JOB 2 - AMÜSA BAIBEL (BSI)

Satan-nü Job Thali Thsadsücho

¹ Adesü ninglangrünü Abüdongba te shirünung nyümong chii rocho ko arüh yola Satan-sü zehcho.

² Abüdongba-nü abi te tsingdhingcho, “Nüh khüdenü rocho?” Satan-nü lalingcho, “Wüli-roli ko tuwüli-jüroli liba limih lanü rocho.”

³ Abüdongba-nü tsingdhingcho, “Nühnü I dikehrü Job münguo? Limih la abi roh-i yujechorü ko atsa süsü mühle. Abinü Ih mübüre ko amünyi tusü münguchinung müzahre. Tu yuzi mülipü abi thsadsünung nühnü Ih kihchocho, ta Job tsü lede roh-i abübü lile.”

⁴ Satan-nü lalingcho, “Nyüh khüdunü akang linung nengdang lüpcho pehjünung.

⁵ Ta Nühnü ade abi shutsala dhsakehjükhang, abinü Nüpu betenü chokehcholanung.”

⁶ Achotsü Abüdongba-nü Satan te yocho, “Dhing, abi nü kheh la zehle, abi akang du tükhyü.”

⁷ Hütsüpü Satan-nü Abüdongba licho lanü tsicho ko Job fü apüm la madhsa chürosohcho.

⁸ Job-nü wü sehnyeh bhüm la pümpü amadhsa müthrüpchinung alih füh müpnahcho dsi-o throrocho.

⁹ Anitpünü abi te yocho, “Nüh akhudi roh-i du abübü linung ang? Tsingrangba tsü chokehcholaang ko sopehng!”

¹⁰ Job-nü lalingcho, “Thoh müzeh yu tücho. Tsingrangba-nü atsa jüde Ihsanü künyang khyüchore. Khang Abinü chongcha müthehde tuepü Ihsanü wahro?” Abi hitoi chongchanye, Job-nü Tsingrangba nyüm tusü müchocho.

Job Shangrüti Rocho

¹¹ Job shangrüti yola asang tsü Teman yangdi lanü Elifaz, Shua lih lanü Bildad ko Nama lih lanü Zofar licho. Job chongchacho yuchi arühnü wü abi kihchonung dhrongchehcho.

¹² Arühnü ashulanü Job ngucho, ta abi müdhingchehcho. Khode arühnü chii rocho, arühnü tramüsucho, ko alongrichonü arüh jengki rehnahcho ko lihwü kang hiro nyübongla sohpehcho ko arüh thah chah kangkehcho.

¹³ Hütsüpü arühnü yu tpah-o mii müchüropü abi te alih la nyümong dhünyeh romang dhünyeh pümcho, tunüo abi khütoh-i chongchacho hütsü arühnü ngucho.