JOB 30 - AMÜSA BAIBEL (BSI)

¹ Ta adelü Ini müchirünü mii Ih münyüjüre! Arüh tpurü hütsütoh-i tulamüyohchonü, san nyahba I füza mii münyahsohcho.

² Re tsipehcho hütsüri chahnü Ih tu jingchonung?

³ Arüh dira iilüm yangkongchonü, amala, rangmü la ko apehcho lih la arühnü singying akungcho mükohcho.

⁴ Arühnü rangmü la singdong rohcheh hütsüri tsucho, amükyü dengham ying mii tsucho.

⁵ Atümungnü arüh mütichi iipehcho, aführü chah mohkehjücho kyo.

⁶ Arüh lungkoh la, lungrah la xang züducho ko akhi la linung kangcho.

⁷ Rangmü la arühnü kanglungrü kyo khongcho, ko singtrung pohki tsübülung licho.

⁸ Tula müyohrü, akhyüchah mülirü mülung! Arüh alih lanü iipehko.

⁹ Ade arühnü ro Ih münyodhingre; Ih tu mah ta arüh münyüdong khüdu du.

¹⁰ Arühnü Ih mükhimüngu bichire; I tenü arüh deenü atsauepü lümre, ko arühnü ro I romih chah müchohkehjüre.

¹¹ Tunüo Tsingrangba-nü Ih re müzeh ko atrorü müli külüpjüko, arühnü arüh rihlong apümnü Ih nyümre.

¹² Hiri mülungnü Ih mütozah nyümre; arühnü Ih shangsohre; achangkala Ih changsohnung arühnü lümtrümko.

¹³ Ih tsichehnung arühnü yatiko ko Ih changjünung müküpre; ko arüh yatirü süsü mühle.

¹⁴ Arühnü I rangji akhi la shiyohre, ko I chah dhrümchi zürore;

¹⁵ Ih adrübanü jengko; I neng atsa nyübong kyo fotsire, ko I amüwa nyükhi kyo tsire.

¹⁶ Ade Ih asürüe; I chongcha akyangba tu mühle.

¹⁷ Amala I rüh apüm tohre; tsunahba adhsa münyehlire.

¹⁸ Tsingrangba-nü I hong lanü rangre, ko I jengki zümnahjüre.

¹⁹ Abinü chongbongla Ih dümyohchüre; Ih athrünyi tenü tu papa mah.

²⁰ Ihnü Nüte dsire, O Tsingrang; ta Nühnü khodesü mülaling, Ihnü kihchide, Nühnü mühnyi.

²¹ Nühnü Ih mümüi bichire; Nü zii apümnü Ih dhsümthsere.

²² Nühnü nyübong khyang Ih fotsisohre; tsingxinyübongla Ih dhsangchehsohre.

²³ Ih asünung nowürepü Ihnü müdhele, akang lirü nengdang ajehjücho yang.

²⁴ Tuepü ngahseh lirü khüdu khingchiro? Chingkichingnangnung chah khu apa tu münguchichehba nyitsarü khüdu.

²⁵ Müyurü chongchala lide Ihnü mütratrocho do? Ko dhsangthsirü nengdang dhsa mülümcho do?

²⁶ Ihnü akünyang ko atsingse longdicho, ta achangba ko amarürah du rocho.

²⁷ Alümxü ko adhsanü Ih rehnahko; Ih nyümong mükhu chongcha alaa rore.

²⁸ Nyü müdhsa chah amarürah la Ih rachire; Ihnü müyurü betenü yapü arüku chingre.

²⁹ I yuva tsü alongyü ko anaying, rangfü mahkhang ostrich khongcho yuva kyole.

³⁰ I küp nyah kangre; Ih füdhsanü trüpre.

³¹ Khüdupi akünyang khi yuchicho, ta ade meshü metra du yuchire.