JOB 22 - AMÜSA BAIBEL (BSI)

Yulalingta Asangu Elifaz

^1-2 Tsingrangba-nü bichinungthsa, amüdherü yola khürü lirü mah-o?

³ Nührünü athsalang nguchiba tsünü Tsingrangba jingchorü do? Mahkhang nührü tsaba tsünü Abi rükurü do?

⁴ Nühnü Tsingrangba drücho khu Abinü nüh yübü thsadsürü mah.

⁵ Mah! Hütsü nühnü münyi dira shitpahchonü; hütsü nühnü amünyi hütsütoh-i nguchicho ngang.

⁶ Nü jünirü khyang nüte teeba thsite sahsohnung, abi tbhüdeng yohpüjüpü nühnü abi jengki hitsijücho.

⁷ Akyahrü khyang nühnü kih müdi, ko ayangrü khyang tsang müdüp.

⁸ Alih apüm khyünung nühnü nü tase ko nü jengreng bichiko.

⁹ Nühnü chomilarü mütrocho du mah, ta mürürü chahnü kengcho ko sehchi bichiko.

¹⁰ Hütsünü ade nü mükang zeng thsapüle, ko dhrongyengnü nüh drüpehre.

¹¹ Marürahra kangchonü nühnü müngure, ko kihmülümnü nüh mülümphare.

¹² Tsingrangba amungthribala pümpü, adhseng la thsanye, chenghiti chah müdhingchahchürü ang?

¹³ Hütsütanye nühnü yorü, “Tsingrangba-nü tu müdhero? Abi nyükhila rang lile, Abinü khüta Ihsa yukhanung?”

¹⁴ Nyükhi acheh tsünü Abi müngunungepü nühnü lümre, Abi ningkongla rachide.

¹⁵ Amütsarü tsehba langla tsü tsehnung nühnü dhrongchehcho mah-o?

¹⁶ Arüh akyang müchie, kihmülümnü woh tsicho.

¹⁷ Hütsüri tsü Tsingrangba mükhyüchorü, ko Abinü arüh chah tu münguchinung lümbarüti tsü licho.

¹⁸ Ta müwajüba tsü Tsingrangba-nü. Amütsarü lümlong tsü Ihnü münyichehre.

¹⁹ Nyitsarü atsa künyangre, ko achomükehrü münyüre, arühnü amütsarü khingchi ngude.

²⁰ Amütsarünü khyübülungcho apüm changjücho, ko anyingcho tsü michangnü trüp-pehcho.

²¹ Job, ade Tsingrangba te yangtsa külüpm, ko Abi te arorüh kyo tübichi; hütsükhang Abinü nüh müwajünung.

²² Abi adoba tsü khyüchoung, Abi yu nü lasih la yohpüng.

²³ Ho, Abi yang longlüm ximüla rung, ko nü kuh la nguchiba amünyiti apüm pehjüng.

²⁴ Nü hon tsayohchü pehng; nü hon amüdhseng tsü yongkhi akung la pehng.

²⁵ Akohbong Tsingrang tsü nü hon thsaang, ko Abi tsü nü nengdang sühpüba taripi kangsohng.

²⁶ Hütsüde nühnü Tsingrangba chah longlangnung ko Abi tsü nü akünyang pohchehji kangnung.

²⁷ Nühnü kihchide, Abinü lalingnung, ko nühnü yuchüm tsü yohpünung.

²⁸ Nühnü nguchicho apüm la akoh ngunung, ko nü langla atsingse vinung.

²⁹ Tsingrangba-nü amüthsehrü tphahchore, ko alonglümrü khümchore.

³⁰ Abinü nüh khümchonung, nüh achomükeh likhang, nühnü athsalang du nguchikhang.