JOB 41 - AMÜSA BAIBEL (BSI)

¹ Nühnü ngu hohsingnü Kijang hohchehnung do? Mahkhang rangdüshünü amüle rahchehnung do?

² Nühnü anaking la rangdüshü mahkhang aha la ngu hohsing yohjüchehnung do?

³ Abinü nüte abi tsisohng pü kihchinung do? Abi te müisohnung nüte kihchinung do?

⁴ Abinü akang ayung nüh dikehnung nyengcho yuzi külüpnung do?

⁵ Akangcho uza khüdu kyo nühnü abi rahchehnung do, nü kulilarü nyekanungthsa?

⁶ Nguh rangrünü abi chahnü jingchonung do? Airünü abi khanah inung do?

⁷ Ipinü nguküp la chirangjünung do, mahkhang idhse amühinü athah chirüpjüchehnung mah-o?

⁸ Abi chah khüdupi thahpüng ko nühnü khodesü thali müthahpünung; ruhtaba tsü nühnü khodesü münbüchünung.

⁹ Kijang ngurünü drüpehre ko alih la khülure.

¹⁰ Abi ruhmüsude, abi adrünung khüdu; sünüsü abi bete müyacheh.

¹¹ Sünü abi te ruhtapü müdhsakehnung? Limih la sünüsü hütsüta münguchicheh.

¹² Kijang jing nengdang nüte yonung ko abi khütoh-inang nüte changnah yonung.

¹³ Sünüsü abi küp mürohnahchehnung mahkhang abi chah khakhu müchicheh.

¹⁴ Adrünung aha kehba be tsü sünü khangthrujüchehnung?

¹⁵ Abi khangtung tsü tsungnü chungtiko, lungzinü kyo rahtiko.

¹⁶ Achungkehta tsü dee adrengdreng, anyüh kahla nyübongza mii müzüdu.

¹⁷ Arüh apüm dee drengdreng chungkehtachonü, tunüsü hütsü müzasohcheh.

¹⁸ Abi hahthide mongirürahre, ko anahtse tsü nyüchürocho kyo tehre.

¹⁹ Abe lanü mihmüle chürore, ko mihpi tsohcheh tsire.

²⁰ Anabong lanü mikhu shichehre, za trüpcho kyo.

²¹ Asah chichola michang trure; abe lanü mihmüle chürore.

²² Ahong tsü rezehrachonü, abi ngurü apümnü drüre.

²³ Aküp la tase müzeh müdüm mühle hütsü idhse kyo azi lile.

²⁴ Abi lung lasiking la tsü, adrüba mühle anyehsing lungzah kyo azi.

²⁵ Abi shemüsude, athrungrü mii drüre; arüh adrüchonü shehre.

²⁶ Tu nohshengnü abi lerohpehjünung mükoh; thsuh, tbüdeng mahkhang tbüza, tunüsü abi müdhsakehjücheh.

²⁷ Abi nengdang idhse tsü manying kyo ayingya, ko imüyeng tsü sing sühcho kyo anana.

²⁸ Abi drü tsisohnungthsa tbüdeng mühle, abi chah müpba lung tsü manying roh-i.

²⁹ Abi nengdang singking tsü manying roh-i, ko thsuh tsa müthehde abinü münyodhingre.

³⁰ Amiküp tsü füh lahnahcho lung akoh kyo; hütsünü manyehji kyo alih la chongbong tsü thsohnahre.

³¹ Abinü kihdi tsü tsüchi yaba kih kyo xünahre ko tuji füh kyo tsüchisohre.

³² Abi khu tsicho lang riri kangsohre, ko kihdi tsü müjümüphi kangsohre.

³³ Limih la abi te kihtanung tu mühle abi tsü tusü müdrüba kanglungrü.

³⁴ Kanglungrü amütsa apüm abinü mükhichire; rangmü kanglungrü apüm michah abi yangthsaba.