JOHAN 11 - AMÜSA BAIBEL (BSI)

Lazarus Sücho

¹ Bethany la liba nyüh khüdu anengnü Lazarus füdhsa licho. Bethany tsü Mary ko afü Martha nyüh liba yangdi tsü licho.

² (Mary hinü Abüdongba jingchah axümlichi tuji tungkehjüpü abükyü kuvanü nipehjücho; füdhsaba tsü abükyü ani Lazarus licho.)

³ Afü nyüh tsünü Jisu yang yusi mütheh yocho: “Abüdongba, nühnü müibong füdhsa lile.”

⁴ Khode Jisu-nü hütsü yuchicho, abinü yocho, “Hiba füdhsa hi asünungthsa mah; hi Tsingrangba hechinung nengdang, ko hi khunü Tsingrangba Tsurü hechisohnung.”

⁵ Jisu-nü Martha ko ani ko Lazarus müicho.

⁶ Ta khode abinü Lazarus füdhsalepü yusi yuchicho, abinü hütsüla nyümong anyüh alaa pümcho.

⁷ Hütsüpü abinü monoti te yocho, “Ihsanü Judea lang thali wünung.”

⁸ Monotinü lalingcho, “Adorü, atüzitü du tsü hütsüla lirütinü nü chah lungnü müpnung yangchicho; ko nüh hütsülang thali wünyürü ang?”

⁹ Jisu-nü yocho, “Anyümong khüdula rehtseh dhüreanyüh mahrü do? Sünü atsingsela rachinang jing mümüthire, tunüo abinü hiba limih atsingse ngure.

¹⁰ Ta abinü amala rachikhang jing müthire, tunüo abi atsingse mühle.”

¹¹ Jisu-nü hütsü yopü hi lahkehcho, “Ihsa müyangba Lazarus yüpseh tsiko, ta Ih wünung ko abi khamüsunung.”

¹² Monotinü lalingcho, “Abi yüpseh tsicho thsakhang, Abüdongba, abi kyangpehnung.”

¹³ Jisu-nü yoba tsü Lazarus sücho nengdang, ta aje yüpsehcho nengdang abinü yorepü arühnü lümcho.

¹⁴ Achotsü Jisu-nü arüh te khohcheh yocho, “Lazarus süko,

¹⁵ ta Ih abi te mülicho tsü nührü nengdang Ih künyangre, hütsü dunü nührünü yudsinung. Ihsanü abi yang wünung.”

¹⁶ Thomas (arüp tsurü dsiba) nü arüh müyangrü monoti te yocho, “Abi te sünungthsa Ihsa atümung adoba yola wünung!”

Kangli Roba ko Akang

¹⁷ Jisu ro chihde, Lazarus merangpü nyümong müyü tsipü thsacho.

¹⁸ Bethany tsü Jerusalem lanü Lutri asang mii müthsacho,

¹⁹ ko ani sücho nengdang Martha e Mary nyüh lüm kihchonung Judearü adrong ro licho.

²⁰ Khode Martha-nü Jisu tsehlepü yuchicho, abükyünü abi mütohnung wücho, ta Mary-lü kuh la pümcho.

²¹ Martha-nü Jisu te yocho, “Abüdongba, nüh hila lirelang, Ini müsüba thsako!

²² Ta ade mii nühnü tu chingnang Tsingrangba-nü nü khyang jünungepü Ihnü müdhele.”

²³ Jisu-nü abükyü te yocho, “Nüni kangli ronung.”

²⁴ Abükyünü lalingcho, “Abi achangka nyümong kangli ronungepü Ihnü müdhele.”

²⁵ Jisu-nü abükyü te yocho, “Ih kangli roba ko akang. Sünü I chah yudsiro abi sünye akang linung;

²⁶ ko sü akang linang ko I chah yudsinang khodesü müsünung. Nühnü hi yudsirü mah-o?”

²⁷ Abükyünü lalingcho, “Ho, Abüdongba! Alimih yang ronung liba Tsingrangba Tsurü Mesia tsü nüh-epü Ihnü yudsire.”

Jisu-nü Tracho

²⁸ Martha-nü hi yopü khanglang, abükyünü wü ani Mary rang dsinü yocho, “Adoba hila lile ko abinü nüh yangchile.”

²⁹ Mary-nü hi yuchi, zah shemüsu abi shirünung dhsüdhsa wücho.

³⁰ (Jisu ro yang tsü müchie, Martha-nü mütohba müdümla du tsü licho.)

³¹ Nyitsarü sürü Mary te kuh la abükyü lümkihcho licho, Mary shemüsu dhsüdhsa tsicho ngu abükyü khanglang iiwücho. Abükyü tsü konglang atranung würepü arühnü lümcho.

³² Hütsüde Mary-nü Jisu licho ro chihcho, ko abi ngu dunü ajingte mükhukeh yocho, “Abüdongba, nüh hila lirelang, Ini müsüba thsachoe!”

³³ Khode Jisu-nü abükyü ko abükyü yola rorüh tra ngucho; alasih la thahpücho, ko dee dhsa lümcho.

³⁴ Abinü arüh te tsingdhingcho, “Nührünü abi khüde dhrürangcho?” Arühnü lalingcho, “Abüdongba, Rung ko dhing.”

³⁵ Jisu-nü tracho.

³⁶ Nyitsarütinü yocho, “Dhing, abinü khütoh-i abi müiro!”

³⁷ Ta khürünü yocho, “Abinü anahtohba mükyangjücho do? Khang, abinü Lazarus müsüsohnung mükohcho ang?”

Lazarus Kanglisohcho

³⁸ Jisu-nü adesü amüsithsa lümnü konglang tsü wücho, hütsü Lungkhi kong ko trahtri la lung khüdunü dhitipücho.

³⁹ Jisu-nü yuzengjo yocho, “Lung tsü dhipehng!” Asüba afü Martha-nü yocho, “Abüdongba, adelü asüh xümnung, tunüo dhrürangpü amüyü nyümonge!”

⁴⁰ Jisu-nü abükyü te yocho, “Nühnü yudsikhang Tsingrangba ahechi ngunungepü Ihnü nüte müyocho mah-o?”

⁴¹ Hütsüde arühnü lung tsü dhipehcho. Jisu-nü ninglang dhingnü yocho, “Uwa, nühnü I yu yuchichonü Ihnü nü nengsere.

⁴² Ko nühnü lede I yu nyirepü Ihnü müdhele, ko hila yarütinü nühnü Ih müthehchoepü yudsinung nengdang Ihnü hi yore.”

⁴³ Abinü hütsüta choko khanglang, yuva athsengnü dsi yocho, “Lazarus chürung!”

⁴⁴ Hütsüde ajing akheh me shünü yüpü ko aromih shünü müshütipü abi chürocho. Jisu-nü arüh te yocho, “Abi lehchehjüng ko tsisohng.”

Jisu Nyüm Arah

⁴⁵ Mary xodhingnung roba nyitsarütinü Jisu-nü nguchicho ngu abi chah yudsicho.

⁴⁶ Ta khürünü Farisirü yang wünü Jisu-nü tu nguchicho hütsü arüh te yocho.

⁴⁷ Hütsünü Farisirü ko bebü ayingtinü ashimükhong li yocho, “Ihsanü tu nguchinung? Hiba nyitsarünü nguchiba thsayahiyati apüm tsü dhingdhing!

⁴⁸ Ihsanü abi hita du pehjükhang, atümungnü abi du yudsinung ko Roman tasenü Ihsa nyümnung ko Ihsa Amübükuh ko Ihsa yanglih thsangnyangjünung!”

⁴⁹ Arüh yola nyüh khüdu, anengnü Kaifas, sü hütsü kang Bebü Amungthriba licho abinü yocho, “Nührünü tu mümüdhe!

⁵⁰ Yanglih apüm changnung tenülü apüm nyükheh nyüh khüdu sünung nührü nengdang atsauepü mülümchehrü ang?”

⁵¹ Hi abinü alümyunü müyo, ta hütsü kang abi amungthriba bebü thsachonü, abinü Jisu tsü Jihudarü nengdang sünungbae,

⁵² ko arüh nengdang du mah, ta tsisho liba Tsingrangba tsurüti afü khüdula nübülungnung nengdang abinü hi chocho.

⁵³ Hütsü nyümong tinü Jihudarünü Jisu süsohnung arah külüpcho.

⁵⁴ Hütsünü Jisu-nü Judea la misha mürachicho, ta abinü Efraim dsiba yangdi lang lipilih shündhün wü hütsüla amonoti yola licho.

⁵⁵ Phungkhu Thsüti shikhe amünyeh licho ko thsüti bekhu arüh jangjang müsachehnung Jerusalem lang khütango tuwücho.

⁵⁶ Arühnü Jisu yangchicho, ko arühnü Amübükuh la shibülungde, khüdunü khüdu te tsingdhingtacho, “Nührü nüsü tu lümro? Abi thsüti lang yuje müronung mah-o?”

⁵⁷ Arühnü abi rangnung nengdang, Jisu khüde lirünang khürünü müdhekhang, hütsü youngpü bebü ayingti ko Farisirütinü yuzengjücho.