah yudsiro, I chah du mah ta I riwüsohbong chahsü yudsire.

⁴⁵ Sünü Ih nguro abinü I riwüsohbong sü ngure.

⁴⁶ I chah yudsirü müipi amala mülisohnung nengdang, Ih atsingse roh-i limih yang rocho.

⁴⁷ Khürünü I yusi yuchipü mübichikhang, Ihnü abi yu mükhanung. Tunüo, Ih limih yukhanung müro, ta hütsü khümchonung rocho.

⁴⁸ Sünü Ih mükhyüchoro ko I yusi mükhyonang, abi yukharü khüdu lile. Achangka nyümongla Ihnü choba tsünü abi yu khanung.

⁴⁹ Hi yuje, tunüo Ipu lümyunü mücho, ta Ihnü tu yonung ko tu chonung hütsü Au sünü Ih müthehcho apunü I khyang yuzengjücho.

⁵⁰ Ko abi yuzi tsünü müchangkaba akang jürepü Ihnü müdhele. Hütsünü Ihnü tu choro, hütsü Aunü Ite chonung yochoba lile.”