JOB 42 - AMÜSA BAIBEL (BSI)

¹ Hütsüde Job-nü Abüdongba te lalingcho.

Job

² Abüdongba, Nüh re azeh-u; Nühnü lüpcho nguchichehcho Ihnü müdhele.

³ Ih tu mümüdhepü khüta Nüte ritaro pü Nühnü yoko. Ihnü münyichehba nguchi nengdang Ihnü choko, Ihnü müdhenung mükohba anyemüyangnung nengdang.

⁴ Nühnü chode Nüyu nyinung, ko Nüyu lalingnung yocho.

⁵ Hütsüde bürünü yocho du Ihnü müdhecho, ta adelü Ipu nahnü Nüh nguko.

⁶ Hütsünü Ihnü chocho apüm nengdang Ihnü shahre, ko tavi ko asongsongla su I lasih thsamülare.

Yuzika

⁷ Abüdongba-nü Job te chotakapü khanglang, abinü Elifaz te yocho, “Nüh ko nü shangrü anyüh te I zichürore, tunüo nührünü I dikehrü Job-nü kyo I nengdang yuje mücho.

⁸ Ade misüpung dhünyeh ko mizapung dhünyeh nüpü Job yanglang wünü nührübürü nengdang kangmübü jüng. Job-nü nührü nengdang dangkhidangnangjünung ko Ihnü abinü kihchicho lalingnung ko nührü chah aleng ashah mükhyüsohnung. Abinü kyo nührünü I nengdang yuje mücho.”

⁹ Elifaz, Bildad ko Zofar-nü Abüdongba-nü arüh te yocho kyo nguchicho ko Abüdongba-nü Job dangkhidangnang lalingcho.

¹⁰ Hütsüpü Job-nü amüyangrü asang nengdang dangkhidangnangjücho ko Abüdongba-nü abi thali müwajücho ko akhudi tenü anyüh shinü alaa abi khyang jücho.

¹¹ Job jünirü ko jünilarüti ko ashangrütinü abi xodhingcho ko abi kuh la thsüti tsucho. Abi chah Abüdongba-nü tikehsohcho chongcha apüm nengdang arüh alongri ngusoh abi lüm kihchocho. Arüh müipinü abi khyang thsi ko hon imüshi jücho.

¹² Abüdongba-nü akhudi tenü Job akang akhanglang alaa müwajücho. Job yo san hajar dhüremüyü, ut hajar dhüroh, misü hajar anyüh ko gadu hajar khüdu licho.

¹³ Abi adhrerü dhünyeh ko khingkurü asang au kangcho.

¹⁴ Abinü aukhutpü Jemima, anyüuba Kezia ko achangtpü Keren Happuk dsicho.

¹⁵ Limih la Job tsularüti tsah tsacho kyo süsü mülicho. Arüh aunü arüh khyang amung anirü te müjang thsiking nohlüm jücho.

¹⁶ Hütsü khanglang, Job kang thsih khüdupü yüre abi shümtsurü ko shang müyü shümtsurü ngu licho.

¹⁷ Hütsüta abi khütang shi lipü sücho.