JOB 3 - AMÜSA BAIBEL (BSI)

Tsingrangba te Job Longmüsü

¹ Achangkala Job-nü ayu chocho ko abi suroba nyümong tsü chokehcholacho.

Job

^2-3 O Tsingrang, Ih suroba nyümong chah tsü chokehchola küdusohng; Ih throroba romang chah tsü chokehchola küdusohng!

⁴ Hütsü nyümong tsü amarürah kangsohng, Hütsü nyümong tsü khodesü tülümchehsoh; khodesü atsingsenü tühekehsoh.

⁵ Hütsü nyümong tsü anyahthrüm ko amarürah kangsoh; nyükhinü hütsü shütieng, ko nyü tsü yatipehng.

⁶ Hütsü romang tsü kang lanü khipehng, ko hütsü khodesü tükhiyohsoh;

⁷ hütsü atungcho ko akünyang müliba romang kangsohng.

⁸ Kijang rahsehnung kohrü amongrü khyang, hütsüba nyümong tsü chokehcholasohng.

⁹ Anyangnyü püti tsü tüvisoh; hütsüba romang khyang tsingsenung alongdi tüjü.

¹⁰ Achongcha ko longri limih la Ih surosohcho ngang, hütsüba romang tsü chokehcholaang.

¹¹ Itpa mila hidenü Ih sücho atsau thsako, mahkhang Ih surodenü müsüpü o.

¹² Tuepü Itpanü aphüm chah Ih wüpcho? Tuepü anyikih chah Ih nümüsucho?

¹³ Ih hütsüdenü sürelang, Ih ade kyahshang liba thsako,

¹⁴ Jümü yangthsarü kuh thsachirü yangthsarüti kyo yüpjoba thsako.

¹⁵ Arelang, hon ko taripinü arüh kuh jeng yohpüba yangthsarü tsurüti kyo yüpjoba thsako,

¹⁶ mahkhang süjungpü suroba akhunga kyo yüpjoba thsako.

¹⁷ Kong la amütsarünü amünyi münguchire, ko akherü kyahshang ngure.

¹⁸ Arangyohrü mii khingchiba lanü nyüje atbachi ngure.

¹⁹ Anengkhong ko tulamüyohrü apüm akyokyo, ko ayurü achangkala nyüje ngure.

²⁰ Tuepü nyitsarü rotoseh lisohro? Tuepü nyitsarü alongrila atsingse jüro?

²¹ Arühnü asünung yingre, ta hütsü khodesü mürore; kuthsi tenü arühnü kong mükhyahre.

²² Arüh süpü müdhrürangde arüh künyang mühle;

²³ Tsingrangba-nü arüh aronung rangpüpü apümlang müzuchisohre.

²⁴ Tsunung mülih Ih longrire; ko Ih rühchiba khodesü müzahnung.

²⁵ Ihnü drüba ko ringba lüpcho yuje tikehre.

²⁶ Ih atbachi mühle, akyahshang mühle, ko I chongcha khodesü müchangkare.