JOB 26 - AMÜSA BAIBEL (BSI)

Job

^1-2 I roh-i amüinung, re müzeh nyitsarü, I nengdang nührü tsü atroba khüta atsa.

³ Hitoh-i athsüchiba atsa nührünü jüre, ko Ih kyo adohrü te nührü lümlong changtare.

⁴ Nührü yu hitoi sünü nyinungepü lümro? Hita chonung sünü nührü te thülacho?

Bildad

⁵ Alih yonglang kih la, asürü nbü dhridhrire.

⁶ Asülih tsü Tsingrangba jingte misha lile; Abi tenü tunü tsungti mühle.

⁷ Tsingrangba-nü kihku lahpi ning tsü lehchehre, ko alimih tsü adeng la tbengpüre.

⁸ Nyükhila kih tingsohba tsü Tsingrangba-nü, ko mütsohrüpsohpü Abinü yohpüre.

⁹ Abinü chonu tsü nyükhi khanglang rangpüre.

¹⁰ Abinü kihdi michah müshimüla külüp ama lanü atsingse changnahcho.

¹¹ Khode Abinü ning thüyehba dongdi tsü yübünang, arühnü adrüchonü dhridhrire.

¹² Kihdi kohba tsü Abi tasenü; kangdi Rahab changjüba tsü Abi thohnü.

¹³ Ning visasohba tsü Abi sahnü, Rang tsiba kangdi müpsehba tsü Abi khehnü.

¹⁴ Ta hiri tsü Abi tase amüdhethsa du, Ihsanü yuchiba tsü yujeng du. Tsingrangba tsü yuje khütoh-inang sünü müdhenung?