JOB 21 - AMÜSA BAIBEL (BSI)

Job

^1-2 Iyu tsatsa nyieng; nührü chahnü atbachi hütsü du khyünyüre.

³ I khyang chonung mülaang, khode Ihnü chokanang, hütsüpü du nührünü müthsamünyüng.

⁴ Ihnü asüba nyitsarü te yübütarü mah; Ih mürangchonung tsü yuzi lile.

⁵ I chah dhing. Nührü be kaa dhingba tsünü mükükyü ang?

⁶ Ihnü I chah tikehba hi lümdhingde, Ih nyekare ko dhridhrire.

⁷ Tuepü Tsingrangba-nü amütsarü akang lisohro, arüh shizi ko müwa lisohro?

⁸ Arüh tsuzarü ko shümtsurü lile, ko hütsüri zicho dhing lire.

⁹ Arüh kukhi la achangba mürore; arüh khodesü drü mülire.

¹⁰ Ho, arüh misüti suhre ko alongmüzi mülipü mütrüre.

¹¹ Arüh tsuzarünü sanza kyo shangchi

¹² shajare ko tbenglah ko honglilah khi te nyiichire.

¹³ Arüh akang ayung künyang lire, ko müchongchapü naying süre.

¹⁴ Amütsarünü arüh yah pehjüngpü Tsingrangba te yore; arüh akang nengdang arühnü abi lümcho müyangchire.

¹⁵ Tsingrangba drünung müdhsütah pü arühnü lümre mahkhang Abi te kihchicho ajingcho mülepü lümre.

¹⁶ Arühbürü tasenü kohchoepü lümre, ta hütsü Ihnü mükhyüchocheh.

¹⁷ Amütsarü dsi lede mehdu lirü mah-o? Arüh khüdunü dusü achangba mümütohdhingo? Tsingrangba-nü arihlongchüro amütsarü mükhingchidhingo?

¹⁸ Ko nyübongla mayü roh-i fü mütsidhingsoh-o? Mahkhang tsingxinyübongla asongsong roh-i müfotsidhingsoh-o?

¹⁹ Tsingrangba-nü au münyi ngang atsurü khingchirepü nührünü yore. Mah! Amünyi nguchiba apu tsü khingchisohng; Arüh münyi ngang hütsü Abinü nguchirepü arüh khyang ngusohng.

²⁰ Münyirü khyang palu akhingchi hisohng; Tsingrangba rihlong tsü arühnü müdhesohng.

²¹ Nyitsarü khüdu süpü khanglang, atsurüti yuje künyang liro müliro abinü müdherü do?

²² Amichahbala lirü yu mii khaba Tsingrang, nyitsarünü Abi te donung kohnung do?

²³ Khürü asü yingcheh akang tsa lire;

²⁴ arüh künyang ko müla süre, arüh fü tsayeng yohpüpü.

²⁵ Aparü akünyang seh mülire; arüh akang lipü chongcha süre.

²⁶ Ta atümung sako süre ko dhrürangre; arüh atümung müsinü jengre.

²⁷ Nührü lümlong amütsa Ihnü müdhele.

²⁸ Nührünü yore, “Amünyi du nguchiba akurahbong kuhsülü khülo?”

²⁹ Nührünü shitsehrü te müchotacho do? Arühnü hiroba yusi tsü mümüdheo?

³⁰ Tsingrangba zichüro khingchi nyümongla, khümchoba tsülü amütsaba du tsü lile.

³¹ Amütsarü mülangjürü sü mühle, mahkhang abi nguchi ngang thali jürü süsü mühle.

³² Khode abi konglang hiwonang, nyah liba konglang,

³³ me pehla mükhilongnü müyangyohre, ko alihnü mii abi me chah longlüm jore.

³⁴ Ko nührü! Nührünü amükhyunü Ih kihchonung müküpre. Nührünü lalingba apüm tsü arahkheh!