JOB 36 - AMÜSA BAIBEL (BSI)

^1-2 Azachah rangchoung ko Tsingrangba nengla Ihnü yoba hi khü nyidhing.

³ I lümlong achi-achüm-e; Ihnü I thribong Tsingrangba tsü yuje-epü ngusohnung Ihnü müdheba tsü bichinung.

⁴ Ihnü nüte yoba hi arahkheh mah; lümlong lirü tsatsa nü bete yale.

⁵ Tsingrangba tsü khüta re azeh! Abinü süsü mükhimüngu müthsare; Abinü münyichehnung tu mühle.

⁶ Abinü münyirü mülisohre, ko lede ailümrü yuje la bichire.

⁷ Abinü amüsarü tsungtire; Abinü arüh yangthsarü kyo thsasohre ko lede nengdang arüh dhichisohre.

⁸ Ta müyurü tsü ixilihnü rahkhang, arüh nguchi ngang chongchakhang,

⁹ Tsingrangba-nü arüh münyi ko müthseh ngusohre.

¹⁰ Arüh münyi lanü za linung, arüh khyang Abi yu ngusohre.

¹¹ Arühnü Abi yochonyi dikehkhang, arüh yangtsa ko pungrohiro linung.

¹² Hütsüta müthsakhang, arüh mümüdhe sünung, ko asülih yang yongkhi keh wünung.

¹³ Tsingrangba mümüdherünü ziichüro du lire, ko khingchinye, arühnü arüku ching mükihchire.

¹⁴ Arüh kunudenü süre, ashah khyo arüh akang changkare.

¹⁵ Ta Tsingrangba-nü chongcha khu nyitsarü te dore, ko alongri khu arüh nah khangthrujüre.

¹⁶ Tsingrangba-nü chongcha lanü nüh nüchehcho, ko nüh künyang yohpüre; Nü tsingthsang tsuyongnung atsanü jeng sühpüjole.

¹⁷ Ta ade nüh aleng ngang khingchire.

¹⁸ Pohsanü nüh mükihyochüsohnung müzahng, mahkhang kuthsinü nüh tünümülasoh.

¹⁹ Arüku chingchonü nüh tu müjingchonung; adelü nü tasenü nüh tu mütronung.

²⁰ Ama ronung tümükhyah, hütsü yuchoti changnung bekhyah.

²¹ Amünyi yang ximülanung müzahng; hütsülanü nüh ranglinung nüh yang chongcha müthehcho.

²² Tsingrangba zii khüta arangcheh hütsü lümchehng, atümung tenü Abi adorü adiuba.

²³ Tsingrangba te sünüsü tu nguchinung mahkhang amütsa nguchicho mülangjünung mükoh.

²⁴ Lede Abi nguchi ngang Abi sere; nühnüsü Abi seing.

²⁵ Atümungnü Abi nguchi nguko; ta Ihsanü hütsü ashulanü du ngure.

²⁶ Ihsanü Abi dicho ajeng müdhenung mükoh mahkhang Abi kang khidhingnung mükoh.

²⁷ Alih lanü kih khyüchehba tsü Tsingrangba, ko hütsü tsing kangsohre.

²⁸ Abinü amüi tsurü nengdang nyükhi lanü tsing rosohre.

²⁹ Sünüsü nyükhi khüta shüchiro, Tsingrangba chahnü ning khu ning khüta kiro hütsü mümüdhere.

³⁰ Abinü ning apüm khu ningmüla müthehre, ta kihdi yonglanglü marürah lire.

³¹ Hütsüta Abinü müyurü kangre, ko tsuyongnung thangchi jüre.

³² Abi khehnü tsingchi tsü bire, ko dhingyohchola chisohre.

³³ Tsingxinyübong tsehcho ningkinü müdhesohre, kanglungrünü mii hütsü tsehcho müdhere.