JOB 23 - AMÜSA BAIBEL (BSI)

Job

^1-2 Ihnü ade yingcheh Tsingrangba nyüm longmüsü yare; Ihnü I rühchicho münyehlichehre.

³ Ihnü Abi yangchinung, Abi lichah müdhelanglü.

⁴ Ihnü Abi te I khiyu yonung, ko I phikhümnü yurehta apüm yonung.

⁵ Abinü Ite tu yonung ko khüta lalingnung müdhenyüre.

⁶ Abinü I chah Abi re apüm bichinung do? Mah, Ihnü chode Abinü nyinung.

⁷ Ih yuje lile; Ihnü Tsingrangba te yochehle; Abinü lede nengdang Ih achomükeh mishajünung.

⁸ Ihnü nyüchürolang yangchiko, ta Tsingrangba hütsüla mühle; nyüzüdulang Ihnü Abi yangchiko, ta Ihnü Abi müshirü.

⁹ Kihku lang ko kihjinglang Tsingrangba-nü nguchire, ta Ihnü Abi müngu.

¹⁰ Ta Tsingrangba-nü I mütrah apüm müdhele; Abinü Ih düzodhingkhang, Ih müsa ngunung.

¹¹ Abinü throchehba langla tsü Ihnü yuje cho tsehre; ko khüdesü mürümchi.

¹² Ihnü lede Tsingrangba-nü mülacho nguchire; Ihnü I lümcho la mah, ta Abi lümcho la tsehre.

¹³ Abi khodesü mümülichire. Sünüsü Abi münyümcheh, mahkhang Abi lümcho müyaticheh.

¹⁴ Abinü I nengdang tu chungcho, hütsü Abinü tikehsohnung; hütsüba lümchung tsü adrong yola khüdu.

¹⁵ Abi jingte Ih adrüchonü dhridhrire.

¹⁶ Akohbong Tsingrang-nü I lasih sümsohko. Ih drüsohba tsü amarürah tsünü mah,

¹⁷ hütsü Tsingrangba-nü, amarürah tsünü I nah tohsohnye.