JOB 13 - AMÜSA BAIBEL (BSI)

^1-2 Nührünü yoba lüpcho tsü Ihnü akhudinü yuchiko. Ihnü apüm nyichehle; nührü kyo Ihnüsü müdhele. Ih nührü tenü apohkiba mah.

³ Ta I yuji tsü Tsingrangba te, nührü te mah; Ihnü Abi te I khiyu chotanyüre.

⁴ Nührü müsithsa apüm arahkhehnü müshütiko; nührü apüm tsü amii müliba doctor kyole.

⁵ Tu tücho, ko nüh lümlong lirüepü khürü khyang lümsohng!

⁶ Ihnü kihchiba yijüng.

⁷ Nührü tuepü arahkheh choro? Nührü arahkheh tsünü Tsingrangba jingchonungepü lümrü do?

⁸ Nührünü Abi khümnung müküprü mah-o? Nührünü yukhajila Abi khiyu hiwünung do?

⁹ Tsingrangba-nü nü chah longi dhingrelang, nü chah tunang dusü atsa ngunung do? Nührünü nyitsarü te kyo Tsingrangba kihyochünung kohnung mah-o?

¹⁰ Nührü akhürah rang yohpünye, Abinü nührü khatanung,

¹¹ ko Abi zii adrübanü nührü jengsohnung.

¹² Nührü choyoh yu tsü tavi kyo akhyüchah mühle; nührü rehtaba tsü lishe kyo trümnahre.

¹³ Sahtüthsa ko I khyang chosohng, ko tu tikehnang tikehsohng.

¹⁴ I kang jünung mii rungnüm lile.

¹⁵ I alongdi apüm kingkako, Tsingrangba-nü Ih süsohnye dütu! Ihnü Abi te I yuzi jünung.

¹⁶ I müci mülahchonü dusü Ih khümchonung, Tunüo amütsarünü Tsingrangba jingte mürochehnung.

¹⁷ Ade Iyu nyidhing.

¹⁸ Ih I yuzi jünung rungnüm lile, tunüo Ih yuje lilepü Ihnü müdhele.

¹⁹ Ih mülangjünung rorüh mah-o, Tsingrangba? Hütsüta khang, Ih sahmüthsa sünung rungnüm lile.

²⁰ Ihnü lang anyüh chingnung; hütsü nyengchoung, ko Ihnü Nütenü rangnung mümüküpnung;

²¹ Ih khingchiba zahng, ko adrübanü Ih tüdhsümthse.

²² Akhu choung, O Tsingrang, ko Ihnü lalingnung; mahkhang Ih chosohng, ko Nühnü laling.

²³ I münyi tuturüo? Ihnü tu thsamehcho? Tu ngang Ih mülangjüro?

²⁴ Tuepü Ih müriro? Tuepü arorüh kyo Ih bichiro?

²⁵ Ih nehsohnung müküprü mah-o? Ih singvatpah khüdu du lile; mayü kungcho khüdu Nühnü iichirü ang?

²⁶ Nühnü Ih nyüm yuzi amütsa hirore, I zade nguchicho ngang mii.

²⁷ Nühnü I jingla ixilih yohjüre; I mütrah apüm khiyehre, ko I jingdrang mii thsadsüre.

²⁸ Ih asühcho singme kyo dhrümchire, tsangsohnü tsucho fükhüm kyo.