JOEL 3 - AMÜSA BAIBEL (BSI)

Tsingrangba-nü Yukhanung

¹ Abüdongba-nü yore, “Hütsütade Ihnü Juda ko Jerusalem khyang pungrohirojünung.

² Ihnü yucho apüm nübülungnung ko Yukha Ngah yang noronung. Hütsüla arühnü I nyitsarü te nguchicho apüm nengdang Ihnü arüh yukhanung. Arühnü limih pa jeng Israelrü tsishosohcho, ko I lih, Israel changnahcho.

³ Akümtsirü sü khyünung pü arühnü zii thsadhingcho. Mabomashi ko yongkha la pehnung nengdang arühnü adhrezarü ko khingkuzarü ayurü kang icho.

⁴ “Tyre, Sidon ko Filistia mükyah la lirü, nührünü Ite tu nguchinyüro? Nührünü I khyang lango nengdang thali jünyürü mah-o? Nührünü jüekhang, Ihnü zah nührü khyang jülinung.

⁵ Nührünü Iyo taripi ko hon ko I thsidi kuthsi khyo nührü amübükuh la hiyohko.

⁶ Nührünü Judarü ko Jerusalemrü arüh lih lanü ashu nowü Greek-rü te iko.

⁷ Ade nührünü iba müdümti lanü Ihnü arüh nüchehnung. Nührünü arüh te nguchicho kyo Ihnü nührü te nguchinung.

⁸ Nührü tsurü ko tsularüti Judarü khyang isohnung; arühnü ashula liba Sebea-rü khyang arüh imüchisohnung. Ih Abüdongba-nü choko.

⁹ “Hi yuchoti te sobhoung: ‘Khatanung rungnüm; athrungrüti dsibülung; nührü rothsarüti atümung dsibülung ko shemüsung!

¹⁰ Luhxüba idhse mühi tsünü nohsheng ko za xaba nohchang tsünü thsuh keng. Sumüzehrünü mii Ih athrungrüepü yosohng.

¹¹ Nührü mükangmüshü liba yuchoti, dhsüdhsa rung ko angah la tsü shibülung.’” O Abüdongba, arüh mahnung Nü rothsarü jürosohng.

¹² “Yuchotinü rungnümpü Yukha ngah la tsü rung. Hütsüla Ih, Abüdongba-nü mükangmüshü yuchoti apüm yukhanung.

¹³ Arüh khura mütsa; Maxade kyo arüh kingthrüm; anyehbala kih pohcheh shükusih nyehcho kyo arüh nyehkung nyehng.”

¹⁴ Sühdinü sühdi Adhrongcheh Ngah la lile! Tunüo dhrongcheh ngah la Abüdongbarü nyümong tsü amünyeh lile.

¹⁵ Nyü ko chonu marürah kangnung, ko chenghitinü adelü müvinung.

Tsingrangba-nü Amüyurü Müwajünung

¹⁶ Abüdongba-nü Zion zong lanü rengre; Jerusalem lanü Abinü mütiire; Ning ko alih dhridhrire. Ta Abinü amüyurü khümnung.

¹⁷ “Hütsüde, Israel, Ih Abüdongba nührü Tsingrangepü nührünü müdhenung. Iyo Amüsa khang, Zion la lire. Jerusalem tsü Amüsa yangdi linung; yangpirünü hütsü khodesü mükochehnung.

¹⁸ “Hütsütade azong tsü shüsinü shütinung, ko akhang müipi chah nyikih pohnung; Juda la yongkhi apüm la kih bholo pohnung. Abüdongba Amübükuh lanü Yongna khüdu pohnung, ko hütsü Akacia Ngah züjengnung.

¹⁹ “Ijip tsü lipilih kangnung, ko Edom apehcho yang kangnung, tunüo arühnü Juda lih mahcho ko achomükeh nyitsarü kyüsehcho.

²⁰ Ihnü akyüsehrü rühyangnung; Ihnü athsamehrü tsü müpehjünung.

²¹ Ta Juda ko Jerusalem la müchangka linung, ko, Ih, Abüdongba, Zion Zong la linung.”