JOB 34 - AMÜSA BAIBEL (BSI)

^1-2 Nührü khütang lümlong azeh, khütang athsehdhsa; ade Iyu nyieng.

³ Nührünü müyahdhingdenü tsuyongnung atsa müdhere, ta yulü yuchichonü mümüdhere.

⁴ Hütsü müdhenung Ihsa chah kehle.

⁵ Job-nü abi achomükeh pü yore, Tsingrangba-nü abi khyang yuje tsü müjürepü yore.

⁶ Abinü yocho, “Khüta Ihnü arahkheh chonung ko Ih mülangepü yonung? Ih asünungthsa lerohpehko, ta Ih amünyi mühle.”

⁷ Nührünü Job hi kyo nyitsarü müngudhingo? Abinü khodesü Tsingrangba müdrüre.

⁸ Abinü amütsarü te shangrü thsare ko münyirü yola mükhongre.

⁹ Tsingrangba lümcho nguchinung tu adhsütah mühlepü abinü yore.

¹⁰ Iyu nyieng, nührü anyichehrüti! Akohbong Tsingrang-nü amüthsalang nguchinung do?

¹¹ Abinü palu nguchi ngang jiyüre ko palu aleng bichire.

¹² Akohbong Tsingrang-nü amünyi münguchire; Abinü khodesü ko sütesü yuje mücho münguchire.

¹³ Tsingrangba-nü Abi zii tsü khürü chahnü ngucho mah-o? Khürünü Abi limih dhingyehnung yohpücho mah-o?

¹⁴ Tsingrangba-nü akang sah tsü khyülikhang,

¹⁵ akang lirü apüm sünung ko thali alih kangnung.

¹⁶ Ade Iyu nyieng, nührü lümlong likhang.

¹⁷ Nührünü Amüsaba Tsingrangba mülangjürü ang? Abinü yuje tsü thrünyirepü lümrü do?

¹⁸ Khode yangthsarütinü adongmücho mahkhang mütsanang, Tsingrangba-nü arüh mülangjüre.

¹⁹ Abinü yangthsarü mükhümre, mahkhang ailümrü sehti alirü mükhümre, tunüo Abinü atümung thricho.

²⁰ Nyüh khüdu dhrongyengnü aromang sopehnung kohle; Tsingrangba-nü nyitsarü chah xüpre ko arüh changpehre; Abinü kheh müzehpü akurahrü müpsehre.

²¹ Abinü nyitsarü mütrah müipi dhingyehre.

²² Tsingrangba chahnü münyirü rangnungthsa amarürah tu mühle.

²³ Nyitsarünü wü Abi yu khasohnung Tsingrangba-nü bekhyah kihsah yohpünung müdhsütah.

²⁴ Langnürüti pehpü arüh mülih thronung Abinü yuzi yangchinung müdhsütah.

²⁵ Tunüo arüh nguchi Abinü müdhele; Abinü arüh pehre ko hütsü romangnü arüh thümjüre.

²⁶ Apümnü ngunungthsa Abinü münyirü khingchire,

²⁷ tunüo arühnü Abi khanglang müwüre ko Abi amülaba pehjüre.

²⁸ Arühnü ailümrü khing Tsingrangba te züdesohre, ko arüh adsiba Abinü yuchire.

²⁹ Tsingrangba-nü tusü münguchinye sünüsü Abi mümülangjücheh. Abinü aromih rangkhang, nyitsarü chongchanung.

³⁰ Yuchotinü tu nguchinung mükohnung, Tsingrangba mütsüprü akhingchirünü arüh michah yangthsanungde.

³¹ Job, Tsingrangba te mülang müchingo? Ko thali amünyi müshitpahnung münyingcho-o?

³² Nü thsamehcho ngusohnung mütsingo? Ko amünyi münguchinung müchecho-o?

³³ Nühnü Tsingrangba lümcho dhsonglipü, nü lümcho Abinü jünung longdirü do? Adhrongchehnung tsü nü mücie, I müci mah; nü lümcho ihrü te ade young.

³⁴ Anyichehrü nyitsarünülü hi hohnung; Iyu yuchirü amüdherü apümnü.

³⁵ Job-nü hütsü mümüdhechonü chore, ko abinü choba tsü tu adüzü mülepü yonung.

³⁶ Job-nü yoba apüm tsü lümdhing; abinü münyirü kyo chocho nührünü müdhenung.

³⁷ Abi münyi chah abinü nyümba lahkehre; Ihsa apüm bete abinü Tsingrangba münyüjüre.