JOEL 1 - AMÜSA BAIBEL (BSI)

¹ Pethuel tsurü Joel te Abüdongba yusi tsü hi.

Tsahma Changcho Longricho

² Hi nyieng, nührü azirüti; nyieng, Juda la lirü atümung. Hi kyo nührü chichah mahkhang nührü tpurü chichah mütikehdhingo?

³ Nührü tsuzarü te hi nengdang young; arühnü arüh tsuzarü te yonung, ko arühnü aronung shang te yomüchinung.

⁴ Khengqu atii atii tsahma chah tsü pümcho; Tiionü nyingcho tsü, apa tiionü tsukhangcho.

⁵ Jesung ko traang, nührü amücharüti; züdeing, nührü yongkha yongrüti; yongkha asi külüpba shükusih tsü thsangnyangpehko.

⁶ Khengqu atiinü Ihsa lih betiko; arüh khütang re azeh ko mükhilong; arüh ha tsü kangdi ha kyo akoh.

⁷ Arühnü Ihsa shükusiluh thsangnyangjüko ko ngurüsih dong münachehpehko. Arühnü ajengzati thru kangnü aküp müzahcheh tsuko.

⁸ Lazarü khüdunü abükyü xengnung liba adhrerü khüdu sücho metracho kyo, nührünü traang.

⁹ Amübükuh la amübü jünung fürü mahkhang shükusih mühle; bebürütinü meshüre tunüo Abüdongba khyang mübünung tu mühle.

¹⁰ Luh tsü adenge; Fürü thsangnyangchonü, Shükusih kungchehpehchonü ko olive singdongti mükupehchonü alihnü longrire.

¹¹ Wahng, nührü luthsarüti; traang, nührü shükusiluh thsarüti, tunüo litoh, lüdi ko tsahma apüm thsangnyangko.

¹² Shükusih luh ko ngurüsih dong mükupehko; Singsilungsi apüm mükuseh süko. Nyitsarünü akünyang changpehko.

¹³ Müyahshü lüpkehpü traang, nührü bebürüti bholu chah dikehrü! Amübükuh la züdu müyüp meshüng! Nührü Tsingrang khyang amübü jünung fürü mahkhang shükusih mühle.

¹⁴ Kongnung yuzeng jüng; Ashimükhong dsichoung! Azibarüti ko Judarüti atümung nührü Tsingrang Abüdongba Amübükuh la shibülungsohng ko Abi te züdesohng.

¹⁵ Abüdongba nyümong tsü amünyethsa lile; Akohbongnü athsangnyang hiroba nyümong. Hütsüba nyümong tsü khüta adrünung thsanung!

¹⁶ Ihsa tsahma thsangnyangde Ihsa alongdi mühli dhingre. Ihsa Tsingrang Amübükuh la akünyang mühle.

¹⁷ Majühti tsü alih kungchonü süre. Akhyübülungnung fürü mühle; Hütsünü shih adeng sütpah lile.

¹⁸ Lamungchah mülichonü misünü longri khongre; santisü chongchare.

¹⁹ Ihnü Nüte züdere, Abüdongba, tunüo michangnü mürohcho kyo rangnu ko singdongti kungpehko.

²⁰ Rangmü kanglungrünü mii Nüte züdere, tunüo kihnati kungchehpehko.