JOB 8 - AMÜSA BAIBEL (BSI)

Bildad

^1-2 Nüh adeng yu choba tsü thümko ang?

³ Tsingrangba-nü yuje tsü khodesü mükhyümülare; Abinü athsalang nguchi khodesü mülahphehre.

⁴ Nü tsurütinü Abi nyüm amünyi shitpahpü linung, ko hütsü ngang Abinü arüh khingchichobae.

⁵ Ta ade ximülaang ko Akohbong Tsingrang te kihchieng;

⁶ nüh hitoi yuje ko amüsa thsakhang, Tsingrangba-nü ro nüh rükunung ko nü jiyüthsa nü kukhi thali külüpchijünung.

⁷ Hütsüde Tsingrangba-nü nü khyang jünung liba kuthsi tsü achangpehba apüm te mülihtachehnung.

⁸ Jümü lümlong tsü dhingdhing; Ihsa tpurünü nyichocho yuje tsü lümdhing.

⁹ Ihsa akang hi akhikyah du, Ihsanü tusü mümüdhe; Ihsa nbükhüm kyo limih khu lahkhure.

¹⁰ Ta jümü müdhemüthehrünü nüte dosohng; arühnü yoba tsü nyieng:

¹¹ “Kih mülila thoh müyare; arüh changtphü tenü za müngunung.

¹² Kih tsü kungkhang arüh akhu mükunung, kyü bichinung mah-enü.

¹³ Tsingrangba mümüdherü tsü hütsü kyole; Tsingrangba nbüchüde, arüh alongdi changre.

¹⁴ Arühnü sherila shepüm khüdu shürüshütpah chah longlangre.

¹⁵ Shürüshütpah chah ngakehde, hütsünü arüh ramehchehnung do? Arühnü she khüdu chah ramehde, arüh yachehnung do?”

¹⁶ Amütsarü tsü nyü hela za chicho kyole, tbü apüm la za tsüchehcho kyo.

¹⁷ Lung chah ara tsünü ratire ko lung üpüm chah khahkhah rakehre.

¹⁸ Ta arüh tsü rohchehde, hütsü chah rakeh lichoepü sünüsü mümüdhenung.

¹⁹ Ho, amütsarü akünyang tsü hütsü du; aparü ro arüh mülih yapehre.

²⁰ Ta Tsingrangba-nü yuje chorü khodesü müpehre, mahkhang amütsarü khodesü mürükure.

²¹ Abinü nüh münyüsohnung ko adesü züdesohnung,

²² ta nü thrünyirü chah Abinü ashah hirojünung ko amütsarü kukhi changpehnung.