JOB 32 - AMÜSA BAIBEL (BSI)

Elihu-nü Chocho

¹ Job-nü apu achomükehcho nengdang du chochonü, arüh asang tsünü abi yu mülalingpehcho.

² Ta müshüm yarü nyüh khüdu Elihu-nü mülalingnung mürangcho, tunüo Job-nü apu alanglang khyo ko Tsingrangba mülangjücho. (Elihu tsü Ram tsutpu lanü Buz chahnü trahchocho Barakel tsurü licho.)

³ Abinü Job shangrü asang te tsüsü zichürocho. Arühnü Job yu mülengchehcho ko hütsünü Tsingrangba tsü amülanglang kangsohcho.

⁴ Ko hütsüla Elihu tsü azaba thsachonü, arüh atümung chokanü yingcho.

⁵ Khode abinü arüh asang tsünü Job yu mülalingchehcho müdhecho, abi longmüsah

⁶ chonung dikehcho. Ih azarü ko nührü azirü thsachonü, I lümcho nührü te yonung drücho.

Elihu

⁷ Nührünü chonungbaepü Ihnü lümcho, tunüo nührü azibarünü nührü lümlong tsü changtanungbae.

⁸ Ta nyitsarü yang ro lümlong jüba tsü Akohbong Tsingrangba nbü.

⁹ Zichonü nyitsarünü lümlong ngurü mah, mahkhang yuje tsü müdhesohrü mah.

¹⁰ Hütsüeko ade Iyu nyisohnyüre; Ihnü I lümcho yonung.

¹¹ Nührünü chode Ihnü rangcho nyiko, ko lümlong yu yangchide yingko.

¹² Ihnü longi nyiko ko nührünü mükohcho müdheko; Job-nü choba tsü nührü sünüsü mülengcheh.

¹³ Nührünü lümlong tsü ngukopü khüta yonung? Job te Tsingrangba-nü lalingnung, tunüo nührünü mükoh.

¹⁴ Job-nü nührü te chocho, Ite mah, ta nührünü lalingcho roh-i tsülü Ihnü khodesü mülalingnung.

¹⁵ Arühnü yu tsü mükoh, Job; arühnü nüyu mülengcheh.

¹⁶ Arühnü sahmüthsapü yade Ihnü ying pümnung do? Arüh hütsüla tu acholang mülipü yale.

¹⁷ Ihnü ade nüte I alümcho alalingba jonung!

¹⁸ Ihnü müchoko mülicheh. Ihnü müchonung mürangre.

¹⁹ Ih chonung bekhyah müngukhang, yongkha asi zehba shünga kyo Ih tsohrüp-pehnung.

²⁰ Ihnü mürangre; Ihnü chonung.

²¹ Hiba yulengtala süsü mükhümnung; Ihnü süsü müsenung.

²² Ihnü khüta senung mümüdhe, ko Ihnü hütsüta nguchikhang, Tsingrangba-nü zah Ih khingchinung.