JOB 11 - AMÜSA BAIBEL (BSI)

Zofar

^1-2 Amükhyu yu hiri sünüsü mülalingnung do? Khütang chochonü nyüh khüdu langjünung mah-o?

³ Job, nüyu mülengchehnungepü lümrü mah-o? Nü müthsamünyü yu tsünü ihrü yu müchochehsohnung mah-o?

⁴ Nühnü yoba tsü yuje-epü nühnü lümre; Tsingrangba jingte nüh amüsaepü nühnü lümre.

⁵ Nüyu Tsingrangba-nü lalingsohnyüle!

⁶ Abinü nüte arang lümlong yonung; Nyitsarü amüdhenü müchihnung dee asoh khürü lile. Nü chah lengcho tenü akyühchoba Tsingrangba-nü khingchire.

⁷ Tsingrangba dicho ko tase tsü nühnü kiidhingchehnung do?

⁸ Ning tsü Tsingrangba nengdang akihzah mühle, ta hütsü nühnü müchihnungla lile. Tsingrangba-nü asülih müdhele, ta nühnü hütsü mümüdhe.

⁹ Tsingrangba diba tsü limih tenü amüzau, ko kihdi tenü adiu.

¹⁰ Tsingrangba-nü nüh rang yukhalang norokhang, sünü Abi yatinung?

¹¹ Tsingrangba-nü amii müliba nyitsarü müdhele; arüh münyi nguchi apüm Abinü ngure.

¹² Rangmü gadu rahseh kangde, adohrü lümpisa kangnung.

¹³ Job, nü lasih müchong yohpüng, Tsingrangba te nü kheh dhimüsung.

¹⁴ Nü kukhi lanü amünyi ko amüthsalang khyükhung.

¹⁵ Hütsüpü drengdreng ko müci mülah limih la lieng.

¹⁶ Hütsüde nü lümlong lanü nü chongcha apüm changnung, kihmülüm khu tsipü adelü mülümkehcho kyo,

¹⁷ Nü akang tsü nyüthungla nyüdhsa tenü avisau kangnung, ko akangla amarürah-uba bekhyah tsü wawala kyo vinung.

¹⁸ Nüh khümcho alongdi li linung; Tsingrangba-nü nüh tsungtinung ko akyahshang jünung.

¹⁹ Nühnü nü rorüh müdrünung; adrongnü nüte arüku chingnung.

²⁰ Ta amütsarülü lümdhama dhingmükangnung, ko atsichehnung lang mülepü müdhenung. Asüba ronung du tsü arüh alongdi linung.