JOB 6 - AMÜSA BAIBEL (BSI)

Job

^1-2 I chongcha ko alongri ahosing la ho-dhingrelang,

³ arüh tsü kihdi lihpi tenü amülingba thsanung, hütsünü Iyu akha yuchi tünyemüyang.

⁴ Akohbong Tsingrang-nü I chah tbüdengnü kyarangjüko, ko singkihnü Ifü jengko. Tsingrangba adrünungti Ih nyüm chung lile.

⁵ Gadu-nü zanu tsude mükhongre, misünü manying tsude sahmüthsare.

⁶ Ta adada ko mih müyohcho sünü tsuchehnung? Hünakyü athrula tu axümlichi kehro?

⁷ Hütsütari tsuyongnung I bela mükyüre, ko Ihnü tsuba lüpchonü Ih dhsangnangsohre.

⁸ Tuepü Tsingrangba-nü Ihnü chingcho müjüro? Tuepü Abinü Ihnü kihchicho mülalingro?

⁹ Ih du abi khyang kyüsehpehsohnyüle!

¹⁰ Abinü herelang, akünyangchonü tsohchinung, Ih khütoh-i dhsanye tu müthsa. Tsingrangba tsü Amüsaepü Ihnü müdhele; Abi yuzeng Ihnü khodesü müdhsongli.

¹¹ Lii wünung Ih tu re licho? Alongdi mülipü tuepü Ih linung?

¹² Ih lungnü külüpcho mah-o? Ifü hi imüyeng mah-o?

¹³ Ipu khümchonung I chah re nying mühle I tsikehchah khüdesü mühle.

¹⁴ Hita chongchade shangrükhung dhsütahle, Ihnü Tsingrangba thrüchahchüpehnye müthrüchahchüpehnye.

¹⁵ Ta nührü I shangrüti, tsing mürode kihna kungcho kyo, nührünü Ih kihyochüre.

¹⁶ Mürang ko müdhrangnü kihna tsü sühtire,

¹⁷ ta nyüdhsade arüh züchangre, ko kihna tsü kungcheh lire.

¹⁸ Shitsehrü kih yangchide chahkhangre; arüh lipilih la rümchi süre.

¹⁹ Sheba ko Tema lanü shitsehrünü kih yangchire,

²⁰ ta akungchehcho kihna te arüh alongdi changre.

²¹ Nührü tsü I nengdang hütsüri kihna kyole, nührünü I suro ngupü drü shehre.

²² I khyang jiyü jüngpü Ihnü nührü te yocho mah-o? Mahkhang I nengla pohsanung mahkhang arorüh

²³ ko amütsarü khürü khehlanü Ih khümchonung tsingdhingcho do?

²⁴ Ite doung; I thsamehcho young. Ihnü sahmüthsa nührü te nyinung.

²⁵ Yuje yunü kihchochehre, ta nührünü amükhyu chore.

²⁶ Ih adeng chorepü nührünü lümre; khang tuepü I lümdhama yu lalingro?

²⁷ Nührünü mürürü ayurü nengdang zii thsadhingre, ko nü shangrükhung michahnü nüpu alirü kangre.

²⁸ I romih chah dhing, Ihnü arahkheh müchonung.

²⁹ Nührü shura tsiko. Yuje mücholanü zahng. Ih tümülangjü, Ih athsalange.

³⁰ Ta Ih arahkheh roh-i nührünü lümre; Ihnü yuje müchochehnungepü nührünü lümre.