JOB 7 - AMÜSA BAIBEL (BSI)

¹ Amüi tsurü akang hi rothsarü nguchi kyole, khee shehsherü akang khüdu kyole,

² ayurünü atbachi akhümki mükhyahcho; anguchirünü anyükheh ngang yingcho kyole.

³ Ih choonü choo adeng du lisohre; aromang romang alongri hirojüre.

⁴ Ih yüpnung ngakehde, bekhyah tsü zingshengre; Ih müyüp nyichire ko tsingsenung nahmürahre.

⁵ Ifü mücinü jengko; maxohnü tsütiko; madhsa lanü amükih shichehre.

⁶ I nyümongti alongdi mühli khukhangle, lahtsah tenü adsayaba khukhangle.

⁷ Lümchehng, O Tsingrang, I kang hi asah khüdu du; I akünyang tsü changkapehko.

⁸ Nühnü ade Ih ngure, ta khodesü thali müngunung. Nühnü Ih yangchide, Ih tsipehpü linung.

⁹ Changpehba nyükhi kyo, nyüh khüdu süre ko thali mürore;

¹⁰ abi müdherü apümnü abi nbüchüpehre.

¹¹ Doh! Ih naying mülicheh! Ih dee zichürore! Ihnü chonung.

¹² Tuepü Ih nyah yohpüro? Ih kihkangdi mah-o?

¹³ Ihnü ngakeh kyahshangnyüre. I dhsaba lanü akyangnung yangchire.

¹⁴ Ta Nühnü, melangnü Ih nehsohre; Nühnü müngucheh khu Ih drüsohre

¹⁵ Mürümürang shutsa hila linung tenü thsingseh sücho atsau lümsoh.

¹⁶ Ih müthohko; alichonü kyahpehko. Ih yah pehjüng. I akang hi tu mah.

¹⁷ Nyitsarü hi tu hitoh-i dhsütahro? Tuepü abi nguchi hitoi dhingyehro?

¹⁸ Nyangnyü mükhu Nühnü abi xodhingre ko bekhyah mükhu abi thsadsüre.

¹⁹ Ih müjü münyünung mii mütsa, I chah hitoi dhinglahnung ang?

²⁰ I münyinü nüh dhsakehrü mah-o, nüh adhingyehrü? Tuepü Ih nü thsadsüji thsaro? Ih nü nengdang hitoh-i bhamüling thsacho ang?

²¹ Nühnü khodesü I münyi müpehjünung do? I thsamehcho mülang müpehjünung do? Tunyah mülipü Ih kong la linung, ko nühnü Ih yangchide Ih tsipehpü linung.