JOEL 2 - AMÜSA BAIBEL (BSI)

Khengqu tsü Abüdongba Nyümong Amüdhethsa

¹ Rühti tsü mehng; Tsingrangba Amüsa khang, Zion la seyohchüng. Dhridhrieng, Judarü! Abüdongba nyümong zah role.

² Hütsü amarürah ko ningkhüm nyümong, anyahthrüm ko shütiba nyümong thsanung. Amarürahnü azong shüticho kyo khengqu tii amülah rore. Hi kyo khodesü mütikehdhing, ko khodesü mütikehnung.

³ Michangnü kyo arühnü singdongti tsukhangre. Arüh bekhu alih tsü Eden Tbü kyo, ta arüh khanglanglü akung lipilih lile. Tunüsü arüh bete mütsiphure.

⁴ Arüh tsü kuri kyole; arühnü khata kuri kyo shangre.

⁵ Arühnü azong khang chah khyakehde, akhüluba kyo khongre; michang la za akungcho mürucho kyo arüh tsohre. Rothsa wünung athrungrü sühdi roh-i arüh tsübülung yacho; arühnü tungrita yare.

⁶ Arüh chii rode, atümung drüre; atümung romih pha-a kangre.

⁷ Mongchiirü kyo arühnü betire; arühnü rothsarü kyo tbü chah tuwüre. Arühnü müchongkhüti mümülichipü mahkhang apa langla müwüre.

⁸ Tbü khu arühnü rümkhure, ko tunüsü arüh müyaticheh.

⁹ Arühnü yangdi lang tsü tsohkhutare; arühnü tbü michah shangre; arühnü kumung chah küdure ko aführü kyo nyübongkhi khu züdure.

¹⁰ Arüh rode alih shühchire; Ning dhridhrire. Chonu ko nyü mapehre, ko chenghinü müvipehre.

¹¹ Abüdongba-nü Abi rothsarüti te züde yuzeng jüre. Abi te yocho nyirüti tsü adrong ko re azeh. Abüdongba nyümong tsü khüta adrünung! Sünü hütsü rangnung?

Lasih Thsamülanung Kihchicho

¹² “Ta Abüdongba-nü yore” Ade dusü “nührünü lasih apümnü kongnü ko tranü ko meshünü Ih yang ximülaang.

¹³ Nü lasih thsangnyang nü wahcho ngusohng; nü jengki rehnahcho tsünü mükükyü.” Abüdongba nü Tsingrang yang thali rung. Abi amüi ko yanglilümnü jeng lile; Abi arangcho ko anyengchocho yohpüre; Abinü mükhingchipü lede mülang pehjünung rungnüm lile.

¹⁴ Kümüdeo Abüdongba nührü Tsingrang-nü alasih thsamüla nührü khyang tsahma khütang müwajünung kohle. Hütsüde nührünü Abi khyang fürü ko shükusih amübü jünung.

¹⁵ Zion khang chah rühti tsü mehng; kongnung yuzeng jüng ko ashimükhong khüdu dsichoung!

¹⁶ Nyitsarü tsü müjang shibülungsohng; ashibülung müsachehsohng; azirüti shibülungsohng; azarüti ko akhungarü mii shibülungsohng. Kusi thrirü mii arüh kuh pehjüpü rosohng.

¹⁷ Bholu ko Amübükuh kahla Abüdongba dikehrü bebürütinü traang ko dangkhidangnang. “Abüdongba, Nü müyurüti chomang. Yucho parünü ihrü müthsamünyü ihrü te, ‘Nührü Tsingrang khüde liro, pü tüyosoh.’”

Tsingrangba-nü Alih sulisohre

¹⁸ Hütsüde Abüdongba-nü apu lih müi lümcho; Abinü apu nyitsarü te yanglilümcho.

¹⁹ Abinü arüh te lalingcho: “Ade Ihnü nührü khyang fürü, shükusih ko olive tuji jünung, ko nührü longxonung. Aparü yuchotinü adelü nührü mümüthsamünyünung.

²⁰ Kihku langnü roba khengqu tii tsü Ihnü khyümüinung, ko lipilih yang arüh khürü iipehnung. Arüh alangkhüru Asü kihdi yang ko amüyinglangrü Mediteranean lang iipehnung, arüh me tsü xümnung. Nührü te hitoi nguchicho ngang Ihnü arüh changjünung.

²¹ “Tüdrü alih, Longphieng ko künyang tunüo Abüdongba-nü nguchi amülah nguchiko.

²² Tüdrü kanglungrü. Rangnu chilangko; singdongnü asih sihre, ngurüsih ko shükusih bholo lile.

²³ “Künyangtaang, Zion-rü, Abüdongba nührü Tsingrang-nü nührü shulüm nguchicho nengdang künyang. Abinü nührü khyang mamüki tsing kükyo jüko; Abinü tsingkang tsing ko mürüpmünu tsingsü nührü khyang rosohko.

²⁴ Pungkhyang führünü jeng linung; shükusih ko olive tujinü anyehsing mülümthoh linung.

²⁵ Khengqu tiinü nührü tsahma tsuba kangtila changba tsü Ihnü thali jünung. Hütsü Ihnü nührü nyüm müthehcho.

²⁶ Adelü atsunung kükyo linung, ko longxo lieng. Nührünü Abüdongba nührü Tsingrang sünü nührü shulüm anyemüyangnung nguchicho Abi senung. Adelü I nyitsarü khodesü mümüthsamünyüsohnung.

²⁷ Hütsüde, Israel, Ih nührü te lile, ko Ih Abüdongba, nührü Tsingrang ko apa süsü mühlepü nührünü müdhenung. Adelü I nyitsarü khodesü mümüthsamünyüsohnung.

Abüdongba Nyümong

²⁸ “Akhanglang atümung chah I nbü mükhakehjünung: Nührü tsurü ko tsularütinü choyohnung; nührü ashirütinü melang melangnung, ko nührü dhrezarütinü münguchehnung.

²⁹ Hütsü nyümong, kulirü ko kulilarü chah mii I nbü mükhakehjünung.

³⁰ “Ning ko alih chah hütsü nyümong nengdang amüzahnung amüdhethsa ngusohnung; hütsüla shühkhatoh, michang, ko mikhu nyükhi linung.

³¹ Abüdongba nyümong amülah ko adrünung müroede, nyü tsü mapehnung ko chonu tsü ashüh kyo mohnung.

³² Ta Abüdongba te dsirü atümung khümchonung. Abüdongba-nü yocho kyo. ‘Atsichehrü Jerusalem la linung; Ihnü throchehrüti akang linung.’”