JOB 16 - AMÜSA BAIBEL (BSI)

Job

^1-2 Ihnü hütsütari yu akhudisü yuchiko; nührünü jüba atbachi tsü akhingchi du.

³ Nührünü chodu chonung mah-o? Tunü nührü zichüro chosohro?

⁴ Ih tsü nührü ko nührü tsü Ih thsarelang, nührünü choba apüm tsü Ihnüsü chochehnung. Ihnü dee tsa I thah ngahnung ko nührü chah Iyu thohkehjünung.

⁵ Ihnü nührü thsüchi rezehsohnung ko chodu cho nührü tbachijünung.

⁶ Ta Ihnü chochonü tu mükang, ko sahmüthsa lichonü I adhsa mütbachi.

⁷ Nühnü Ih kyahsehsohko, Tsingrang; Nühnü I kukhi süsohko.

⁸ Nühnü Ih rangko; Nüh I rorüh. Ih aküp ko arüh du, ko bürünü hütsü I mülang yuzi khyüre.

⁹ Rihlongchüro Tsingrangba-nü Ih rehnahko; Abinü I chah thrünyi dhingko.

¹⁰ Bürünü I chah naking hingkehjüre; arühnü tsibülung I romih la tangre.

¹¹ Tsingrangba-nü amütsarü kheh la Ih jüko.

¹² Ih tbachi licho, ta Tsingrangba-nü I hongnü yüm hiwücho ko mütsa bichi Ih dhsümthsecho. Tsingrangba-nü Ih dhingyoh bichiko,

¹³ ko apümlangnü I chah tbüdeng kyakehjücho, I chah khakhu kyaa Ih dhsakehjücho; hütsütapü mii Ite yanglih müngu.

¹⁴ Abinü loli loli Ih dhsakehjücho; Amükyangrü rothsarünü roh-i Abinü Ih khingchire.

¹⁵ Ihnü longricho ko müyahshü müpicho, ko Ih hila asongsongnü bhümti pümcho.

¹⁶ Atrachonü I romih moh kangko, ko I nahküp bümcho,

¹⁷ ta Ihnü shühkhatoh thsamehcho mühle, ko I dangkhidangnang müsa lile.

¹⁸ O Alih, Ite amüthsalang nguchicho türang! Ih yuje nengdang khongcho tüyati!

¹⁹ I nengdang yapü khümnung ninglang khürü lile.

²⁰ I shangrünü Ih münyüjüre; Tsingrangba te I nah lanü nahshükih pohre.

²¹ I nengdang khürü khyang Tsingrangba te kihchisohnyüre, shangrü khüdu nengdang kihchijücho kyo.

²² I kang khukhang tsile, ko müthaliba langla Ih tsehre.