JOB 5 - AMÜSA BAIBEL (BSI)

¹ Dsidhing, Job, khürünü laling a mahnang. Nüh tsikehnungthsa riwürü khüdusü mülio?

² Nü jangjang longriseh sünunglü, amüsithsa athohmüzeh nguchi thsanung.

³ Atsikehchah yangchiba adohrü Ihnü nguko, ta Ihnü arüh kukhi la dhrongyeng chokehchola dsichojücho.

⁴ Arüh tsurü khodesü atsikehchah müngu; yukhachah sünüsü ya arüh mükhüm.

⁵ Yangseh lirünü adohrü chisicho ko zeng yola zicho fürü mii tsunung; müxümüngurünü akuthsi tsukhangjüre.

⁶ Amünyi tsü alihsu la mühzire, mahkhang alih lanü adhsangthsi müchürore.

⁷ Yutsatsa, nyitsarünü apu chah dhsangthsi hirore, michang lanü mihtsoh mülakeh tsicho kyo.

⁸ Ih tsü nüh-erelang, Ihnü Tsingrang yang I khiyu hi hinung.

⁹ Abinü nguchiba nguchi arangcheh hi Ihsanü münyicheh, ko Abi thsayahiya achangka mühle.

¹⁰ Abinü alih khyang tsing rosohre ko luh la kih xahre.

¹¹ Ho, Tsingrangba-nü alonglümrü dhimüsure ko alongrirü khyang akünyang jüre.

^12-13 Abinü rahmütsarü lümchung thsangnyangjüre, ko lümlong lirü arühbürünü chungchola xohsohre, hütsü khu arühnü nguchicho tusü akoh müngure;

¹⁴ nyüthungla mii arühnü amarürah la hümchire.

¹⁵ Ta Tsingrangba-nü mürürü asülanü khümchore; Abinü chongcharü asehchirü khehlanü khümchore.

¹⁶ Abinü ailümrü khyang alongdi jüre ko amütsarü be khangtijüre.

¹⁷ Tsingrangba-nü müchongchijürü akünyangnung; Abinü nüh khatade tüwah.

¹⁸ Abinü dhsakehjüre, ta rümjüre; Abi khehnü dhsakehjüre, ko Abi khehnü kyangjüre.

¹⁹ Dhsürü dhüroh lanü nüh khümchonung; dhünyeh-ula tunüsü nüh müdhsakehjünung.

²⁰ Yangkong rode Abinü nüh khümcho yohpünung, ko chitala asülanü nüh tsungtinung.

²¹ Tsingrangba-nü nüh müle sühsehrü chahnü khümchonung; achangka rode Abinü nüh khümchonung.

²² Shüh khatoh ko yangkongla nüh münyünung ko rangmü kanglungrü müdrünung.

²³ Nühnü xüba luh tsü lung müzehnung; rangmü kangdinü khodesü nüh müdhsakehjünung.

²⁴ Hütsüde nü kuh la nüh tbachi linung; nühnü nü santi dhingde, arüh müchahpü ngunung.

²⁵ Alih la zanu toi nü tsuzarü suhnung.

²⁶ Maxa kyang chihde litoh nyicho kyo, nüh kutsüp linung.

²⁷ Job, hi ihrünü anyahli khi yangchipü nyichocho lile. Hi yuje, ade hi khyüchoung.