JOB 27 - AMÜSA BAIBEL (BSI)

Job

^1-2 Ihnü akang liba Akohbong Tsingrang nengla yuchümre, sünü Ih yuje mükhyüchocho ko I akang amütsau kangsohrü,

³ Tsingrangba-nü I sah mühitside,

⁴ I beküpnü khodesü amütsa müchonung, I mülenü khodesü arahkheh müchonung.

⁵ Ihnü khodesü nührü yuje-eko müyonung; Ihnü asü nyümong chii I yuje nengdang yanung.

⁶ I alanglang khodesü müpehjünung; I lümlong müsa lile.

⁷ I rorüh ko Ih nyüm khatarü apüm amütsarü ko amümüsarü kyo khingchinung.

⁸ Tsingrangba-nü akang ching nyümong, müyudsirü nengdang tu alongdi liro?

⁹ Chongcha mütohde, Tsingrangba-nü arüh yu nyinung do?

¹⁰ Abinü jüba akünyang tsü arühnü mükhyahba thsako; arühnü Abi te mütozah dangkhidangnangba thsako.

¹¹ Tsingrangba zii khütoh-inang Ihnü nührü te donung, ko Akohbong Tsingrang lümchung yonung.

¹² Ta mah, tunüo nührübürünü nguko; hütsüeko tuepü amükhyu hitari choro?

Zofar

¹³ Akohbong Tsingrang-nü amütsarü ko shühkhatohrü hita khingchire.

¹⁴ Arüh tsurü adrong linung, ta atümung chitala sünung; arüh tsuzarü khodesü atsunung kükyo mülinung.

¹⁵ Nying lirü dhsaranü sünung, ko arüh nitpürünü mii arüh me müshünung.

¹⁶ Amütsarü taripi mükhilong linung, ko aparü chongcharü tenü jengki alaa linung;

¹⁷ ta nyitsarü atsa khürünü jengki tsü khyünung ko yuje nyitsarü khürünü taripi tsü khyünung.

¹⁸ Amütsarünü sherila shürüshütpah kyo kuh thsare mahkhang luh nyahrü ayurünü mütpahvi kyo thsare.

¹⁹ Achangka shikhe khüdula, arüh alirü thsa yüpnung ko arüh jesude, arüh kuthsi changkapü linung.

²⁰ Dhrongyeng kihmülüm kyo adrübanü arüh chah dhsükehnung; amala nyübongnü arüh fotsipehnung;

²¹ nyüchürolang nyübongnü arüh kuh lanü fo tsinung;

²² arühnü tsicheh tsinung müküpde, achomang mükeh hütsünü arüh fütsunung.

²³ Nyübongnü arüh chah khongkehjünung, achangba ziinü arüh drüsohnung.