JOB 14 - AMÜSA BAIBEL (BSI)

¹ Atpanü surocho nyitsarü atümung, akang akhikyah ko chongchanü jeng lile.

² Yungpi khüdu kyo Ihsa zire ko trülohre; nbükhüm kyo Ihsa changpehre.

³ I chah adhingnung mii müdhingnung mah-o? O Tsingrang, mahkhang Ih thsadsüng ko I yukhaang.

⁴ Nyitsarü chahnü surocho amümüsa kyo, tulanüsü amüsa chüronung mükoh.

⁵ Abi akang khütoichah linung? Choo khütoi, hütsü amüngunü khisahpehre. Nühnü hütsü yu ziipehko, hütsü mülichinung mükoh.

⁶ Abi tenü ximülaang ko abi müleng pehjüng; abi chongcha akang tsü künyang lisohng.

⁷ Singyanbüh khüdu alongdi lile; hütsü anuchi akang linung.

⁸ Ara tsü shinye, ayahnbüh tsü sünye,

⁹ kihnü hütsü anu chisohnung.

¹⁰ Ta nyitsarülü süre ko abi hütsü achangka; abi süre ko abi khüde liro?

¹¹ Pohzahba yongkhi kyo, ko kungpehba changtphü kyo,

¹² nyitsarü süre, ko khodesü müsurore. Ning müchangde arüh müsuronung; arüh yüpcho lanü müsuronung.

¹³ Asülih la Ih rangpüsohnyüle; nü rihlong mükhukhangde Ih rangpüsohng ko Ih lümchehnung bekhyah khüdu throchehng.

¹⁴ Nyüh khüdu sükhang, abi kanglinung do? Ta Ihlü bekhyah atsa khüdu nengdang yingnung, hiba chongcha bekhyah hi mükhukhangde yingnung.

¹⁵ Hütsüpü Nühnü Ih dsinung, ko Ihnü lalingnung, ko Nühnü thricho Ite Nüh künyangnung.

¹⁶ Hütsüde Nühnü I mütrah apüm dhingyehnung, ta Nühnü I münyi jingshü mübhunung.

¹⁷ Nühnü hütsüri mülangpehjünung ko hütsüri nbüchü pehnung; Ihnü thsamehcho apüm Nühnü pehjünung.

¹⁸ Azongti khülunung shikhe tsehle, ko lungrah tsü dhimüipehnung.

¹⁹ Kihnü lung threhtsangnung, ko tsingnü alihsu wohkhang tsinung; hütsüta Nühnü nyitsarü akang alongdi changjüre.

²⁰ Nühnü nyitsarü khüdu kohre ko lede nengdang tsisohre; asüde aromih zümre.

²¹ Atsurünü akoh ngure, ta hütsü abinü khodesü mümüdhe, mahkhang arüh ashah khyüdesü abi te müyo.

²² Abinü apu fü dhsacho ko apu lasih longricho du müdhere.