JOB 24 - AMÜSA BAIBEL (BSI)

¹ Tuepü yukhanung Tsingrangba-nü bekhyah khüdu müthrochehro? Abi dikehrü nengdang yuje nyümong.

² Alih alaa khyünung nyitsarünü lurü lohchire; arühnü san führe ko arüh san yola yohrütare.

³ Arühnü mürürü yo gadu khyüre, ko thsite sahpü du jünung chomilarü misü yohpüre.

⁴ Arühnü ailümrü arüh angunung athsalang müngusohre, ko chongcharü thrüchi rachisohre.

⁵ Hütsüta ailümrü tsü gadu kyo, akungase lih la tsuyongnung yangchire; arüh tsuzarü nengdang tsuyongnung khüdenüsü müngure.

⁶ Arühnü mülihcho luh la maxanung, ko amütsarü shükusiluh lanü shükusih labülungnung.

⁷ Ama la arühnü amüpinung tu mülipü yüpre, thsahde müpinung tu mülipü.

⁸ Azongchah roba tsing tsünü arüh zitpahre, ko lungkoh la tsikehnung tsübülungre.

⁹ Amütsarünü au mülih akhungarüti ayurü kangsohre, ko thsite ngang ailümrü tsuzarü no khyüre.

¹⁰ Ta ailümrü shü mülipü tbhüdeng rachire; maxade arüh yangkongre.

¹¹ Arühnü tuji nengdang olive ko yongkha nengdang shükusih nyehre, ta arühbürülü xosehre.

¹² Yangdila lerohpehrü ko sotsirünü züdere, ta Tsingrangba-nü arüh kihchicho mülalingre.

¹³ Atsingse mükhyünyürü nyitsarüsü lile; arühnü hütsü münyicheh mahkhang hütsünü nü chola müwüre.

¹⁴ Anyangnyü akyüsehrünü shemüsure, ko ailümrü kyüsehnung würe ko aromang abinü führe.

¹⁵ Nahtrahnaxengrünü yingrümnung yingre; bürünü müdhingchehsohnung abinü aku müshüre.

¹⁶ Amala aführünü kuh müp-phoh züdure, ta anyümonglü arühnü rangre ko avisa mürire.

¹⁷ Arühnü anyümong atsingse drüre, ta arüh nengdang ama tsü adrü mühle.

Zofar

¹⁸ Amütsarü kihmülümnü woh tsire, ko abinü lihba alih tsü Tsingrangba-nü chokehcholare; adelü abinü shükusih yolang nguchinung müwüre.

¹⁹ Adhsa ko trüpsehnyü la mürang züchangpehcho kyo, akang lirü lih lanü münyirü changpehre.

²⁰ Atpanü mii adelü mülümchehre; abi müsinü tsukhangre ko singme kyo sühnahre.

²¹ Hütsüta abinü chomilarü mütsa bichire, ko pümdongcho khingkurü te yanglih müngusohcho khu tikehre.

²² Tsingrangba-nü apu tasela athrungrü changsohre; ko amütsarü süre.

²³ Tsingrangba-nü abi khümcho lisohnung kohle, ta abi chah lede anah jüre.

²⁴ Azachah nengdang amütsarü müware, ta hütsüpü abi za kyo mükure, axasahcho madong kyo.

²⁵ Hütsüta mah pü khürünü rinung kohrü mah-o? Iyu hi arahkheh-epü khürünü yuzi jünung do?