JOB 15 - AMÜSA BAIBEL (BSI)

Yulalingta Anyüuba Elifaz

^1-2 Yu adeng, Job! Yu adeng!

³ Lümlong lirü sünü nü roh-i müchore, mahkhang adüzü müliba yunü apu mükhümre.

⁴ Nühnü nü lümcho du khyükhang, sünüsü Tsingrangba müdrünung; sünüsü Abi te müdangkhidangnangnung.

⁵ Nühnü choba tsünü nüh mütsacho ngusohre; Nüyu sihthsachonü nüh mütsacho rangnung müküpre.

⁶ I nengdang nüh mülangjünung müdhsütah; ta nüpunü choba yu müipi tsünü nüh mülangjüko.

⁷ Nüh akhu surochoepü nühnü lümrü do? Tsingrangba-nü azongti külüpde nüh licho mah-o?

⁸ Tsingrangba lümchung külüpde nühnü yuchicho mah-o? Nyitsarü lümchung tsü nüyo du mah-o?

⁹ Ihrünü mütsüpcho nühnü müdhecho tu mühle.

¹⁰ Ihrünü lümchung hi kutpohthru nyitsarü, nüu müsurodenü lirü nyitsarü chahnü nyichocho lile.

¹¹ Tsingrangba-nü atbachi jüre; tuepü hütsü dhsongliro? Ihrünü abi nengdang yunü mii longlüm chotako.

¹² Ta nülongnyüpchüro ihrü chah zichüro dhingre.

¹³ Nühnü Tsingrangba te zichürore, ko Abi mülangjüre.

¹⁴ Nyitsarü khüdu yuje müsa linung ang? Nyitsarü khüdu Tsingrangba te alanglang linung ang?

¹⁵ Tuepü Tsingrangba-nü ninglang riwürü chah mii long mülangchehro; arüh mii Abi nahte mümüsa.

¹⁶ Nyitsarünü amünyi tsü kih roh-i yongre; ho, nyitsarü yuje mücho; arüh amii mühle.

¹⁷ Ade, Job, Ihnü müdheba hi nyidhing.

¹⁸ Lümlong lirünü Ite yuje tsü doko, hütsü arühnü arüh tpurü chahnü nyichocho, ko arühnü tusü rang müyohpücho.

¹⁹ Arüh lih tsü shuparü chahnü khümcho licho; Tsingrangba chahnü arüh nücho tsinungthsa süsü mülicho.

²⁰ Bürü sehchirü amütsarü tsü abi akangli ayung khingchinung.

²¹ Adrüba yuva abi nangkhila yuchinung, abi khümcho lilepü lümde fühkhohrünü abi pehnung.

²² Amarürah lanü tsiphunung alongdi mühle, tunüo khüdenang abi kyüsehnung nohsheng khüdu yingyale,

²³ ko abi me tsunung hogonti yingyale. Abi aronung suro mütsa pü apunü müdhele;

²⁴ achangba, rezeh yangthsarü kyo, abi pehnung yingyale.

²⁵ Sünü Tsingrangba chah kheh khehthahnang, Akohba mükhimüngurü suro tsü hütsüta thsanung.

^26-27 Hütsüba nyitsarü amüthseh ko anyümrü; abinü ahongzi atsung bipü Tsingrangba nyüm khatanung shangre.

²⁸ Hütsüba nyitsarünü yangdiditi mahchehcho, ko abüdongrü tsipehpü liba kuh khyücho, ta hütsüri yangdiditi ko kuh tsü khatanü changjünung.

²⁹ Abi anyahli alirüthsa mülinung; abi tusü anyahli mülinung. Apu nbükhüm mii changpehnung,

³⁰ ko abi amarürah lanü mütsiphunung. Abi michangnü ajengza tahcho ko nyübongnü fotsiba singpi khüdu kyo linung.

³¹ Abi motsing chah yudsinungthsa dohkhang, amünyi tsü abi jiyü thsanung.

³² Akyang müchie abi mükunung, ajengza kyo abi mükupehnung ko khodesü müthümlangnung.

³³ Abi tsü amülohcho shükusih; ko trülohpehba olive singdong kyo linung.

³⁴ Tsingrangba mümüdherü chahnülü mütrahchosohnung, ko pohsanü thsacho kuh tsü michangnü trüp-pehnung.

³⁵ Hitari nyitsarünü chongcha nengdang lümchung chungre ko amünyi nguchire; arüh lasih la lede kihyochüba dunü jeng lire.